Рукопись XVII-го столетия,

С.-Петербургской Императорской Публичной библиотеки.

Писанная

Богомудрым и Благородным Старцем

СПИРИДОНОМ ПОТЕМКИНЫМ

Бывшим из рода славных бояр Потемкиных

и Архимандритом Покровскаго монастыря.

Cм. старообрядчество; XVII век.

[Рукопись сия извлечена из дел Преображенскаго Приказа и Тайной розыскных дел Канцелярии].

Книга богомудраго старца Спиридона Потемкина.

иже богоугодно пожив в Покровском монастыре,

и преставися во 173-м году, месяца ноября, в 2 день.

Оглавление книги сея

О крестном знамении

О Святом Дусе

Слепии видящих водят

О связании сатаны на 1000 лет

О предотечах антихристовых

О Премудрости Божии

О нечювственных християнех

О антихристе

О пении аллилуия

Эпистолия диакона Феодора

Послание Андрея Клещеева к протопопу Аввакуму

Послание Аввакума протопопа к Андрею Клещееву

Слово первое.

О крестном воображении, и о сложении перстов десныя руки,

како подобает християном креститися рукою,

тако и священником подобает люди благословляти,

единым воображением.

понеже един есть крест Христов данный нам на освящение верным,

от Пастыря Христа.

Образ есть святаго воображения честнаго креста. иже возлагают православнии християне на лица своя. и о сложении перст, иже извести Бог Мелетием патриархом Антиохийским, арианом тогда хулящим приимати благословения от преосвященнаго руки сложения ради перстов, глаголя: не хощем приимати, зане многобожие возлагает на ны. аще бо у него Отец Бог, и Сын Бог, и Дух Святый Бог. како не три Бози. и того ради не приемлем его благословения, разве аще знамением известит Бог, тогда повинемся. Святый же исполнен благодати Святаго Духа, показа им прежде совокупив три персты и не бысть знамения. посем два совокупив и един пригнув и благослови люди. и абие изыде от руки его огнь аки молния и громогласно возопи глаголя: Троицу почитаем во едином Божестве. и тогда посрамишася ариане, и купно с православными падоша на лица своя пред патриархом, просяще прощения. купно же и благословения. и протолкова святый достохвально гласом, яко три персты совокупив знаменует Святую Троицу. а совокупление триех единство Божества. второе же совокупление двух перстов знаменуют Божество с человечеством Сына Божия, яко Той не оставив недра Отча сошед и бысть человек. а пригбением единаго от двух перстов, знаменует смирение, и послушание, страдание, и погребение и во ад сошествие по человечеству. просто же стоящаго единаго от двух, знаменует еже ничтоже пострада Божество с человечеством, но страждущее воскреси от мертвых. по воскресении вознесение знаменует, еже возносим персты, иже знаменует воскресение. просто стоящим со всецелым святолепным сложением во всех перстах десныя руки, юже и полагаем высоко на главе. Знаменует главу нашу Христа Сына Божия, выше всех церквей. а еже полагаем на пуп знаменует воплощение в пречистую утробу Богоматерню. а на десное рамо полагаем знаменует вознесение, и седение одесную Отца. и еже речет праведный Судия одесную стоящим: приидите благословеннии Отца Моего наследуйте уготованное вам царство, и прочая. а еже полагаем на шуее, знаменует еже речет праведный Судия стоящим ошуюю: идите от Мене проклятии во огнь вечный уготованный дияволу и аггелом его, и прочее. и сице с такими страшными догматы воображается крест Господа нашего Исуса Христа, на лицах християн православных с молитвою, яже возгласуют сему святолепному знамению креста Господа нашего Исуса Христа. яже есть сице: Господи Исусе Христе Сыне Божий помилуй нас. и помилуй мя грешнаго, поклон. тако предаша апостоли учеником Его, тако печатлеша кровию святии мученицы. тако прияша святии вселенския соборы. тако дойде до святаго Мелетия. тако страшно засвидетельствова Бог святым Мелетием. тако прият церковь и удержа цело до ныне. сие согласно со святою верою, и с непорочным символом святыя веры. сице держано во християнех, на всяк день от рода в роды. Кто смеет пременити, или приложити или отъяти что, разве от отпадших от веры християнския, иже глаголют хульныя глаголы. И на сию истинну глаголя, яко непокоривыи нашим исправлением зле персты слагают двух сынов воображают, единаго с Отцем, а другаго на землю в плоть сошедша, и по любви соединена. яко же Несторий блядословит, еже глаголют неистовым языком. не знают величества Сына Божия, яко силен есть, со Отцем седети неразлучно, и на землю снити непостижимо, яко вся могий и везде сый и вся исполняя. а не два яко же хульницы глаголют. церковь бо Того поет: яко Отча недра не оставль, сошед на землю Христе Боже, и прочая (глас 7 ирмос песнь 4). Но теми хулится, а нами прославляется, по божественному апостолу (1 Петра зач. 65). инии же на левое рамо возлагают небрегуще о сложении перстов сие подобным разумом махающе. инии же воплощения Господня не воображающе в перстах своих. но крест тремя персты знаменуют слагающе не зело мудрость. и прежде бо совокупляют два перста, а потом третий пригибают глаголя, яко тако Мелетий прописа, и чюдесем затверди. Егда вопрошаем, почто два перста прежде слагаете, а третий потом пригибаете. где сила ваших перстов сложения; где равенство Святыя Троицы, кая два лица прежде совокупляете и почто прежде воплощения Христова Троицею крест знаменуете. и почто прежде вознесения прописуете на челех ваших, глаголя: яко ваша глава Христос седит на небесех. А потом прописуете снитие во утробу девичу, полагающе те три персты на чрево свое. прежде ли Христос вознесыйся на небеса, а потом сниде во утробу девичю; и паки с пупа на десное рамо полагающе руку, мудрствуете вознесение. Знаменуете не прямо; а на шуее рамо полагающе руку, мудрствуете второму пришествию Христову знаменатися. кое согласие вашего мудрования, прежде нарекосте главу небо, а потом нарицаете рамо небо. где равенство главе с раменом; паки мудрствуют полагающе руку на левое рамо, знаменатися второму пришествию Христову на землю. где разум; чему верить; рамена бо человеча стоят равно, а небо со землею не равно стоят. а что глаголете знаменаяся сице развращение мудрствуете о том не пишите, не глаголите. егда вопрошают вас, но вся сия яже воспомянухом молчанием печатлеете. кая сила знамения вашего с такими неправдами. како сатана лгати научивый; убойтеся како предстанем распятому на кресте Господу нашему Исусу Христу в день суда. Той бо нам даде крест свой на прогнание всякаго врага и супостата. Той бо нас научи воображати того со святыми богословскими догматы. яко же выше предложихом во знамении святаго Мелетия патриарха и чюдотворца Антиохийскаго. аще ли речете яко сия не вся обретаются в житии святаго Мелетия. яже вообразихом нам то не равно. обычай бо той сатаны льстиваго, еже изтребляти истинну от божественных писаний а влагати лжу. той и отсюду сиречь от жития святаго Мелетия. еретическими языки вылизав, некую хулу составляет, не могий зрети на силу креста Господня. но сия вся яже прочтосте истиннаго суть прежде бо многих лет, тако прочтох писание. тако слышах глаголанное, тако держу до седин моих. с тем умираю на вск день. с тем стати имам пред страшным Судиею Христом моим. то похулити несть мощно никомуже от человек, разве ненавидящих креста Господня. согласует бо во всем с божественным писанием и со святою верою христианскою. и со символом православныя веры, инии же паки суть воображают крест на лицах своих странным законом, начинающе от Авраама, еже глагола Господь ко Аврааму: яко благословятся о тебе, и о семени твоем вся языки, и прочее. и насилуют воображати крест в пяти перстах, именем Исуса Христа литеры воображающе словенскаго языка, персты своими. и тако усилуют благословляти вся языки словенскаго языка литерами. Егда же вопрошают их которыми литерами благословляху тогда, егда не бе литер словенскаго языка. а вся языки благословляху; подобает ли тако яко глаголете литеры в перстах слагающе, их же несть мощно вообразити в перстах живых рук человеческих; Аще бо восхощеши в перстах учинити литеру слово, то несть мощно, разве учиниши крюк. у слова бо два конца, а у перста живаго един. аще восхощеши учинити хер; то несть мощно. разве учиниши ик. у хера бо четыре конца, а у перстов два конца. а егда восхощеши учинити литеру, I. и та бо два конца имать. а перст живый един, а титлом без которых несть мощно прописати имени Исуса Христа. не спрашивай у них прилога ради иже ко Исусу только пальцы отсечь, а тех перстов не будет не достанет и сложения благословящей руке по вашему. О горе пияным философом. паки аще вся языки тако подобает благословляти по вашему; то прежде по еврейски, по гречески, подобает воображати в перстах живыя руки человеческия. Потом по еллинскому и польскому языку, и во иных иже суть на земли всех 72 языка. и по вашему мудрованию всех их языками слагающе литеры в перстах рук человеческих благословляти. еже срамно есть и воспомянути, но понеже оне срамляхуся сицевых догмат людем не пияным предавати. несть мощно нам непияным сущим, за сие с ними не боротися. разве аще вознебрежем о истинне. где бо и когда сице, от начала веры, даже доныне в перстах рук человеческих выламывало в церкви на сие дело разве зде ныне в России. но да открыет нам Бог иже глаголет во откровении Богословли: се дах пред тобою двери отверсты и никтоже может затворити их. яко малу имаши силу, и соблюл еси слово Мое, и Аз тя соблюду от часа искушения хотящаго приити на всю вселенную. время бо то прииде, Той бо истинный да открыет нам крыемое вещи сея. понеже несть мощно вообразити им литер по их хотению. ниже бо когда воображения в перстах рук человеческих могло быти. сии же усилуют нуждею предаяти та, яко да всех народов в римскую приведут прелесть. да вси поклонятся пестрому зверю, сиречь, римскую папежу. приимут и того развращенныя догматы, наченшу от хуления на Святый Дух. и развращенная знамения креста Христова на лицах християнских. еже римляне развращенно опак воображают. и еже припевати ко органом, аще еще и не внесоша их в церковь. и еже сливати лица Святыя Троицы поюще богохульно глаголюще, Отца и Сына сливающе во едино лице. а Святаго Духа раболепно оставляюще глаголют, благословим Отца Сына и Святаго Духа. потом отъемлюще литеру, иже и змежду Отца и Сына и ко Исусу прилагают с лестию. да человечество Сына Божия разделяют во ин состав от Божества глаголя: да будет ти милость велика от Бога Спаса нашего Иисуса Христа. потом глаголют, и паки един свят един Господь Иисус Христос, и прочая иная развращенная глаголют, и поют. и их же никогда же знаяше церковь Христова, ея же врата адова не одолеют во веки, по словеси Господню. и не требует никакова исправления. того ради яко непогрешити может. исправления требует, непреклонну бо и недвижиму, тоя утверди Христос своею святою кровию, и в ней живет, и в ней царствует. и царствию Его несть конца. сугуб бо есть по естеству, сугубо и царствует. и божественному бо Его величеству не бе числа. тако и конца не будет, еже со Отцем и со Святым Духом. а по человечеству ныне царствует, и царствию Его не будет конец. дондеже положит враги своя подножию ног своих. яко же Павел мудрствует. и тогда будет Бог всяческая во всех вся по апостолу, и тогда будет едино царство Отца и Сына и Святаго Духа. и того ради нам заповеда Господь наш Исус Христос, просити молящися глаголя. да приидет царствие Твое, да будет воля Твоя, яко на небеси и на земли, не подобает нам последовати отступником в их прелесть. иже искупльшаго их Владыки отмещутся, и приводят в скорую себе погибель антихриста имети. сатана действует ухищряюще лукавыя догматы, купно с жидами. да отведет разумы человеческия от распятаго за ны Господа нашего Исуса Христа. да возглаголют хулу на дрожайшую кровь Его Спаса нашего. и того ради вся ныне поучения в людех в законе Моисеове, и во пророцех ветхаго завета. яже вся сия до Иоанна по словеси Господню, а святаго евангелия не хотят не токмо послушати, яко подобает християном, еллинскому блядословию учителей возлюбиша, паче апостолов Христовых, латынския догматы паче учения Христова. прочее чесо ожидати; разве да поклонятся прелести вси живущии на земли. и дадут славу зверю пестрому по писанию. О небрежению, о прелести, о плотскаго мудрования. еже враждует на Бога, слыши небо и внуши земля глаголы рабов Христовых, им же несть уже где главы подклонити. везде гоними отвсюду изгоняеми, их же живых убо ненавидят. а по смерти мертвым покланяются, и без пользы почитают, и зиждуще гробы пророком, украшающе раки праведных. они же вопиют к Богу глаголя, доколе Владыко святый и истинный не судиши и не мстиши крови и гонения нашего от живущих на земли. но сия вся взыскана будут праведным Судиею вскоре. не коснит бо Господь по апостолу, яко же неции коснение мняху, но грядет скоро, не бе доволен сатана в крови святых апостол и святых мученик. но уведав в божественном писании яко развязан бысть от темницы на время, да льстит языки [Апок. глава, 20]. и начат прельщати люди обычаем древния своея злобы, яже в раи бысть. и уведал что глаголет апостол Павел ко евреом (зач. 303). яко многочастне и многообразне древле глагола Бог ко отцем пророки напоследок же дни глагола нам Сыном, Его же положи наследника вскм, Им же и веки сотворил. начат и той скрыватися яко же во змию иногда. ныне же в персты рук человеческих, скрывши в них хулу на Святый Дух прельсти род християнский. аще возможно будет и избранныя; но молитвами святаго Мелетия, да избавлени будем таковыя прелести. сей бо нам сказа яже от ариан хулу, не точию на кресте; но и самыя Святыя Троицы таинство. сей бо вообрази сложение истинно християнских перстов, показа бо соединив, или совокупив три персты, да покажет в них неразделимо единство Святыя Троицы. посем два совокупив, и един пригнув и благослови люди, и прочее. яко же напреди речеся. а противнии глаголют, яко показа Мелетий три персты, разно стояща особь койждо, потом два совокупив, един пригнув, и благослови люди, и прочее. кая зде вера. где образ неразделимыя Троицы юже не образуют. но разделение показует. отнюдуже несть образ веры християнския; но еллинския многобожия еже глаголют. два от трех совокупив, и третий ко двум пригнув благослови люди. где равенство, почто два совокупив, а третий оставляют. кая зде вера образуется разве римская. зри всяк яко не могуще словами боронитися от божественных писаний. за ересь хуления на Святый Дух скрывают хулу в перстах рук человеческих. да покажут в преидущее время в перстах, яко Дух Святый от Отца и Сына исходит от двух третий еже и печатным книгам присовокупиша. да крепко держано будет, а не хотевших приимати таковыя их прелести многих изгнаша, многих уязвиша, многих умертвиша. им же мзда будет на страшном суде Христове в день судный. а еже воображают на лицах своих литеры в перстах IС XС, воображающе и имя Господне вообразити усилующе. яко же речеся, сии со мною яко небрегоша глупейших людей вас паче пияных, еже туман во очи пущати, и на левое рамо прежде возлагати крест. а литерами глаголати суис слово латынское. а еже сказуется суим римским языком да покажут яко правая рука благословляет крестом церковным; а левая своим римским, глаголю опак на левое рамо. а егда вопрошают их, силы такова знамения: отвещают, яко того ради возлагаем прежде на левое рамо, яко Пан наш прежде вступил до пекла. а потом до неба. а более глаголют мудрствовати не велит нам костел римский. О плотскаго мудрования еже враждует на Бога. яко рамена человеча стоят равно, а небо с пеклом не равно стоят, но несть мощно сего толковати прежде збытия дондеже сами возглаголют о своей сей премудрости. не мощно не глаголати всякому ощутити, яко не токмо вся ереси и крещение всех еретик прияша, но и сатаны отрицатися, и на сего плевати на крещении не велят; а последних времен и последних прелестей антихристовых воспомянути не хотят, точию не смеют. аще явно глаголати, яко ничто же будет и не силна яко же Христос глагола во евангелии купно со жидами мудрствуют, яко еще не прииде Христос. но приидет. тако бо уже и поют яко же прияша от прелести глаголя. пою Тя слухом Господи услышах и убояхся. до мене бо идеши, мене ища заблуждьшаго, и прочая. может ли християнин тако мудрствовати; или тако пети; еже до мене бо идеши мене ища заблуждьшаго. Христу пришедшу антихриста поюще, антихриста и ждут. а истиннаго Христа Бога нашего отметаются; церковь бо Христа Бога нашего поет глаголя: пою Тя слухом Господи до мене бо пришед, и мене ища заблуждьшаго, и прочая. или еще глаголют хульницы яко не подобает приимати пресвятыя Богородицы в число родов четырех надесять. аще и евангелист прият или биением им обезчестити Спасову непорочную кротость оболгающе; или еще даде Христос Петрове мзду велию, еже на нем создати церковь, да исповесть Его Сына Божия. или иная безчисленная хуления в новых книгах положенная. о них же нелепо есть глаголати истинну, речение святаго евангелие. аще ли же ни то исполнится божественное писание. скоро еже глаголет день Господень яко тать в нощи приидет. егда бо рекут мир и утвержение, тогда абие нападет на них внезапу всегубительство; ему же несть мощно сбытися. егда вознебрегут прежде о растлении божественных писаниих и церковных догматов. и приемше лесть за истинну изтребят из церкви всяку истинну рекут мощно нам мир и утвержение, и тогда нападет на них всегубительство по божественному писанию. но да взыщет яко же глаголют нам мощно ли неравенства ради перстов погрешити в разуме вещи сея, или ни; аще бо и не равны устроил Бог у руки человеческия. но равныя возмем сподобил чести ни долгота бо ни дебельство не возвышает в лучшее. ниже тонкость смиряет коего от них, на и сопротивных бывает бо в человецех яко мний плотию презвитер от пономаря долгаго почитаем бывает. такожде и господин мал телом от большаго раба не токмо почитаем, но предстояти себе велит со страхом. а раб велик сый послушает его. тоже обрящеши и в Давыде с Голияфом. тоже обрящеши разума полон весь мир, яко не многоплотное величает, не и меншое смиряет. отнюдуже должни суть по немалом что изтрезвившеся отврещися сего своего от перстов суемудрия, а повинутися чудотворному совокупления святаго Мелетия. не хотят о сложении перстов. Пролог февраля 12 день. Скрыжаль лист 807 и 808, и 809, 812, 813. и до конца. не точию но и патриарх бывает менши диякон возрастом, но честию всегда бо той повинуется патриарху. а в перстах ни единаго с другим обрящеши равно. но вся пять равну честь имут. А еже глаголет писание болий быти в вас да будет всех менши, того противнии дуси слышати не хотят, точию да сокрыют лести непрощеннаго нечестия, в сложении перстов. а еже писание глаглет, яко плотское мудрование вражда на Бога, закону бо Господню не покаряется, ни может бо. сие смех им есть, и ругательство. нам же мнится страшнаго сего прещения ничто же быти может. яко мудрование плотское сице вводит во отчаяние, яко несть мощно уже воззрети к Богу, и закону Божию покоритися что дивно яко хулят или от истинны отвращаются; или к басням уклоняются, или лести составляют; не брегуще о святом евангелии, им же бо несть тем кто будет; разве сатаны льстиваго. той бо видя душу в непрощенном нечестии погибающу, поемлет яко свою, и действует яко свое научает хулити Бога, научает смущати Церковь Божию, покорно вводящи всех християн в непрощенное нечестие, сице, яко ниже кровь мученическая очистити не может, сего нечестия. Еже рещи слова на Святый Дух, и смущати церковь Божию: где покаяние; о глубина бездны нечестия. о вражды горее жидовския, но и легеон демонский получи милость от Бога. и аще бы хотел каятися. негли получил бы и оставление. А сие непрощенное нечестие еже рещи едино слово хульно на Святый Дух прежде страшнаго суда, суд приемлет. яко не оставится ему ни в сем веце ни в будущем. зри всяк со вниманием бездонную сию глубину погибели, яко суета есть вся яже надежды в покаянии, не токмо бо слезы не суть достойны и полезны. ниже рыдание, но ниже мученическая кровь пользовати может похулившаго единою. всеми соблазны и всеми грехи обремененных призывает Господь на покаяние. от сего же непрощеннаго нечестия заключи Господь всякое оставление в сем веце, и в будущем. а еже нецыи ласкают друг друга надеждею покаяния уже да во отрадовании поживут. тии сами узрят, реченное; небо и земля мимо идут, а словеса Господня не имут прейти.

Аминь.

Слово, 2.

О Святом Дусе Господе истиннем.

якоже речеся мечь духовный глагол Божий.

а иже похулит Дух Истинный,

сие непрощенное нечестие ни в сем веце ни в будущем.

чтый сия со вниманием мечь духовный глагол Божий.

О христолюбцы! взыщите истины. Бога ради истиннаго; взыщите Истиннаго! крови ради Христовы. взыщите Истиннаго! кого сия не подвигнет ко взысканию взыщите своего ради спасения, да не прельстимся, мощно ли кому любити Христа; отметаяйся словес Христовых; аще мощно; научите мя. аще ли же ни не отметайте, отметающиися приводят себе скорую погибель по писанию. кая уста сравняются со Христовым. испытайте писания. аще обрящите, научите мя ащели же ни не отметайтеся. кое слово сравнится Христову слову. кая богословия уподобися Христовой богословии. Аще обрящете, научите мя. ащели же ни не отметайтеся. кто свят явися не прием святыни от Истиннаго; кто явися праведен не прием правды от Истины. Един есть Истинный иже ни от кого же прият истинства, но сам по своему естеству истинный. сего ради Христос истинный Бог наш, богословствуя о равночестном и соприсносущном Ему истинном Дусе, глаголет сице; егда же приидет Утешитель, Его же Аз послю вам от Отца Дух истинный, иже от Отца исходящь. кая честь сравнится хвале сей, еже есть Дух истинный иже от Отца исходит; всякое слово похвальное приглаголуется и твари но никтоже во твари истинный есть. приимет от Истинна по достоянию кожде а не по естеству. сего ради никтоже есть истинен собою. токмо един Бог Святая Троица сиречь един есть Отец Бог истинный, и един есть Сын Бог истинный, и един Дух Святый Бог истинный. Его же аще наричеши Бога, а не приложиши истинный. то ни что же рекл еси к похвалению истинныя славы Его. аще же наречеши Его Бога, нарицается и тварь. аще наречеши царем, нарицается и тварь. аще наречеши Господем, нарицается и тварь. аще наречеши животворящим, нарицается и тварь. но никто же от сице нарицаемых истинный есть. и того ради нарицается Дух истинный. яко ни от кого же прият величества, но сам по своему естеству велик есть, и всем тварем дает живот и дыхание и движение. вся бо тем живут и движутся, сам же Той ни от кого же величества приемлет, но сам по своему естеству велик и истинен есть. того ради непорочными усты истиннаго Сына Божия нарицается Дух истинный, иже от Отца исходит, что сего наречения более на небеси и на земли. взыщите, аще обрящете научите мя. аще же ни не отметайтеся словес Христовых. страшно бо глаголет Господь. аще пребудите в словеси Моем, воистинну ученицы Мои будите и разумеете истинну. и паки; аминь, аминь глаголю вам, аще кто слово Мое соблюдет, смерти не узрит во веки. а отметающийся Мене, и не приемляй глагол Моих. имать судию слово еже глаголах то судит ему в последний день. и паки, всяк преступаяй и непребываяй во учении Христове, Бога не имать. Оле глубины погибельныя, яко преступления единаго словеси Христова не имети Бога. и сочетану быти еллином по писанию. где суть глаголющии яко святии отцы в символ истиннаго не вложиша. да скажет нам, коея ради вины не вложиша. или коим разумом. како преступили слово Господне. пророк бо пророка не послушав преступив слово Господне токмо хлеба вкусив, и воды испив, тамо идеже повеле Бог, зол явися и убиен бысть от зверя. а ратующиися с Македонием святии отцы за честь истиннаго, и в символе Истиннаго не вложити, дивно есть прочее. скажите ми отметающиися истиннаго. коея ради вины не вложиша святии отцы в символ православныя веры истиннаго. или не вероваша тако, яко Христос рече, или не ведяху о сице страшном запрещении, на отметающихся словес Христовых, или грамоте неумеяху. прочее скажите. аще же скажите, яко не вемы, то ударяетеся по лицу срама ради вашего прежде суда Христова. несть бо тяжчайшаго греха, яко похулити Духа Святаго истиннаго в символе не исповедуем то явися хула. отъемляй бо честь истиннаго, како не хулит. и не хотяй бо хвалити токмо хульник есть по словеси Господню. иже рече несть со Мною на Мя есть, и иже не собирает со Мною расточает. сего ради глаголю вам. яко всяк грех и хула отпустится человеком, а на Святаго Духа хула не отпустится человеком ни в сий век, ни в будущий. жестоко Македонию противу рожну пратися, преможе Христос со святым евангелием вся глаголы противныя. и языки велеречивыя. открывается гнев Божий на всяко нечестие и неправду человек, содержащих истинну в неправде. не первая то напасть на церковь Божию из врат адовых изниче. но Истинный глаголет яко врата адова не одолеют ей. аще бо и непрестанно враг ратует церковь Христову, реки испущает от уст своих да потопит ю но земля работает и творит повеленная. прочеее вопрошаю, как мощно бе преступити святым слово Христово. и не исповедати Истиннаго и не вложити в символ предающе его всему исполнению церковному, и исповедати яко же символ глаголет. и сице не вложивше в символ по словеси Христову истиннаго. и явитися преступником учения Христова, научите мя. аще несть мощно: то не облыгайте святых. страшно бо писание глаголет, яко будут даны зверю уста хульна глаголати на Бога и на святых Его. и отверзе змий уста своя в хулении к Богу хулити имя Его и селение Его, и живущая на небеси. и паки, ища учения от вас вопрошаю. кто в кое время приемше символ без истиннаго, и смеяше приложити истиннаго; несть бо мощно утаитися коему собору, ни времени его. ниже имени наченшаго сие. аще же ни сего весте. то аз вам скажу. кто начат изметати истиннаго от символа православныя веры, и в кое время, и кто по имени и коим разумением. хула бо сия не менши Македония. но и много больши. он бо явно хуляще Дух Святый истинный, глаголет тварь быти того. а не единосущна Отцу и Сыну. они же ныне с помраченою прелестию содержаще истинну в неправде глаголют яко веруем в Духа Святаго Господа истиннаго иже от Отца исходящаго, но несть нам мощно исповедати сице, зане костел святый Римский едино отмещет а другаго не приемлет. а мы унеяты тому повинуемся. несть бо мощно тому блудити в вере, еже он приложил мы приемлем в церковь свою. да сохранит Христос от таковаго раздора, един бо Господь, и едина вера, и едино крещение. и от избытка сердца уста глаголют по словеси Господню. в 2-й главе Откровения Богословля, глаголет бо Дух Божий. и прииде ангел с небесе, имея ключь бездны, и уже великое в руце своей, и ят змию древнюю, иже есть сатана и диявол. и связа его на тысящу лет, и в бездну вверже его. и заключи его и запечатле его над ним да не изыдет оттуду дондеже скончается 1000 лет, да не льстит народов. по скончании же 1000 лет подобает ему разрешену быти на мало время, да льстит народы. кая сила словеси Его, и что есть еже связану быти дияволу на 1000 лет да не льстит народы. и паки развязан бысть на мало время да льстит народы. Оле тайны, яко по связании сатанином явишася престоли и седящии на них, и суд дан бысть им, и прочая. по скончании же тысящи лет, искочив из бездны отторже хоботом своим третию часть звезд небесных, еже есть отступление от веры, звезд церковных. и даде власть свою и престол свой зверю пестрому. по скончании же шести сот лет, паки ухитри по действу сатанину лукавый. второе отпадение от веры звезд церковных. и паки по скончании шестидесяти лет ухитри враг третие отступление от веры звезд церковных. прочее же что по шести летех явися не вемы, а предшедшия три отступления ухитри враг поставити яко да вси отступающии от веры погибнут в непрощенном нечестии, сиречь в хулении пресвятаго и животворящаго Духа Господа истиннаго. в первом бо отступлении похулиша Дух Святый истинный, глаголя Его быти рождение от Отца и от Сына. во втором же отступлении похулиша Дух Святый истинный отвращающеся истинства Его. да не исповедан будет в символе истинный. в третием же отступлении от веры похулиша Дух Святый истинный со оболганием святаго вселенскаго собора. яко забыша святии отцы вложити в символ истиннаго и не точию сие реша. но и все вселенския соборы похулив отвергоша. и вместо их своя новоухищренныя седмосокраментов римских ввести в церковь усилуют. по совету вогнездившеся на западе, иже тогда устремитися ему развратити где благочестие есть. ведый немощь свою, яко врата адова не одолеют церкви Христовой. посылает единых предотечей с прелестными ухищрении, еже хулити Дух истинный. а других посылает воздвигнути внешнюю брань со окрестными, да убиют друг друга, да проходит мечь да развратится ум, да раздвоится совесть в людех. наипаче же во владущиих над людьми. яко да аще и ощутят благочестие от супостат вреждаемо, но не возмогут противу стати им ратным на них нахождения. губитель же рода человеча, и враг веры Христовы. ведый яко время мало имать, грех ради наших Богу попущающу. он всеми силами, и всем своим злокозненным советом усилует. абие единым стремлением отъяти у християн веру, и крещение, и священство; и егда видит яко за сие ратуются божественным писанием и не отступают. тогда абие тщится веру истинную повредити прилоги еретическими, да не познают вернии, но да прельстятся. яко же и прочии отступницы от истинны во лжу. такождеже и крещение истинной едино ведый в церкви Христовой просвещающее тщится отъяти, но не могий. ухищряет соединити с еретическими прилоги, да не познают вернии, но да прельстятся приемше проклятых крещение. подобно же и священство, егда видит от Христа в нас действуемое возложением рук Христовых на апостолы. и от тех даже до нас, без пресечения по преданию святых седми вселенских соборов весь мир просвещающаго, тщится повредити. то все приводит, да приимут вернии и да повредят истинное ложным примешением. да впадут во извержение по страшному святых отец преданию. приемый крещение или жертву еретическую сам неосвящен. ничтоже бо хощет Христос общее имети с велияром. такожде же и церковь Христова, ни мало ни велико ниже аще бы точию подвигнув что кто от еретик изветом и исправления, то все буди анафема во християнех, да не повредится истинное приобщением ересей. весть бо вселукавый страшное слово Господне мир весь осуждающее, яко Духа Святаго не может прияти. яко не видит Его. тем же горе отметающимся истиннаго. и злоковарным советом святых соборы облыгающе, невложением в символ истиннаго. Его же мир не может прияти, а святии бо за истиннаго на смерть себе предаяху. да с миром осуждени не будут. Оле небрежения мирских разумов. како не ощущают вражия злоковарнаго совета, иже поставляет вражду между евангелием и святым вселенским собором. отступницы бо от святых соборов, обтицают море и сушу. ищуще да отвратят весь мир и род християнский, от святых преданий, еже церковь святым евангелием единою верою запечатле. ризу носяще истинну исткану от вышняго богословия, и справляет и славит благочестие великое таинство. ненавидяй же истинны отвращается сам от истинны, и прочих научает отвращатися от истинны точию не явно, но еще глаголют сомненно, и прикровенно и прелестно прельщаеми. а главное уже давно деется отступление от истинны. уже бо совершенно отвратишася, и мало не равняются богоубийцом июдеом да рекут горее тех по реченному: лучше бы было им не познати истинны, нежели познавше отвратитися от Истинны. О люте миру, иже не может прияти Духа истиннаго. и не точию не приемлют но и метутся глаголя. не подобает быти глаголанну аще и веруем во истиннаго [Скрижаль лист 822]. О человече воспомяни что глаголаши, доколе терпит ти Истинный, аще бо сам веруеши во Истиннаго, то кого ради сице слагаеши; по тебе сущии откуду научатся веры, разве от символа. но ныне крещаемии како глаголют без истиннаго, идеже бо несть истинны во крещении; то кий будет. явно бо глаголет Господь, яко Духа Истиннаго мир не может прияти, яко не видит Его, ниже знает Его. иже бо не приемлет в символе Истиннаго по словеси Господню. иже несть со Мною на Мя есть, иже не собирает со Мною, расточает, тем же несть мощно рещи верую но токмо в символе не приемлю. кто сие слово приимет кроме прельщенных, тии бо друг друга тешат боящеся да не от сонмища или чести мира сего изгнани будут. а истинное верующему невозможно инако исповедати, инако веровати, инако же в символе полагати. весть бо верный реченное слово, яко открывается гнев Божий с небеси на всяко нечестие и неправду человек содержащих истинну в неправде, в хуление Духа Святаго Господа истиннаго. не имать прощения ни в сий век ни в будущий. прочее вопрошаю вы изметающих от символа истиннаго. како чают, и како ждут скончания века сего, и жизни будущаго века. и паки грядущаго со славою судити живым и мертвым, его же царствию несть конца. прежде ли ждеши чаемаго страшнаго суда Христова, или инаго чего прежде суда Христова по писанию. аще речеши, яко подобает быти прежде отступлению. посем подобает явитися сыну погибели противнику превозносящуся паче всякаго глаголемаго Бога, или чтилища. и яко сести ему в церкви Божии аки богу, и показати себе яко бога во всяких знамениих и чюдесех ложных. посем того убиет Господь наш Исус Христос духом уст своих, и упразднит явлением пришествия своего по писанию. то добре рекл еси. но сему удивляюся, яко ждеши прежде отступления, ниже ищеши и небрежеши о отступлении. неужели бысть отступление, аще уже бысть то где бысть, да не прелестию уловят нас, да не впадем в сети его. да не отступим и мы от Бога с ними. да не отвратим слухи наша от Истинны, да не уклонимся к еллинским басням по писанию. люто бо сказует последних дней отступление. яко поклонятся зверю все живущии на земли. и приимут начертание на челе и на десней руце их же имена не суть написана в книгах животных. аще же ощутити отступление по благодати Христовой где бысть; и в кое время. то помысли, како подобает отступившим от веры прочих прельщати, и от веры отводити, да с собою вовлекут в вечную погибель, многими образы, и многими образы и многими разньствы, и многими ухищрении. и многими лестьми сице, яко прельстити аще возможно и избранныя, по словеси Господню. да уготовится путь врагу хотящему весь мир прельстити, и сести ему в церкви яко богу. что есть реченное, како сести ему мощно в церкви Божией аки богу, не будет бо ему мощно сести, донележе Христос в церкви пребывает. внегда же Христос из нея изыдет. тогда он своея лести распространит, не благоволит бо Христос ничтоже общее имети с велияром донележе бо не приимет человек верен догмат лукаваго от прельщенных; никако же Христос отступит от души его, ниже той смеет прикоснутися, тамо идеже Христос живет. такожде же и книги приемшия лукавыя догматы оставляются от Христа, и противный теми действует и ратует церковь Христову. да аще и едину книжицу видит супостат в церкви неповрежденну, сиречь неприемше развращеннаго догмата, не внидет тамо, дондеже изнесена будет прельщенными. опаляетбося Истинною, еже не мощи ему внити тамо идеже Христос пребывает. но сия вся действует враг со своими угодники малыми антихристы, сиречь предотечами его. его же пришествие хощет быти по действу сатанину, еже отвести от Бога весь мир лукавыми догматы, сице яко нашими же книгами нас же обличати будут. лжуще на Христа и святое евангелие. лжуще на святых апостол, лжуще на святыя вселенския соборы, лжуще на святую соборную и апостольскую церковь. а книги их тогда, точию имя соборных святых книг содержати имут. а по истинне все лукавства исполнени будут. то бо будет дело, и ныне есть лукавых предотечей, еже истребляти от книг истинну, и влагати лжи помраченную тму. и яко же рехом, всяку святыню имать повредити. наченши от веры, и крещения и священство, и знамение честнаго креста, и честных икон благоухищреннаго начертания благоискуство. и святых книг превращение ухитрит. и нравом христианским писаных и держимых по преданию святыя соборныя церкве руганием дерзнув осмеяти вся та из книг изметающе, а своя небывалая в церкви влагающе и с еретики соединяющеся, и веру их и крещение и священство приемлюще. и теми своими делы всякаго християнства по святым правилом себе лишающих, и лукавому себе присвояющих. и сице всемирной их прелести, антихристу путь устрояющих, и мнящихся быти християне, погибают в небрежении, работающе чреву и сластем мира сего ругающеся благочестивым християном, и нехотящим приимати их лукавых нововводных и богомерских прилогов, и превратов. глаголют како можете разумети неведущи многих разных языков. ниже риторства, ни философии учащеся. ваше дело приимати то, иже мы страждущем, и нам дана власть знати в словесех силу, что приимати от божественных писаний, и что отметати, да не пременится наше предприятое, донележе вси людие будут едино стадо, под единым пастырем, прежде скончания мира. егда же рекут благочестивии, яко не знаем кроме единаго, разве истиннаго Спаса нашего, Той нам есть пастырем Начальник ныне в день века, иже есть и будет. а еже глаголете вы быти исправлению прежде скончания мира. и единому пастырю, то словесем Господа нашего Исуса Христа противне. глаголет бо Господь во святом евангелии, егда приидет Сын Человеческий обрящет ли веру на земли. и яко же бе пред потопом ядяху и пияху женяхуся, и прочая [Лк. зач. 87,88]. и егда рекут мир и утверждение тогда нападет на них всегубительство [к солун. зач. 275]. прелесть бо последняя не исправлению виновна быти глаголется. но всегубительству, и от Бога отчюждению, и к сатане присвоению, яко же глаголет писание. и поклонятся зверю вси живущии на земли, их же имена не суть написана в книгах животных, но никто же от прельщенных речет, яко прельщен есть и яко прельстихся, яко Бога похулив, яко еретическую похвалив веру аще и арианин кто будет, аще македонянин, но еще и хвалится глаголя. яко християнин есть. яко благочестив, яко величаю Бога яко Христа почитаю. яко евангелию покаряюся, и апостолам повинуюся, и святых почитаю. что сия глаголы возмогут ему в день Господень имущему в вере богохулныя догматы. единою бо проглаголав лукавый догмат и возлюбив его, все христианство похулив есть и единою похулив истиннаго и пребывает держащеся хуления, како может похвалити Истиннаго. несть бо мощно от единых уст происходити хуле и хвалению. похуливый аще и хвалит во иных Бога, не приимет Бог хвалы его по реченному. всяк имеяй в себе ересь и хуление; чюждый Христа является, и всуе Христа имеет, по реченному: не всяк глаголяй Ми Господи Господи, внидет в царство небесное. но мнози услышат не вем вас. евномиева бо ересь менши всех зрится. зане во едино погружение, точию крещают со елинны осуждаются по святым правилом. а хулники на Святый Дух где явятся непрощенным бо нечестием недугуют. и несть им части ни жребия во кресте Христове, ни во смерти Его, ни в воскресении Его. отрицающиибося перваго воскресения. како второе возрадуются. блажен бо рече и свят иже имать часть в первом воскресении. на сих бо вторая смерть не имать области, и прочая: не глаголю на каникулы, не глаголю рече мы веры еретическия не приемлем, но крещения их не отторгамся. потому что крещают во имя Отца и Сына и Святаго Духа. тако же и священства хиротонию незаглажену имут. Оле безумия омраченных, како глаголете веры не приемлем, а крещения не отвращаетеся. у него же вера зла, како крещение добро может быти. такожде и священство. аще бо рече будет в дому сын мира, то почиет на нем мир ваш. ащели же ни, то к вам возвратится глаголет Господь. и всяк епископ или презвитер приемый еретическое крещение, или жертву, абие не священ. и чюжд християнства, по правилом святых отец. апостол глаголет, едино бо есть Господь, едина вера, едино крещение. тем же несть мощно обрести другаго Бога разве единаго. аще и мнози суть глаголемии бози по апостолу. но един есть Истинный. а глаголемии ложни суть вси. такожде же и вера едина есть истинная. а глаголемии ложнии суть вси. такожде и крещение едино есть истинное. аще и мнози суть крещения глаголемая, но едино есть истинное. а глаголемии яже от еретик все крещения ложни суть и чужи християнства. тако сатана вас прельстил не знати ниже взыскати истинны. Кто Бог есть разве Единаго живущаго в Сионе. кая есть вера, разве единыя положенныя в Сионе, и кое ино крещение, разве единаго истиннаго положеннаго в Сионе, и коим разумом богословия велит нам знати едино истинное крещение, а не разньством разума. всяк бо иже не знает единаго истиннаго Бога во Святой Троицы единаго Бога, еллин есть по своему злочестию. и всяк не знаяй единыя истинныя веры яже во Святую Троицу единаго Бога, еллин есть по своему злочестию. и всяк не знаяй единаго крещения, еже есть во имя Отца и Сына и Святаго Духа во едино Божество, а не в ересь не во Ариево злочестие, ни в Македониево злочестие в вере, чужд християнства. како может благочествовати в крещении. како снидет Просветитель. како послужит вода рукам вражиим. всяк бо зловерный враг есть стихиям. аще и повинул есть Господь суете тварь неволею, воздыхает и болезнует, чающе свобождения, да не работает врагом Божиим по писанию. истинным же точию другом Христовым истинно во Святую Троицу крещающим с радостию работает тварь. ащели же кий любо буди от еретик крещает глаголя во имя Отца и Сына и Святаго Духа. не верует яко Святая Троица есть Отец и Сын и Святый Дух. Бог един есть и равночестен и единосущен и сопрестолен, а не два ниже три бози яко блядословят еретицы, ариане, и македониане, и прочии. или яко новыя македониане непрощенным нечестием недугующе хулницы Святаго Духа Господа истиннаго. к таковых действу не снидет благодать, но добре глаголют святых отец правила. яко еретическое крещение несть крещение, но осквернение. и помоливыйся с еретики чюжд будет христианства. помоливыйся бо с еретики свою молитву глаголя, а не еретическую. но понеже тех молитвам приобщил есть свою молитву, и того ради отвращается Бог не точию молитвы но и християнства его, множае паче гневит Бога крещение от еретик, яко еретицы суть крещающии во злую свою веру, крестят хуляще Бога во Святой Троицы единаго. какова их есть вера мерска Богу, тако бо и крещение, нань же никогда же призрит Бог, ниже действует но яко же еллинов и июдеов отвращается Бог. такожде и священство, но мерзость запустения видяй бо враг разнословия погибель человеческую равно есть что еже от церкви отпасти и в ересь уклонитися. сице и от еретик что приемшему чюжду быти христианства не могий кого привести к себе в ересь, какову любо буди, то сам глаголет приими мя с моею ересию. и злоковарным советом. ухищряет слово яко крещенный от еретик некрещен есть, и освященный неосвящен есть. и теми злобами двема злоковарно настоит, истребити истинное крещение, и истинное священство. да лестию введет в злочестие, и ухитрити свою мерзость запустения по писанию. но горе приемлющим от злоковарных крещение, или священство. и лучше бы им не родитися, сиречь умрети во утробе матерни. прочее умолчю нежели соблазнити сим единаго от человек. а иже глаголют яко римляне яко не суть прокляти, не бе бо тогда их ереси. егда святыя соборы еретик проклинаху. да ведят вси таковии, яко римляне отступили от веры в последняя времена. близ пришествия антихристова, и кая ересь той ереси сравнится в злобе. зане вся ереси прежде бывшия ухитрил враг, да отведет от Бога верных християн в злочестие бесовы, а не сам собою, бе бо связан тогда да не льстит народов дондеже скончается 1000 лет. по скончании же 1000 лет развязан есть по писанию на мало время, да льстит паки народы. и абие искочив из бездны, отторже хоботом своим папежем римским третию часть звезд церковных. и поверже их на землю, сиречь под ноги своя, еже владети ими сице преждебывшия ереси привлачит к римской яко всем повинутися той во свое время, и быти всех ересей приятелищу невозбранну и приимати всяку ересь не истязуя крещение ни священства. токмо единаго соединения сиречь унии с римским костелом, иже есть дщерь в Вавилоне, и град сам, седящая на звери червленном, пияна кровию святых по писанию, на мало время отступление от веры в веце сем ко идолослужению и ересем. но та вся проповеданна и обличаема беяху святыми пророки. римская же прелесть отступление самем Духом Святым Господем истинным явственно проповедана всему миру. и святаго апостола Павла глаголюща сице; яко Дух явственно глаголет. яко в последняя времена отступят нецыи от веры, внемлюще духовом льстивым и учением бесовским, от истинны слух отвратят и басням уклонятися, и во умножении льстивых словес вас уловят, и прочая. тем же римское отступление и в последняя времена збывшееся, мерзейше есть Богу всех отступления прежде бывших. зане приятелище бысть всем ересем, и всем нечистотам по действу сатанину, их же приемлюще и с теми соединяющеся является ныне всех ересей источник и бездна прелести. А еже глаголют подобницы. яко не суть прокляти римляне. аще и еретицы суть, но сии глаголют не ведуще писания, ни силы Божия в них. и вся бо ереси хулят Святаго Духа явно, и без прикровения, яже мощно ощутити многим и отвратитися. А сии помраченною прелестию врази суще наши, подражают нас, присвояюще благочестивых нарицают раба быти Духа Святаго Отцу и Сыну, но исхождению Того глаголют быти от Отца, и Сына блядословят хулно. еже бо исходити Тому от Отца и Сына рабско есть. и под временем а не единосущна Отцу, еже глаголют явно хулницы суть на Святый Дух. и явно преступницы по свидетельству Сына Божия глаголюща: Дух истинный иже от Отца исходит. римляном же приемше совет лукав еже хулити Дух истинный и прилагати и от Сына. нужда им настоит от того же лукаваго совета. еже не нарицати Истиннаго, никто же бо есть Господь истинный, токмо един Творец всех тварей видимых и невидимых. яко выше рехом, хулницы не ощущают своея погибели, ни прелести вражия, дерзают противитися словесем истиннаго Бога и Спаса нашего Исуса Христа. и аще нарицают Того Бога истиннаго а небрежением Христовых словес жидове являются, а не христиане. иже бо аще разорит едину заповедей сих малых, разорит его Господь и мний наречется во царствии небеснем, сиречь тамо мучен будет, идеже будет сатана и кланяющиися ему, осуждением мучими. и се есть мний наречется во царствии небеснем. тем же аще за малую заповедь сице страшно осуждает Господь. то коими за страшную и великую заповедь, наипаче же свидетельство Господа нашего Исуса Христа. о Святом истинном Дусе иже от Отца исходит, не смей приложити и от Сына, обоя суть сия хуления на Святый Дух и непрощенное нечестие по словеси Господню. видиши ли страшное прещение, ни ли вострепещиши всеми уды своими, яко уне есть небу и земли превратитися, нежели слову Христову пременну быти, или не приемлему быти. небо рече и земля мимо идет. словеса же Моя не мимо идут. и отметаяйся Мене, и не приемляй глагол Моих имать судию слово, еже глаголах то судит ему в последний день, коего собора хощеши, или хощеши коего суда, ищеши на римское отступление указания, или не видиши яко сам Господь прежде всех святых соборов, и прежде тех отступления осудил их есть. и непрощенным нечестием удавишася преступающе словеса Господня. страшная. кая ересь дерзнула, сице востати на отметание словес Христовых. разве римская. вси бо еретики не смеяху отвращати словес Христовых. но толкованием развращенным смущающеся погибоша. римляне же явная словеса Христова отвергоша, и отвратишася еже есть Дух истинный, иже от Отца исходит, в самом главнейшем спасении, еже есть Дух истинный. отвергошася словеси Христова, а самой главнейшей погибели еретической еже и от Сына себе положиша. к сему что речем, разве прилагающим приложит Господь язвы по писаниих. а отъемлющих отъемлет Бог часть их от книг животных. в последняя бо времена последних прелестей несть мощно обличити. кроме святаго евангелия и святых апостольских словес, и сие самого токмо сущесловия, а толкования вся развращенна суть. и того ради Господь [Лк. зач. 87] бегающим в последнее время от прелести, назад неоглядываяся велит бежати, поминающе жену Лотову. егда же Того вопросиша апостоли глаголюще, где Господи. он же рече, идеже будет труп, сиречь святое евангелие, тамо соберутся и орли. о своих бо словесех Господь страшно заповедует глаголя: небо и земля мимо идут, словеса же Моя не мимо идут. и паки, не приемляй словес Моих, имать слово еже глаголах. то слово судит ему в последний день. яко Аз о себе не глаголах, но Отец посла Мя Той Мне заповедь даде. что реку и что возглаголю, всяк преступаяй учение Христово, Бога не имать по писанию. Зде зрите отступления рачители, в киих винах обретостеся. отметающеся словес Христовых, еже есть Дух истинный, иже от Отца исходит, не мози отметати Истиннаго, не мози приложити и от Сына, не отпуститбося сие нечестие, ни в сей век, ни в будущий, по словеси Господню. июдеи бо вероваху пророком приносящим заповедь от Бога Отца. нам же не пророком, но сам Сын Слово Отчее. прием от Отца заповедь, что речет к вам, и что возглаголет. страшно запрещает нам да не отметаемся реченных ниже да прилагаем умолченных, да не з жидами часть приимем. дерзающим отметати или приложити к слову Господню судит им Бог. аще бо рече пребудите в словеси Моем, воистинну ученицы Мои будите. и разуместе истинну, истинна свободит вас. тем же несть мощно быти ученику, и не разумети истину не пребывающему во словесех Господа нашего Исуса Христа.

Ему же слава со Отцем и со Святым Духом ныне и присно и во веки веком,

Аминь.

Слово 3.

Любяй вопрошает любимаго, о избрании святых отец. и како слепии видящих водят.

Понеже и вправду то по словеси Христову.

иже бо рече, аще не превзыдет правда ваша паче книжник и фарисеи.

не имаши внити в царство небесное.

и о книжном реформовании. и о 12 сатаниных учеников.

Любяй вопрошает любимаго о избрании святых глаголя: суть ли между теми иже видят слепии. еже водити видящих. он же рече, что глаголеши, о любителю, во что потребен будет слепый видящему. и что ти бысть яко глаголеши водити слепым видящих, еже от века не слыхано. той же рече, ты глаголеши возлюбленне, яко от века не слыхано, еже слепым водити видящих. аз же того ради нарицаюся християнин, да верую во Христа и слушаю словес Христовых, иже глаголет [Ин. зач. 35]: на суд Аз в мир сей приидох, да невидящии видят, а видящии слепи будут. и сего ради вопросих тя, суть ли слепии между видящими водят видящих и поучают еже знати видящим доброе и злое, и свет и тму. и разсуждати между святыми и не святыми. и между чистыми и нечистыми по словеси Господню. аще бо не будет слепым миру между видящими, то вси слепи будут по словеси Господню. и не возмогут познати пути истиннаго. но вся будут тма, и мрак во очию их. ныне бо наста время еже разсуждати между чистыми и нечистыми, между пияными и не пияных, по словеси Господню. мнози бо от святых писаша о двою пришествию Христову, а о средостению их не мнози. и того ради вооружися сатана, и сице зелне на церковь Христову, яко потопити ю в реце, юже испусти от уст своих. аще не бы дана быша ей крыле орла великаго, да парит в пустыню [Апок. гл. 12], не бы спаслася всяка плоть. о средостении сиречь между двою пришествию Христову. созда Господь церковь свою, сице крепку, сице тверду, сице непреклонну и недвижиму. яко не жидовскому злочестию, ни еллинскому мудрованию, ни еретическим прелестем, ни бесовским кознем, ни самем вратам адовым одолети ей когда по словеси Господню. яко никогда же погрешити ей, не точию в вере или крещении или священстве, но ни в малейшем от догмат святых в чем поползнутися. но цело, недвижимо, непреклонно, и непременно держати кроме всякаго предкновения, даже до страшнаго суда великаго Бога и Спаса нашего Исуса Христа Сына Божия. но враг льстяй вселенную наусти прежде своих угодников закрывати слово учения Христова, еже знати яко церкви Христовы врата адова не одолеют никогда же и ни единому исправлению ни подлежит по божественому писанию. а потом ухитри злокозненныя догматы со разных и многоразличных ересей, обличающе церковь Христову глаголя, яко поколеблеся яко погуби догматы. яко не тако прият исперва, яко не удержа цело, яко подлежит исправлению. и под образом исправления насеяша плевела многоразличныя, посреде чистыя пшеницы Христова стада. яко многим повиноватися тех безбожному учению, и от истинны слух отвратити, и к басням уклонишася, и путь истинный похуливше, яко пси лают на непорочную церковь Христову. яко бы та имела повредити себе в вере, и символ святыя веры непорочныя, и иных святых догматов; тоя же и всецелыя врата адова не одолеют вовеки, по словеси Господню. отпадших иже единства святыя веры, и от святыя соборныя и апостольския церкви. блудяще без матере и без пастыря вне церкви Христовы, на всяко лето да тыяжде себе реформотуют на горшее, яко же и прочии, прежде отпадшии еретицы. всегда учащеся, а никогда же в разум истинный приити может. но о люте мне возлюбленне, яко капля дождевная глаголется, долгим временем пробивает камень. аз же не могу тронути совести, жестокий дух да не познает смерть свою и живот в кратких сих глаголех. мощно ли церкви Христовой погрешити в чем, или прияти что блазнено, или отметнути что от божественных писаний, в евангелии по Христу глаголющу: яко созижду церковь Мою и врата адова не одолеют ей. аще мощно в чем любо буди поползнутися, или в чем погрешити от догмат святых? то всячески мощно исправлению подлежати, то и вправду от святых учителей быти той. Аще ли же ни, то ни погрешити может, ни исправлению подлежит вовеки. а мы исправлению то приглаголуем, то несть быти от церкви, но противу церкви Христовой, и от врат адовых приемлемо. сосуды различныя да ратуют церковь Христову. а себе самем реформуют на злое еже ратовати ту. а не исправляти, та бо не подлежит ни единому исправлению, но сама вся правит, и вся исправляет благодатию в ней живущаго Духа Святаго. мощно прочести и все то слово в Маргарите, о еже предста царица, да познают что есть церковь Христова, лист 509. и да познает тоя крепость и неодоление враты адовыми. и откуду навыкнем по благодати Христа истиннаго Бога нашего: что приимати нам от глаголемых учителей, и чего отвращатися; кия словеса Христова, и кая лукаваго диявола; кая церковная, и кая адская; кая спасают, и кия погубляют. его же бо церковь Христова не прият того же и не поддержала есть за мерзость его. А еже прият того вовеки не оставит, и не может быти недейственна: ни един час, и не может погрешити ни во едином слове, ни во псалмех ни во ермосах, ни во обычаех и нравех писаных и держимех. вся бо церковная свята суть, и держание не пресечеся ни на един день. Внегда же посла сатана 12 своих учеников и угодников нарицаемых изуитов сущих во одеждах овчих одеянных в габита греческаго закона, да льстят народы земли российския. тии же абие изшедше из врат адовых римскаго отступления, наченше тогда еже служити отцу своему дияволу, и до ныне не престают. от них же прежде многих в день спущающия с нами, еще онамо хвалящеся нам ругахуся, абие в российской земли возгореся огнь рачения латынских учений. и абие вознебрегошася хранити себе от ереси, глагола: у нас вся яже от премудрых ересми нарицают, не подобает нам в том последовати, и родителем нашим. и учитися от премудрых. и тако по времени без опасения начаша погибельныя сосуды учити римским богомерским ересем наводяще хулу на церковь Христову; и посем и на самого Святаго Духа Господа истиннаго, и на крещение еже от еретик собщатися; а посем книги мерзости запустения, хулящее святыя непорочныя книги словенскаго языка, начаша писати, и правыя оставляти; а потом и печатати осмелишася, за попущением властей духовных. аз же обычное глаголю не престая, аще мощно церкви погрешити в чем, то Бог послал есть и исправляющих ю. аще ли же несть мощно поколебатися ни во едином словеси, по словеси Господню, то исправлявшии не от Бога суть, но от диявола; и не исправляют, но во адово дно отводят последующих их лукавому исправлению. в сем словеси смерть и живот есть человека. о нем же аще вознебрежем, то не убежим сети вражия. кто любо буди по словеси Господа истиннаго. глаголет бо Святый истинный Дух: вем твоя дела. яко малу имаши силу, а соблюл еси слово Мое, и Аз тя соблюду от часа искушения хотящаго прийти на всю вселенную. ты же возлюбленне, како мудрствуеши о словеси сем. будет ли искушение на всю вселенную; аще ли же ни то уже есть, аз ти глаголю и засвидетельствую, яко церковь Христова не подлежит никакову исправлению. и яко онии правители искушают всю вселенную. ныне бо и мы уже плаваем в том предреченном искушении, им же искушает нас сатана. да познает кто Божий, кто егов; и кто верен, кто неверен; и кто крепок, кто малодушен; кто держит предания, кто колеблется; кто внимает от Премудрости о прелести антихристовой, и о его всепагубном пришествии; и кто отвращается его богомерских козней; и кто ему купно со жидами путь устилает богомерскими догматы, и еретическими уставы. яко ныне выходят книги еретическими реформовании, полны злых догмат, из Рима, из Парижи, из Венецыи. греческим языком: но не по древнему благочестию. их же прелагают на словенский язык, ныне же реформованныя з горшими расколы. не токмо церковь раздирающе, но и вся книги словенскаго языка. а древняго благочестия весь язык мерзяще, отягчением превратом новосмысленных. точию Бог с нами, не имут пособия от божественныя благодати. четыре бо книги новыя меняют христиане на одну старую, то Божие дело а не человеческое. и еже претят нам муками и разореньми, то не по Христе. имамы бо праведнаго солнца христолюбиваго и свята, сиречь царя.

Но да прочее взыщем от божественных писаний, что содержит средостение между двою пришествию Христову. глаголет бо Дух Святый во Откровении Богословли: аще имать кто ум, да почтет число зверя, число бо человеческо есть, и число его 666. о сем подобает нам вопросити мнимых учителей, аще от Бога суть, да явят нам тайну сию, что число зверя, и число человеческо. аще имут ум да почтут. аще ли же не почтут, то ума не имут. и несть их премудрость от небес нисходит, но земна, душевна, бесовска. яко же глаголет апостол Ияков. и велие дивно что видевше люди последуют им: веру ли, но та развращенна; дела ли, и те независтны; любовь ли, и та не ведома никому; пост ли, за щеками носа не знать; трезвение ли, всегда руки дрожат с похмелья, а без горелки ни един час, без роскоши и без рыбы ни един пяток; а труд церковный кто свидетель. но сия глаголю не иных оглаголую. не буди то, несть бо к ним ни едино слово. зане вси отступницы единообразнии суть. но от туги сердца болезную тех, иже им последуют, и зря не видят, забыв страх Божий. яко иже кого любят с тем и часть приимут, подобни суть ученицы учителем. тако же чрева ради и вас влекут, яко учители их. не довлеет мужу праведному самому токмо добру быти: но должно есть еже от благих хваление прияти по писанию. тако погубляет и злых заступление, паче же в божественных догматех. господин ада насади древо на западе, и сам напаяет, да приносит плод сладок всему миру. его же ветвие достигоша даже до востока, и красен бе и добр в снедь, иже Адама умертвивый плод. но сей еще краснее и сладостнее зрится рачителем: хвалят родителей, любят рачители, лижут чада, сосут отрочата. но блажен иже не имать чад любящих латыню. ино бо есть еже имети, а ино еже любити. зане сию любящим западная, то невозможно не токмо любити церковь, но ниже взирати на восток, когда глаголет Господь: Аз возвращу мудрыя на запад, а свет в юродство преложу. но понеже юродство не удержа своего света, двигнет Господь светилник света своего по писанию. но горе горе мнящимся летати без крыл орла великаго.

Богу нашему слава ныне и присно и вовеки веком,

Аминь.

Слово 4.

О исполнении церковном, и о связании сатаны. и паки о развязании.

Апокалипсис. Глава 20. И прииде ангел с небеси имеяй ключ бездны, и уже велико в руце своей. и ят змию древнюю, иже есть сатана и диявол. и связа его на 1000 лет. да не льстит к тому народов. дондеже скончается 1000 лет.

О блаженная 1000 лет. в ню же враг всего мира связан бе, да не льстит народов, еже боятися человек убивающих тело за слово Божие. в ню же по связании врага, абие явишася святии мученицы, за Христа кровь свою проливающе сладце даже до смерти. посем явишася престоли и седящия на них. суд дан им бысть. разве вселенския соборы. да возвеличают святых мучеников, веру и любовь. и да скажется ими многоразличная премудрость Божия, на высоких по предложению век по писанию. ныне же глагола Дух Божий, яко же во пророцех, о седмочисленном в законе: то же глагола, и по благодати седми церквам, еже есть во Асии. и понеже едину церковь созда Христос, ей же врата адова не одолеют вовеки. седмь церквей наричет писание, или явно яко седмь врат собором, на них же едину церковь по обетованию своему созда Господь, ей же врата адова не одолеют вовеки по словеси Господню. то бо есть тело Христово Премудрости Божии, еже создати себе, еже есть церковь, и утверди столп седмь, еже есть седмь святых вселенских соборов, и заклати своя жертвенная, и прочая. внегда вострубити седмому ангелу совершитися тайне Божии по писанию. и вся сия сотворити, донележе связан лежит во преисподней враг церкви Христовой по писанию. О вожделенная святая тысяща лет, в ню же враг наш умре, а мы ожихом и царствовахом со Христом 1000 лет. зде мудрость есть, тайны сия по християнех, да не отскочит за куст кто Откровения, глаголя: како имехом и царствовахом со Хриcтом тысящу лет? егда не родихомся; и ныне еже токмо хощем царствовати со Христом тысящу лет. но сию 1000 лет нарече Дух Божий первым воскресением, глаголя, яко блажен и свят иже имать часть в первом воскресении. на сих бо смерть вторая области не имать. но о сем да не смущаешися: может всяк верен часть имети в том первом воскресении, кроме отпадших истинныя веры, еже бо царствовати со Христом 1000 лет со святыми Его. несть дивно, вси бо святии воскреснуша со Христом. и от ада свобождьшеся внидоша в рай, и тамо царствоваша со Христом. почтени суще царскими престолы. сотвори бо их тогда Господь Царя, Иерея, Богу Отцу устроив, быти единородных и единомудренных. тем купно святым богоносным отцем, иже седмь крат на земли соборы святыя составльшим, имуще над собою единаго Начальника веры и Совершителя Господа Исуса. без Него же никто же от святых ничто же можаше начати, ни совершити во святых церковных догматех. но Той сам теми сиречь, на земли же и в раи сущими святыми на святых соборех действоваше, исполняя святую свою соборную и апостольскую церковь, божественными своими святыми каноны же и догматы. дондеже совершиша свою божественную соборную тайну, вострубити седмому ангелу, и яко уже не будет время. но егда воструби седмый ангел совершится тайна Божия по писанию. по скончании бо святаго вселенскаго собора, воструби со ангелом вся вселенная, яко совершися тайна Божия. проклят приложивый. проклят отъемляй от преданныя нам чистыя веры, юже прияхом от Началника веры и Совершителя Господа нашего Исуса Христа, седмию святых вселенских соборов. и блажен и свят иже имать часть в первом воскресении, над сими бо смерть вторая области не имать. имеяй же часть сея святыя веры имать часть в первом воскресении. а отторгшиися от святыя соборныя и апостольския веры же и церкви, судит Бог. а сумняйся да прочитает, како не родився Левий Мелхиседеков десятину даде, и прият благословение. и како Давыд на реце Вавилонстей плакал никогда же видевше реки Вавилонския за 40 родов. но и разбойника сподоби Господь части сея, дав ему седмочисленную молитву подобную благодати. точию да всяк християнин во всем да взирает на Начальника веры и Совершителя Исуса. аще ли же кто начнет мудрствовати о святой вере кроме сего истиннаго Учителя, истиннаго Началника веры и Совершителя Исуса, то мощно ли тому начати добре: не точию совершити. и сего ради всяк богословец начинаяй беседуя о святой вере глаголет прежде слово Христово, еже рече Господь во святом евангелии сице: егда приидет Утешитель Его же Аз послю вам от Отца Дух истинный иже от Отца исходит Той свидетельствует о Мне и прочее. и того ради Златоуст начен свою беседу о истинном Дусе, глаголет прежде от святаго евангелия яко Господь наш Исус Христос: не рече Дух Святый, но рече Истинный. яко истинен есть, и вся весть воистинну. и Того послушайте Духа Истиннаго. и Тому веруйте яко истинен есть. Киприян же святый мученик Христов глаголет о святых соборех первом и втором вселенском соборе, веру святую изложивше символ предали церкви сице. и в Духа Господа истиннаго и животворящаго. и еретика Македония препреша словом Христовым. Иустин же святый мученик Христов глаголет: яко святии отцы на втором вселенском соборе символ святыя веры изложивше предаша сице: и в Духа Святаго Господа истиннаго и животворящаго иже от Отца исходящаго. Фотий же патриарх Царя града пишет о святой вере к Михаилу князю Болгарскому о всех святых вселенских соборех, и о изрядном втором соборе, яко святии отцы символ православныя веры предаша всем верным сице: и в Духа Святаго Господа истиннаго и животворящаго иже от Отца исходящаго. А корень и источник богословии святое евангелие. И еще глаголют нецыи, яко Никон патриарх Кириловой книги не приемлет, то лгут. приемлет бо ю Никон с любовию на многих местех, и не точию Кирила приемлет, но и Стоглав приемлет, и О вере книгу приемлет, еже свидетельствует Скрижаль книга его на листах многих, лист 847, 853, 858, 859, 860. точию в вере не согласует. аще бо и сам исповедует Духа Святаго Господа истиннаго. но преступил заповедь Исуса Сирахова, и припустил к себе иноземца, иже преврати вся благочестивыя пути его, и той солга пред ним, яко святии отцы Истиннаго в символ православныя веры не вложивше, аще и Господь глаголет: яко Дух Истинный иже от Отца исходит. а он лжущаго прият паче Христова учения. в том судит Бог, кто бо рече когда прежде сего лестьца. яко святии отцы в символ православныя веры Истиннаго не прияша, или коему имя иже глаголет яко не прияша: Господу ли нашему Исусу Христу. но не буди то, Той бо глаголет яко Дух Истинный от Отца исходит, человеком ли. никако же. волнуетжеся аки море от многих ветров. того ради слова еже глаголют кождо в сердцы имеет яко неприяша. лучше бы и нужнее святым положити в символ Господа Истиннаго, нежели в сердцы имуще сие себе точию спасает, а символ предающе без Истиннаго, весь мир погубляют. егда крещают глаголя символ без Истиннаго, то како приидет Истинный в сердце крещаемаго. О горе хулником на Святый Дух, им же не отпустится сие нечестие ни в сий век ни в будущий по словеси Господню. вопрошаю ненавидящих в символе Господа истиннаго. како святии отцы соборы составляху забыв Господа рекшаго, яко без Мене не можете творити ничто же. да не будет. ни ли сам Господь бе с ними на святых соборех начинаяй невидимо всяку богословию от святаго евангелия своего. еже предлагашеся посреде коегождо собора вместо самого Христа Господа истиннаго их, без Него ничто же можаху сотворити, по словеси Господню и яко преступоваемо слово Христово не имети Бога, и не быти христианом по писанию. где правда яко не прияша или мниши яко святии отцы тако вероваху во Христа, яко не послушати словес Его. не буди то, яко нецыи монахове пишут о символе православныя веры, а Истиннаго воспомянути бояхуся и не точию, но Христова имени и святаго евангелия воспомянути, да не обличит их совесть истребляти от символа Истиннаго. Скрижаль лист 818, 830, 835, 839. а монахове Максим премудрый, Зиновий премудрый, Нил премудрый. а веру их Бог весть, прочее, понеже есть мы недостойни общаго собора. то станите убо вы сами, кто любо буди от вас во образех святых отец втораго вселенскаго собора противу еретика Македония глаголюща, тварь Духа Святаго, а не Господа Истиннаго. мощно ли будет вам составити честь и славу Творца своего Святаго Духа не нарекши Того Бога Истиннаго и препрети того еретика кроме святаго евангелия. наипаче же видяще того самем Господем нашим Исусом Христом во святом евангелии нареченна Дух Истинный иже от Отца исходит. аще вам будет мощно воистинну, то и святым было мощно. то не лжите на святых всех райских жителей. не станет бо вас с тех налагати им безчестие. наипаче же еже хулником быти вам на Святаго Духа Господа Истиннаго. и в непрощенном нечестии скончатися смело дерзаете. но на пользу вам. узрите бо символ православныя веры согласен со святым евангелием в день суда Христова, а не без истиннаго, яко ныне мудрствуете небрегуще о страшном словеси Святаго Духа явственно глаголет, яко в последняя времена отступят нецыи от веры, внемлюще духовом льстивым, и поклонятся зверю, ему же дана будут уста хуления, хулити имя Господне и Духа Истиннаго, иже явственно глаголет Павлом о последних временах; и яко всяк грех и всяка хула отпустится человеком кающимся, а на Святаго Духа слово едино рекшим не отпустится ни в сий век ни в будущий. сия глаголя засвидетельствуя небом и землею, яко сие нечестие не подлежит покаянию ни слезам, ниже мученической крови. уста бо Господня глаголаша сия. а прелесть не приходит явным наветом, но прикрывше наготу свою, да не познают козней ея прельщаемии, иже не имут бисера. и иже никто же может разлучити верна от любви Истиннаго: ни смерть ни живот, ни ангели ни иная кая тварь, точию душу свою положити зань. его же аще кто зле ищет, никако же да обрящет. мир бо рече Господь, Духа Истиннаго не может прияти, яко не видит ниже знает Его. вернии же знают Его яко Истинный есть.

Ему же слава ныне и присно и вовеки веком,

аминь.

Слово 5.

О прелести антихристовой и о предтечех его последних времен.

како сатана мудрствует своими угодниками.

Яко не глаголати им явно на Святый Дух лаяния хульна, сокрывати яд смертоносный.

еже есть истинна в неправде.

Всяк християнин верует во Христа Сына Божия, всяк веруяй взыскует учения Христова и заповеди Его. всяк взыскуяй блюдет себе от преступления заповедей учения Христова, воспоминая словеса сия Богословля, иже глаголет: яко всяк преступаяй и не пребываяй во учении Христове, сей не имать Отца и Сына и Святаго Духа. аще кто грядет к вам, а сего учения не приносит, не приемлете его в дом, и радоватися не глаголите: глаголяй бо ему радоватися, сообщается вере и делом его злым. что страшнее быти сего может, в сем веце и в будущем, яко преступления ради единаго словеси, не имети Бога, и сочетанну быти еллином. но несть дивно, страшно бо страшно и запрещение приемлет: небо рече и земля мимо идут а словеса Моя не мимо идут, глаголет Господь. тем же унее есть небу и земли прейти, и скончатися, нежели единому от словес Христовых неприяту во християнех быти. два запрещения изыде от уст Господа нашего Исуса Христа. иже рече несть со Мною на Мя есть, иже не собирает со Мною расточает. что есть еже быти со Христом. разве еже учитися от Христа. а не хотящему от Него учитися, на Него ополчается. нужда есть, иже бо рече, несть со Мною на Мя есть а иже не собирает со Мною той расточает. что реченное иже не собирает расточает; разве учение от Христа собрати в сердце. учение Христово не быти путем, да семя позоблют птицы, не быти каменем, да увянет, не быти тернием, да подавит его. но быти благой земли, да возрастет в сердце, да сотворит плод по словеси Господню. сего ради глаголю вам: всяк грех и хула отпустится человеком, а еже на Святый Дух хула не отпустится человеком. иже бо речет слово на Сына человеческаго отпустится, а иже речет на Святаго Духа, не отпустится ему ни в сий век ни в будущий глаголет Господь. что есть не отпустится, сего ради разве иже рече. иже несть со Мною на Мя есть, и иже не собирает со Мною расточает. сиречь еже рехом отпустится егда восплачется горько яко Петр. а еже рехом не отпустится ни в сий век ни в будущий, уста бо Моя глаголют, сия глаголет Господь. аще веруете в Мя, блюдите крепко словеса Моя. аще же отмещитеся словес Моих то ни Мене знаете, ни Аз вас. или сотворите древо добро и плод его добр. или сотворите древо зло, и плод его зол. сиречь аще веруете яко от Бога изыдох и приидох в мир. то веруйте и словесем Моим, словеса бо Моя плод суть, а отметаяйся Мене и не приемляй словес Моих, имать судию слово еже рекох, то слово судит ему в последний день глаголет Господь. аще бо веруем во Христа, чесо ради веруем, разве еже умрети за слово Его. аще же веруем точию во глаголемых, а в сердцы словеса Христова не вкореняем, еже умрети за слово Его, то несть мы християне еже бо веровати во Христа, яко Бог есть и Сын Бога живаго. сие похваляет апостол, но глаголет, яко и бесове такожде веруют и трепещут. но повиноватися учению Христову не хотят. и того ради бесове суть, нам же не буди в вере бесом наследовати, еже во глаголех токмо веровати, а учения и словес Христовых отвращатися. един бо есть суд обоим отметающимся, яко же самого Христа. тако и словес Христовых по словеси Господню. отметаяйся Мене и не приемляй словес Моих имать судию слово, еже глаголах то слово судит ему в последний день глаголет Господь. иже бо речет слово на Сына Человеческаго отпустится ему, а иже речет на Святаго Духа не отпустится ему, ни в сий век ни в будущий, по словеси Господню. что реченное от уст Господа нашего Исуса Христа. сице страшно, яко не отпустится ни в сий век ни в будущий по словеси Господню, аще кто слово речет на Святаго Духа не отпустится ни в сий век ни в будущий по словеси Господню. естьли кто на земли и во всей подсолнечной могий разрешити соуз сей, и не токмо на земли но ниже на небеси кто от твари разрешити может. сице страшное запрещение, всяк бо грех и всяка хула подлежит покаянию и оставлению, а сие непрощенное нечестие никакову покаянию ни прощению не подлежит ни в сем веце ни в будущем по словеси великаго и истиннаго Бога и Спаса нашего Исуса Христа Сына Божия. кто в Него верует, то и словеси сему верует . и кто Ему самому ругается, той и словеси Его. сие кто дерзнет под свое пияное разсуждение полагати, но яко же Бог поругаем не бывает по писанию, тако и слово сие страшное неизменно пребудет вовеки. того бо ради Господь предзапрещает сице страшно, да никто же помыслит впасти в сие непрощенное нечестие, еже рещи слово на Святый Истинный (Дух). посем сам Дух Святый явственно над главами апостол своих глагола. о Нем же Павел вопиет глаголя: яко Дух явственно глаголет, яко в последняя времена , отступят нецыи от веры внемлюще духовом льстивым, и учением бесовским, и прочее. се глаголет Дух Святый отступят нецыи, а не вси. поискать бы их неужели обретается где отступльшии от веры. их же никто же от развращенных познати может, кроме единаго стада Христова, а развращеннии внемлют учением бесовским по словеси Господню. како познати могут отступление, и в дому своем, не токмо где далече. но едино дерзают приемше хуление на Святый Дух, яко тому не отпустится, иже не покается. а страшнаго и всяк ум превосходящаго словесе Господня забывают. еже како может принести покаяние к тому иже предглагола прежде окаяннаго того покаяния свой страшный суд Судия праведный глагола: аще кто речет слово на Святый Дух не отпустится ему ни в сий век ни в будущий. или мниши яко может произыти прощение, или оставление кроме уст Христовых, да не будет. сам бо глаголет Христос истинный Бог наш [Иоан. зач. 36], яко Аз есмь дверь, Мною аще кто внидет спасется. и внидет и изыдет и пажить обрящет. а не входяй дверми но пролазя инуде, той тать есть и разбойник. еже бо сам Творец небу и земли запечатле, вскую прелазя инуде, ища суетнаго покаяния, или оставления. святое бо покаяние именуется и есть сие, еже подлежит прощению. грех или хула, а за хуление на Святый Дух аще и мученически скончается не оставит. но прежде сего непрощеннаго нечестия блюдися всякаго греха, и всякия геены огненныя, да не речеши слово на Святый Дух. зане Той един есть Дух Истинный, и Тем единем вся тварь видимая и невидимая живут и движутся. сиречь ходят дышут, плавают обращаются, яко вси горне умныя силы небесныя. и вси человецы, и вси скоти польския, и вси звери дубравнии. и вси птицы небесныя, и вси рыбы морския и вси гади движущияся, их сотвори Господь Бог Святая Троица. вси Духом тем истинным живут и движутся. и того ради Господь наш Исус Христос Творец небу и земли, нарече Того во святой божественной богословии Дух Истинный. никто же ин токмо Той един, аще бо и наречет кто кого истинным, но той глаголемый истинный создан есть от Истиннаго, и не сам собою живет, не сам собою дышет, не сам собою ходит, не сам собою глаголет, не сам работает, не сам движется. но вся та действует в нем Дух Истинный иже воистинну истинен есть, и ни от кого не создан ни сотворен но сам собою живет, и всем тварем Творец и Создатель. и того ради крайне честнейшаго наречения нарече Того равночестный истинный Господь наш Исус Христос глаголя, яко Дух Истинный иже от Отца исходит, являя величество Святыя Троицы Отца и Сына и Святаго Духа. яко научи святых своих учеников и апостолов богословити о Святой Троице: яко Отец Бог истинный есть, и Сын Бог истинный есть, и Дух Святый Бог истинный есть. о Нем же первозванный апостол Христов Андрей уча сея святыя веры весь язык греческий и весь язык словенский, и во ахайских странах мучим сый смертию на муках запечатле сию святую богословию глаголя ко учеником своим иереом и диаконом, и всему собору. веруйте во единаго Бога Отца, Бога истиннаго, и Сына Бога истиннаго, и Духа Святаго Бога истиннаго. а иереи и диякони, ахайских стран, во весь мир. сиречь на восток и запад, и на север, и на юг разсылаху послания о сей святой вере, и о смерти святаго апостола Андрея. и яко от него научишася сея святыя веры, многа же к нам учения Господа нашего Исуса Христа. яко ко исправлению жития нашего и дел наших, от них же аще и погрешим в чем и возрыдаем кающеся, прощению сподобляемся. и о неизреченнем величестве Святаго Духа богословия страшна, еже есть Дух истинный иже от Отца исходит два слова, но от уст великаго Бога. ино бо нам есть глаголати о твари создания Божия еже есть небо и земля море, и вся живущая в них, и ино есть еже глаголати о законе и заповедех и учениих Господних, яже к нам что суть сия вся инако стоят. и чесо ради и что есть начало жития нашего. и что конец, и что терпение наше, и что венец терпению. а ино есть богословити нам о самом том Тварце и Создателе всех тварей видимых и невидимых, и наипаче же о самом сице сотворшем нас. еже кто Бог наш, и како имя Его, величествию бо Его несть конца. а имя Его Господь, Той един есть Вышний по всей земли, Той нам проглагола о всех сих Сыном своим Господем нашим Исус Христом нарекшим себе самого дверию глагола [Иоан. зач. 36]: Аз есмь дверь. Мною аще кто внидет спасется; внидет и изыдет и пажить обрящет. тать не приходит разве да украдет и убиет и погубит. паки, а входяй дверми пастырь есть овцам. но понеже воистинну истинная есть дверь истинный Христос Бог наш, то слыши небо и внуши земле глаголы сия како пред лицем Тоя истинныя двери пролазят инуде ругатели. а стыдятся нарещи себе татьми и разбойниками. дверь бо глаголет яко Дух Истинный иже от Отца исходит, а они проломавше диру инуде приложиша. и паки дверь глаголет, Дух Истинный. а они проломавше диру инуде истребиша истиннаго от символа православныя веры. и паки видяще яко церковь держится, истинныя двери Христа своего Бога, и им не последует. а они умудрившеся негде дерзают глаголати яко святии отцы на втором вселенском соборе мимо дверь Христа своего проломаша диру сию и тою лжею ухищряти отвратити верных от истинныя двери Христа Сына Божия, да прелазят инуду да совокупятся во едино совокупление сиречь в римскую унею. та бо воспалившеся в римском отступлении и доныне не угасает еже хулити Духа Истиннаго последующе прадеду своему Македонию. О христолюбцы разсудити истину со лжею, воспомянувше яко умрети имамы. и воставше пред страшным и праведным Судиею стати имамы, и принести веру. како веровахом, от кого научихомся коею дверию внидохом. и согласно ли сердце со усты нашими. внидет бо рече Господь, и изыдет. сиречь верует и исповедует той пажить обрящет. а не входяй дверми, но пролазя инуде, тать есть и разбойник. всяк грех и всяка хула отпустится человеком, кроме хулы яже на Святый Дух глаголет Господь, на Святаго же Духа не отпустится ему, ни в сий век ни в будущий. откуду нам израсте вера разве от уст Христовых, и та суть двери нашея веры. аще держимся двери, овца есмы Христовы. аще ли пролазим инуде, татие есмы и разбойницы, по словеси Господню. не мози приклонити ухо во лжу хуления на Святый Дух. но ничто же бо отступи от святых когда, от святыя истинныя двери Христа Бога Сына Божия. и не токмо не отступи. но аще бы и ангели благовестили. аше бы и апостоли проповедали несогласно со Христом истинным Учителем истинною дверию святыя богословии. анафема да будет. се глас Христов, се евангельский, се святыя соборныя и апостольския церкви. паки вопрошаю откуду нам вера израсте. разве от уст Христовых. кореня ли отторгшеся возмнимся процвести. да не будет. Аз бо есмь лоза, а вы рождие, яко же бо розга не сотворит плода. аще не пребудет на лозе но изсыхает и во огнь вметаема бывает. тако и вы аще не пребудете в словеси Моем, яко без Мене ничто же можете творити. и всяк иже не пребудет во Мне, и в Моих словесех извержется вон, яко же розга [Иоан. зач. 50]. сия словеса глаголет Господь наш Исус Христос Сын Бога живаго. кто не убоится и от верующих вонь. неверных же иже отторгшеся от лозы истинныя извержени вонь и иссыхают, мимо дверь истинную пролазят инуде. прилагающе и от Сына изметающе Истиннаго и облыгающе совет святых о них же Дух Святый прорече усты Давыдовы прорече глаголя. в советех правых, и в сонме, велия дела Господня. изыскана во всех волях его. и паки Бог прославляем в советех святых. зри яко прославляем в советех святых, а не без Истиннаго яко лжите на святых. глаголя, яко святии Истиннаго в символе святыя веры не прияша. аще и Христос рече яко Дух Истинный иже от Отца исходит. видите ли незавидно премудрии, яко мало вам еще изгоняти церковь яже на земли но и в раи сущую гоните, бестудно глаголя, яко мимо лозу истинную Христа своего, проломаша диру. и неприяша в символ святыя веры Истиннаго. тии же вси святых соборы, со всеми святыми райскими жительми согласно и единодушно вопиют к Богу на нас глаголя. доколе Святый Истинный не судиши и не мстиши своего си хуления, и нашего оболгания. а ко Пресвятой вопиют Богородице глаголя, радуйся Царице небесных сил яко мучителей немилостивых изметаеши от начальства подая гонимым отдохновение. мы же паки восприимем богословию о истинной двери Христе Исусе Истинном Бозе нашем, како сказует истинную богословию. еже бо глаголет писание, яко будут вси учении Богом. се учит Бог Дух Истинный, иже от Отца исходит. яко же бо Сын Божий, Бог истинный иже от Отца истинна рожденна а не сотворенна есть. и того ради глаголет божественный Златоуст: не рече Христос Господь Духа Святаго но нарече Истинный яко истинен есть. и вся глубины Отча и Сыновня весть воистинну, яко един Бог и Господь истинный со Отцем и Сыном споклоняем и славим безначально и безконечно. сие титло Святей Троице свойственно есть и равночестно, яко же Бог Отец истинный есть, тако и Дух Святый Бог истинный есть, Его же аще наречеши Бога или Господа а не приложиши Истиннаго, то ничто же рекл еси о величестве славы Его. яко мнози бози и господие глаголются на небеси и на земли по писанию. и того ради Бог Истинный есть нарече равночестнаго Духом Истинным, иже от Отца исходит, се дверь истинная богословии глаголет. а не входяй тою во святую веру, но пролазя инуде, тать есть и разбойник, се лоза истинная. на ней же аще кто и не держащеся тоя учения и богословия яко розга изсыхает отторгшеся лозы истинныя. кто не готов умрети за Христа, то како умрет за слово Его. унее бо есть исторгнути душю от телесе нежели Истиннаго от символа святыя веры, уста бо Господня глаголаша сия. аще кто глаголется быти християнин, а словеса Христова пресевает. сиречь еже хощет приемлет, а еже хощет отметает в беседе сей да творит еже хощет. донележе ему Бог терпит, ведый яко стати имать пред страшным и праведным Судиею Христом.

Ему же слава со безначалным Его Отцем и со Пресвятым и благим, и животворящим Духом,

ныне и присно и вовеки веком,

Аминь.

Слово 6.

О Премудрости Божии,

яже созда себе храм, и утверди столпов седмь.

Блаженный и праведный Давыд царь же и пророк благодарно вопиет ко Господу глаголя. безвестная и тайная премудрости Твоея явил ми еси. и паки яко возвеличишася дела Твоя Господи, и вся премудростию сотворил еси. О премудрость, где еси, и где живеши, яко тобою вся сотворил есть Бог. и без тебе ничтоже бысть, еже бысть по писанию, и в символе православныя веры, великаго в царех Соломона испросих от Бога премудрость яже бе тогда з Богом, егда сотвори Бог небо и землю, и море и вся яже в них, и егда сотвори перваго человека, и постави его в раи и по отпадении не остави его да не погибнет. Егда же прият великий сею и премудрый Соломон от Бога премудрость громогласно возгреме во всю вселенную глаголя яко премудрость созда себе храм, и утверди столп седмь и закла своя жертвенная, и черпа в чаши своей вино. и уготова свою трапезу, и посла своя рабы созывающе с высоким проповеданием на чашу глаголющу иже есть безумен, да уклонится ко мне и требующим ума рече приидите и ядите Мой хлеб и пийте вино, еже черпах вам, и прочая. Кто сия премудрость разве Господь наш Исус Христос Сын Бога живаго, иже нарече сам себе дверию глаголя. Аз есмь дверь, Мною аще кто внидет спасется. внидет и изыдет и пажить обрящет. и паки, не входяй дверми во двор овчий, но прелазяй инуде, той тать есть и разбойник, и прочая. И понеже премудрость Божия Господь наш Исус Христос истинная дверь сый, не припустит ко церкви чюжаго учения яже созда разве своего си учения. дверь во двор овчий иже есть церковь, а пролазяй инуде. тать есть и разбойник, по словеси Господню. Но что есть седмочисленное столпов, их же утверди Премудрость в храме своем; и что закла своя жертвенная. и что есть черпа в чаши своей вино. Зане в ветхом завете сих не обретаем, но обретаем я во благодати Господа нашего Исуса Христа в новом завете седмочисленное седми вселенских соборов, ими же Христос Премудрость Божия созда себе храм сиречь святую и апостольскую церковь, яко же храм не может стояти не бе имея столпов цело стоящим. тако не может быти соборная и апостольская церковь. аще не бы ея Господь утверждал седмию святыми вселенскими соборы. И та суть седмь столпов, и утверди во своем храме Премудрость Божия Господь наш Исус Христос Сын Бога живаго. А еже отступницы отступивше от святых преданий и канонов обличаеми седмочисленными проображеньми же и пророчествы составиша своя столпы но не тверды без множайших бо от седми сокраментов их спастися не мощно всякому человеку, негли во святой соборной и апостольской церкви, несть мощно быти ни житию ни християнину отступивше не токмо единаго от седми святых вселенских соборов, но аще бы и мало что от преданий святых кто любо буди отверг, а по Златоусту, аще бы и худое что подвигнул анафема да будет, что может худое в церкви быти. Но отсецая дерзость в людех сия проглагола святый сиречь аще что возмнится человеку быти худо во святых преданиих, да не дерзай, да не будеши анафема по писанию вся бо ереси от продерзателних толкований воспали враг. Аще не удержимся истинныя лозы истиннаго Учителя словес Христа Бога нашего, то всяко погибнем. Тем же всяк верен прочти паки от начала зде глаголанная. яко вся Премудростию сотворил есть Бог. яко Той созда себе храм, и утверди столп седмь и прочая, и яко сия Премудрость есть, Господь наш Исус Христос Сын Бога живаго. Яко Той созда церковь свою на седми святых вселенских соборех. и того ради соборная именуется, и есть, и яко Той и дверь истиннаго християнства. А не входяй дверми тать есть и разбойник, яко Той есть лоза истинная на ней же аще кто не пребудет и извержется вон, и изсыхает и во огнь вметаема бывает, и изгорает. и прочая, зри со вниманием како церковь Христова пропущающи всякаго верна сквозе символ святыя веры вопиет глаголя двери двери Премудростию вонмем, и се есть внидет и изыдет, и пажить обрящет, сиречь, аще дверию внидет слова Христова, и аще не отторгнется от лозы учения Христова. аще проидет сквозе весь символ премудростию слова Христова. аще не приидет от инуде ни единыя точки. тогда проидет Премудростию, и дверию Христом внидет и изыдет и пажить обрящет. сиречь не токмо сам душу и сердце свое ощутит исполнено радости, яко внидет изыдет дверию сию внемлюще Премудростию двери. но и прочим возвестит пасущеся с ними на пажити учения словес Христовых, яко несть мощно нарещи святаго символа. точию догмат святаго евангелия. но сие верным радость есть, а отступником мозоль. Двери двери Премудростию вонмем. Се паки открывает нам Премудрость Божия прочия двери, яже в тысящу лет. юже нарече Дух Божий первым воскресением. егда сатана бе связан. блажен и свят иже имать часть в первом воскресении. на сих бо вторая смерть обладати не имать, како имети часть за 1000 лет тоя тысящи имущим или по той тысящи в тысящу лет родившимся аще не Премудростию вонмем, аще не дверию внидем. како дверию изыдем, всяк бо хотяй имети часть в первом воскресении, должен есть взыскати. Како внити верою во оную тысящу лет, и како изыти и пажить обрести, и кая нам потреба проходити учащеся яже в ней события. и что есть первое воскресение. и что часть наша в нем; но сих всех никто же весть улучити. аще не церковною Премудростию яже вопием, двери двери Премудростию вонмем. Всякой бо святыни, яже во святых догматех корень и источник святое евангелие верующим. а пролазя инуде тать есть и разбойник по словеси Господню. Тем же взыщем, коея ради вины сатана связан бе на 1000 лет да не льстит языки, и паки по 1000 летех развязану быти да льстит языки по писанию. разве да не препнется проповедь воскресения Христова. Зане яко той льсти мудрец возмутил бы весь мир. да нигде же воспомянется имя Распятаго, како было мощно быти царем благоверным, како вселенским собором. како на соборех исполнитися церкви святых канонов, и догматов всем крыющимся, всем бегающим по горам пустыням неисходно. И связану бо сущу тому како от бесовских князей гонима бе церковь Христова. Всякому негли ведати мощно есть, како пролияша крови святых мученик в трисотныя лета по страстех Господних. всяко аще не бы той сам связан бе, не бы спаслася всяка плоть, вселукаваго ради коварства козни его. Егда бо бе не бе связан, како Адама прелестию рая лиши, како по изгнании Каина наусти на убийство братнее, како всех людей от Бога отведе да потопит беззаконием весь мир, кроме Ноя праведнаго. како наусти ко столпотворению, како ко идолослужению до Авраама и Содоме, и во Египте и по пустыни, и во царех даже до пришествия Христова. Зде зри, како пришед Христос колика знамения и чюдеса сотвори пред ученики своими, яко ни всему миру вместити писати в книги, их же всех самовидцы бывше святии апостоли. А во время страстей Господних вси разбегошася страха ради июдейска по действу сатанину. И того ради связан бе сатана на 1000 лет, да не льстит чрез меру силы человеческия. Иже бо и самому Господу постящуся, 40 дний, дерзнув приступити с прелестию. и во мгновение ока показа вся царствия мира, и хулными глаголы. како не бы повредил проповеди, не связан сый. И того ради связа Господь за немощь естества нашего, на 1000 лет, да не льстит народов, еже убивающих тело, яко да никто же Христа ради благоволит умрети по словеси Господню еже рече Господь. иже Мене ради аще кто погубит душю свою и евангелия, той спасет ю, и первии будут последнии, а последнии первии. Тем же нужда нам настоит внити в сию тысящу, дверию словес Христовых. и соглядати бывшая в ней от начала даже до конца ея, да навыкнем. чесо ради нарече ея Дух Божий первым воскресением, и како блажен и свят иже имать часть в сем первом воскресении. Сия вся аще вонмем премудростию словес Христовых, то всячески внидем и изыдем и пажить обрящем по словеси Господню, в начале бе тогда святыя тысящи лет, Христос воскресе из мертвых, смертию своею нашу смерть попра, и сущим во гробех живот дарова, и всех святых душа со Адамом от ада свобождь в рай всели, и многих верных телеса воскреси сподобляя прияти святое крещение. да омывши греси внидут в рай, и тако по воскресении поживе Господь 40 дний на земли, являя себе учеником своим. посем вознесеся на небеса, и седе одесную Бога Отца. и посем в день пятидесятный Духа Святаго благодать прием от Отца излия на святыя своя ученики и апостолы, сице да и тии во время страстей Господних разбегошася страха ради июдейска, а ныне по сошествии Святаго Духа, смерть Христа ради паче живота и мучение, паче меда и сота им являшеся, и дванадесят токмо с тощима рукама яко овцы посреде волков многих на всю вселенную ополчившеся и не книжни суще. на вси полки бесовския и философския небоязненно дерзаху. и прочая, двери двери Премудростию вонмем. Како седмочисленное столпов единство имут, сиречь едину веру, едину церковь, едино крещение, едино священство, едино мудрование, и едину крепость. а не тако яко римскаго отступления сокрамент, иже отступивше седмочисленнаго семи вселенских соборов, и символ святыя веры седмочислен во святых догматех, на 12 артикулов разложивше, и под ногами 12 икон воображают неправедно. Седми бо святым собором равно часть во святом символе, да никто же речет, яко двема соборы начат и совершен есть. Кроме бо прочих какова часть первому в седмом такова часть и седмому в первом. Зане вси святии седмь вселенских собор, в начале собора полагаху святое евангелие на месте Христове, и прочетше символ святыя веры, и добре разсмотривше. яко единодушнии Бога и святыя веры, яко свят и непорочен целующе на главах своих полагаху глаголюще. проклят приложивый, и проклят отъемляй. Сия вера святая, сия вера евангельская, от небес к нам сошедшая. Посем прочия святыя догматы составляху имуще началника и учителя и наставнику себе святое евангелие, и тако единство седмочисленно есть святых соборов, и седмочисленное едино есть, яко сердце всего исполнения церковнаго от Адама даже до втораго пришествия Христова. содержит вся святыя веры, каноны же и догматы, и яко первому человеку Адаму часть в последнем от спасаемых, тако и последнему в первом Адаме. Вера бо святая соборная сице соединяет церковь Христову. Но сия вся познаваем, аще Премудростию вонмем при апостолех бо церковь аще и не возрасте нарицатися соборная, яко еще не соверши ея тогда Господь по своему обетованию еже рече, созижду церковь Мою и врата адова не одолеют ей, но совершенну положи в ней, тако всем яко тогда верным имети душу едину, и сердце едино во многих тысящах. Но что дивно, яко двум тысящам святых седмь вселенских соборов душу и сердце имети едино. Христос бо тако зиждет церковь свою всякаго разума. яко в той тысящи лет егда сатана бе связан, всей церкви соборной и апостольской имети душу едину, и сердце едино. И се есть реченное, яко Премудрость созда себе храм, и утверди столп седмь, и прочая. Аще же кому зрится сие слово скудно то ко мне старцу прииди я доложу скудость всякому любящему в символе Истиннаго. а враждующему на Истиннаго несть во мне части ни жребия ни в чем прочее уже время настоит нам дверию внити во святый символ православныя веры. Яко содержит в себе седмь артикулов. по числу святых седми вселенских соборов, а не 12, яко отпадшии мудрствуют, борюще седмочисленное святых седмь вселенских соборов. Кождо бо состав от седми соборов святаго символа, сораслен и сочислен есть. коемуждо от седми святых вселенских соборов. Аще и книги о сем в Риме сожжении, но оста нам во псалмопении Давыдовым глаголя: руце Твои сотвористе мя. аще и яко от человек от отца, иже есть рожден. по многих летех, а не отрещися Адама. И паки на реце вавилонстей ту седохом и плакахом. не суще событию за 14 родов. о пречюдный Давыде крестообразно состояти сия изображати нам единою бо рукою досязаеши до преселения вавилонскаго за 14 родов по тебе не сущу событию. Или како Левий, не рожден сый за многа лет десятину даде Мелхиседекови, и благословение прият, тако Бог соединяет веру святых своих первых с последними, а последних с первыми во едино да будут вси едино по словеси Господню. И се есть едина святая соборная и апостольская церковь юже созда Господь на камени исповедания своего. а не на Петре, яко Рим верует неправе, сия есть тело Христово, сия есть, ей же душа седмь святых соборов. сия есть, ей же сердце символ православныя веры. сия есть ей же двери сам Христос, сия есть ей же лоза сам Христос [беседы лист 1459]. Мощно ли телу не повиноватися главе своей Христу. мощно ли души растояти от тела противу главы. мощно ли сердцу не согласовати главе своей Христу. мощно ли отторгшеся лозы своея не погибнути вконец. мощно ли тамо своею дверию Христа прелезти инуде, а не быти татю и разбойнику. Оле несмысленнаго нерадения. оле беснования вина исполненнаго и сикиру. оле забвения еже стояти пред страшным судиею Христом, и принести веру жительства и дела своя, и дати ответ во всем. и не будет избавляяй, Христос есть дверь истинная. а ты инуде пролазиши. Христос велит слушати евангелия, а ты слушаеши давно запрещенных харатейных книг, Христос велит глаголати, Дух Истинный, а ты не токмо хощеши глаголати Истинный, но ибо решися со Христом и изметаеши Истиннаго. забыв яко жестоко Македонию противу рожну пратися святаго евангелия еже есть дверь истинная, а пролазя инуде, сиречь харатейными книгами. Знай свое имя по словеси Господню, мы же приходяще и соглядая 1000 лет, в ню же сатана связан бе. воспомянухом отчасти бываемая в ней, но яко по седмом вселенском соборе, и царство сатанино начат утвержатися, паки на западе и брани с востоком воздвизахуся, и самое отступление от евангельския проповеди в лукавых сердцах возгарашеся. А по скончании 1000 лет, егда развязан сатана, да паки льстит человеческое естество чрез меру. яко аще не Господь поможет, то всех поглотити ему, аще возможно будет и избранных. И абие искочивши из бездны. отторже хоботом своим третию часть звезд небесных, и поверже на землю, и изгоняше жену, яже есть церковь и прочая. и даде зверю седмоглавному силу свою и престол свой, и власть великую, и прочая. Нам же время паки воспомянути истиннаго учителя Христа, и всяк кто не пребудет во учении Его Бога не имать, кто противу станет, и паки воспомянути истинную лозу Христа. от нея же всяк отторгшеся изсохнет и изгорит глаголет Господь, кто противу станет. И паки воспомянути истинную дверь Христа. а пролазя инуде тать есть и разбойник, кто противу станет, и паки небо и земля мимо идут, а словеса Христова не мимо идут. Кто противу станет кроме непрощеннаго нечестия. Иже глаголют яко святыя соборы словеси Христова не приимаху. рече Господь яко Дух Истинный иже от Отца исходит. Кий собор сего словеси не приимет, или кий возненавидит о непостижимом величестве. яже от Отца исходит. Аще бы и ангел с небеси сошед не хотел сего словеси великаго, Бога о великом Бозе приимати, был бы анафема от церкви Христовой. Наипаче же яко не оставитися сему нечестию, ни в сем веце, ни в будущем, по словеси великаго Бога и Спаса нашего Исуса Христа. Где у вас очи, где разум; где душа, тварь ли еси, сего великаго Бога; Его же слово отмещеши, помяни Адама, едино слово Божие преступивше, и толико лет тысящь в мучительстве претерпевши. Но тому не рече Бог, аще снесте яко не оставится. и того ради помилован бысть, и рай паки наследова. Вам же отметающим словес великаго Бога, и хулящим на Святаго Духа, равночестна великаго Бога, запрещенное, непрощенное ни в сем веце ни в будущем. Аще ти Христос отказал есть, кто простит ти; или кто приимет тя; твори еже хощеши. Но страшно впасти в руки Бога жива, но мы воспомянувше сия страшныя глаголы Господня, и отметающихся в погибели, проходим дверию а не инуде святый символ святыя веры, воскликнем превысокий глас церковный, глаголя. двери двери Премудростию вонмем, и сице глаголя:

[1] Верую во единаго Бога Отца Вседержителя Творца небу и земли видимым же всем и невидимым. [2] и во единаго Господа Исуса Христа Сына Божия, и единороднаго иже от Отца рожденнаго прежде всех век. света от света, Бога истинна от Бога истинна рожденна а не сотворена, единосущна Отцу Им же вся быша. [3] нас ради человек и нашего ради спасения сшедшаго с небес. и воплотившагося от Духа Свята, и от Марии Девы вочеловечьшася распятаго за ны при понтийстем Пилате, страдавша и погребена, и воскресшаго в третий день по писаниих, и восшедшаго на небеса и седяща одесную Отца. [4] и паки грядущаго со славою судити живым и мертвым. Его же царствию несть конца. [5] И в Духа Святаго Господа истиннаго и животворящаго, иже от Отца исходящаго, иже со Отцем и Сыном споклоняема и славима глаголавшаго пророки. [6] и во едину святую соборную и апостольскую церковь, исповедую едино крещение во оставление грехов. [7] чаю воскресения мертвым и жизни будущаго века, аминь.

Все седмь святых артикулов, святаго символа святыя соборныя и апостольския церкви. по числу святых седми вселенских соборов, едину церковь вся своя божественная уста, тако и святое евангелие тако святых апостол проповедание тако святых мученик, веру же и кровь. тако седмь святых вселенских соборов. тако символ святыя соборныя и апостольския церкви, внутрь персей церковных имже положи яко сердце в телеси Христове, и страшно запечатле, яко уже не будет время. разрешибося седмь печатей, поставиша седмь светилник златых. возгремеша седмь громов, воструби седмый ангел, соединишася седмь церквей, во едину церковь, яко же бо седмь церквей, сиречь ефесския, смирненская, пергамская, фиатирская, сардийския, филадельфийская, и лаодикийская, соединена суть со Христом, и едина есть церковь, седмь святых вселенских соборов, едино суть тамо седмосоставное Святаго Духа символа, едино есть исповедание святыя веры. А кто речет яко двема соборы составлен бысть кроме прочих святых пяти, тот проспися. а познай единодушно седми соборов, а не сами бо святии отцы составиша символ святыя веры, но Дух Святый теми действуя. положи того во седми составех, или артикулех, по числу седми святых соборов. яко да соединит вся своя воедино, еже имети равну часть, первому во втором, и яко седмому в первом. И се есть блажен и свят иже имать часть в первом воскресении. на сих бо вторая смерть области не имать. Прочее зри како Адаму и сущим из Адама, праведным часть есть в первом воскресении: но прежде увесть, яко всяк человек по естеству сугуб есть, и елико внешний наш человек, и изнемогает толико внутренний обновляется по писанию. Ты же смотри како Адама в первое воскресение от ада воскреси Господь половину человека, еже есть душа, и вторую еже есть тело соостави в земли. яко да второе, яко воскреси совершенно. и всех святых с ними, и ныне ждуще общаго воскресения со всеми святыми райскими жительми славити Бога во святой Троице единаго, яко же повеле Христос церковию седмию святых вселенских соборов, в няже желают ангели приникнути по писанию. еже глаголет да скажет ся ныне началом и властем на высоких церковию многоразличная Премудрость Божия по предложению век. И не иная бо мудрствуют души и душа праведных, но тояжде яже предаде святою соборною и апостольскою крестоносною церковию [ефес., зач. 253], то же и мудрование у них, таяжде вера едина, те же каноны и страшныя догмата, яже состави и предаде Дух Святый, седмию святых вселенских соборов, всем верным живым же и преставленным. от перваго человека и до последняго. И се есть часть общая всем верным в первом воскресении тоя тысящи. в ней вся сия созда по своему обетованию. Аще слушаем словес Его, аще повинуемся учению Его, аще веруем обетованию Его, то всяко имамы часть со всеми святыми в первом воскресении. А нерадящим о сих яже прочтохом, суд Божий ждет. И тако исполнит Господь церковное создание божественными же догматы и каноны совершив церкви исполнение. кончает и тысящу лет со запрещением, яко уже быти времени еже положити что или отъяти от божественных преданий во святой соборной и апостольской церкви. дондеже приидет Господь наш Исус Христос судити живым и мертвым Его же царствию несть конца. во християнех, а по страшном суде не будет конца никогда же. Его же царствию не бе начала тому и конца не будет. Того бо просим всегда молящеся глаголя, да приидет царствие Твое. да будет воля Твоя, яко на небеси и на земли. Яко же Господь научи нас, аще же кто не умудрит Господа нашего Исуса Христа. сиречь сугуба воля сугубо хотение сугубо действие сугубо царство по апостолу, иже глаголет, егда же предает царство Богу Отцу подобает бо Ему царствовати, дондеже положит враги своя подножие ногама своима. Ему же егда покорена будет всяческая. тогда будет всяческая во всех. аще не сугубое Господь умудрит нас то како познаем сию богословию Павлову, и кто ему сравнится в богословии. Мы же по скончании 1000 лет, и по развязании злоковарнаго сатаны врага церкви Христовой разсмотрим действо его како враждует церкви Христовой, како гонит ю горее нежели прежде. како отторже хоботом своим третию часть всего християнства. како строит угодники своими власть антихристову, сына погибели. како хощет посадити его в церкви Божией. аки Богу нашему умудрити предотечем его. еже возобладати везде книгами церковными. яко да препишут их на антихристову руку изметающе Истиннаго, и истинное. И еже воистинну от божественных писаний изметающе истиннаго Христа Бога нашего, ложь ухищряюще глаголати противу своим глаголом глаголюще облыгаша и облыгают. яко не подобает приимати еже Христос глаголет, и яко не прииде Христос, но приидет. и яко еще не сотвори сего Бог еже родитися Христу, та и тем подобная безчислено изрекше написаша во своя новыя богомерзския книги, а истинныя древняго благочестия книги обругаша и оплеваша, и вон из храмов церковных изметают, но Вышний не в рукотворенных храмех живет по писанию. О горе нам ныне живущим на земли, яко прииде время отдалече проповеданное на нынешнее плача достойное время. Яко жидове уже християне себе нарицают, християн прельщают. Християны не проспавшися с похмелья, тем веруют и не ощущают тех прелестей глаголют, аще не бы сии премудрии были, то не бы власти наши тем повинулися тии узрят. на тех Бог взыщет. мы же да ямы и пием а утрие умрем. О люте время нас постиже. разлучают нас со Христом истинным Богом нашим. и приводят к сыну погибели. О слепота пияных християн иже ждут явнаго жидовства, и предотечей антихристовых. а не внимают помраченной прелести их. Како бо ныне рекут еще многим християном сущим, не Христос Его же июдеи во Иеросалиме распяша, но той есть христос его же мы ныне проповедуем. Аще бы сия ныне рекли, то ни ли бы все людие устремилися быша на убиение их, и того ради приемши от сатаны помраченную прелесть и прельщают не явно. Но мы обычно вопием, церковный глас. двери двери Премудростию вонмем. И разсмотри како татие не дверию входят, но прелазя инуде. И символ святыя веры непорочный сый, приемше мерзость веры сотвориша его же проходя первый артикул ничто же смеяху рещи хульно. того ради яко ни жидове и ариане ничто же глаголют нань. А во втором артикуле слово, понеже ни жидове и ариане не видят. и они с ними согласишася, идеже бо речено бысть на посрамление Ариево. рожденна а не сотворенна. тамо лукавии ариане друга своего оправдати хотяща многосильную литеру а. первую отъемше, со жидами глаголют. рожденна не сотворена, яко бы еще не сотвори Бог. Се бо еже рождену быти Христу, в Него же християне веруют. Ты же смотри како едина литера по действу сатанину весь мир убивает. Безбожни бо ариане богохулныя глаголы на Сына Божия рече глаголя Того быти рожденна и сотворенна, а не единосущна Отцу, и того ради собра Дух Святый вселенский собор, яко прокленше ересь его, и самого непрощенной анафеме предавше, проповедят Сына Божия Господа нашего Исуса Христа Бога истиннаго от Бога истиннаго рождена а не сотворена единосущна Отцу. А не тако яко Арий блядословит, или яко помраченная прелесть изблева, яко рожденна еще не сотворенна, да в уме у них той разум лежит его же в новой книзе издати хотят. Аще Бог попустит да глупее ископается ров и прелесть народ християнский по действу лукаваго сатаны. Третии его же артикула слово, аще и всего артикула и всех его слов жидове ненавидят. но понеже и Арий молчит, и прелесть премолче, яко несть мощно явно отрещися им распятаго Бога нашего. В четвертом же артикуле аще и не явно отвергошася. но понеже реченно слово воцарившуся Христу глаголет церковь Его же царствию несть конца. А они начало царствия Христа отвращашеся глаголют, яко преже рожества Христова глагола архангел царствия Его не будет конца то в правду глаголет. Но сия глагола архангел прежде рожества Христова Христа Бога нашего. яко предгрядущему царствию Христову, егда родится Христос тогда царствию Его не будет конца. Прежде рожества Христова несть мошно было рещи, несть конца, егда еще не бе начала царствию. Сице несть мощно рещи не будет конца. егда царствует Христос. и не преста царствовати: но несть конца, кто во Христа верует той весть еже не блазнитися подобает. В пятом же артикуле не токмо всею церковию возмутиша, но и всею тварию и небом и землею потрясоша извержением истиннаго. отторгшебося от истинныя лозы Христа Сына Божия изсыхают. дондеже во огне згорят негасимом, и отбегше от истинныя двери Христа своего Господа пролазят инуде преступающе бо слово Христово, не имети Бога по писанию, а хулящии на Святый Дух, не имут оставления ни в сем веце ни в будущем. Оболгавше же святыя вселенския соборы отвержением словеси Христова, еже Дух Истинный положи всеми святыми райскими жителми, поколебаша, и вси святии вопиют к Богу на них глаголя: Доколе Господи Святый истинный не мстиши своего си хуления и нашего оболгания. Зри изметателю Истиннаго, в чем стоиши и чего ждеши, или ти даде Христос книгу отпускную глаголя. аще кто речет слово на Святый Дух не отпустится ему ни в сий век ни в будущий, и что может страшнее хуление сего словеси быти. еже рещи яко не подобает в символе Истинным нарицати Духа Святаго, аще и Христос нарече Того Истинным, то где христианство. В шестом же артикуле отметающеся всех святых церковных соборов преданий, иже и канонов, глаголют едину святую соборную. а еже и во едину отмещут да ничто же церковное прикоснется вере их. И того ради соборную истолковаша яко же от язык собрася, и того ради соборная глаголют, а еже глаголет в советех правых и в сонме велия дела Господня, изыскана во всех волях Его. и еже Бог прославляем в советех святых, того и не помянут. где християнство се бо не человек есть, но и скотов горше есть, еже что видит скот тому и верует, а не внутрь зрит щадимуя силу Божию. Седмый же артикул, един на два нечювственно разделиша, точию да сопротивятся святому седмочисленному сочислению, и святой соборной апостольской церкви. Еже бо чаю воскресения мертвым, и жизни будущаго века, аминь. Несть мощно разделити разве раскола ради церковнаго.

Слово 7.

О нечювственных християнех яже нарицаются православнии.

и прелесть хулят. а во прелести несмысленно утопоша и не ощущают.

Понеже в божественном писании глаголет, яко пришествие антихристово будет по действу сатанину, сатане же действовати попусти Бог во погибающих прелестию а не насильством. прелесть аще будет явна яко и прелесть, прелесть и наричется. яко нецыи мнозии погрузивше себе во прелесть, даже до ноздрей, и не разумеюще яко прелесть есть, глаголют како нецыи не приемлют новых наших исправлений, а исправльшии християне суть себе наричут християны, учения прелесть может быти. антихрист бо прельщати будет знаменьми и чудесы ложными глаголет писание, егда рекут вси людие, отступайте от Распятаго, и отрицайтеся Его, зане яко распят есть на древе и умре и погребен бысть, то вси негли видяху, а воскресша из мертвых никтоже видя. поклоняйтеся убо сему и чудному, ему же повинушася весь мир. и никто же может противу его единаго слова рещи, но вси поклонишаси ему от мала даже до велика их. Оле прелести, оле адово дно самовольное погружение, како могут знати прелесть. понеже и сего не внимают, яко будет прелесть. точию антихриста ждут безопасно, а истиннаго Бога и Спаса нашего Исуса Христа словес и учения отвращаются. иже глаголют о последних временах глаголя. блюдите да никтоже вас прельстит, мнози бо приидут во имя Мое и многих прельстят глаголет Господь. а не нуждею понудят яко ныне нуждею велят приимати новосоставленныя книги, но Бог сего не терпит и не потерпит. Зане молитвами пресвятыя Богородицы, весть Господь мучителей немилостивых изъимати от начальства. и низлагати со престол. а о прелестях последних времен, Дух Святый явственно глаголет, яко в последняя времена отступят нецыи от веры внемлюще духовом льстивым, и учением бесовским, ими же путь истинный похулится, и во умножении льстивых словес ловити будут по стихии мира а не по Христе и будут лжехристи, и лжеучители иже внесут ереси погибели, искупльшаго их Владыки Христа отметающеся, и приводяще себе скорую погибель антихриста. и яко имать приити отступление и прелести исполнится весь мир. и тогда явится человек греха сын погибели противник превозносяйся паче всякаго глаголемаго бога или чтилища, яко сести ему в церкви Божией аки богу. и показующе себе яко бог есть. Зри сести ему в церкви Божией аки богу. како сядет в церкви Богу живущему в ней и глаголющу, се Аз с вами есть во вся дни до скончания века. како сядет антихрист тамо идеже Христос живет. ты же смотри что есть церковь, церковнаго ради собрания созидаются храмы церковныя сиречь рукотворенныя нерукотворенных ради. о них же писание речет, яко Вышний в нерукотворенных храмех живет, ни от рук человеческих угождение приемлет. того бо ради из начала веры не восхоте Господь создати нерукотворенных храмов, но и созданных разорити попусти глаголя, яко не останется где камень на камени иже не раззорится: но Аз рече созижду церковь Мою и врата адова не одолеют. но попустит Бог сести антихристу в рукотворенных аки богу. тайна бо уже деется сего словеси. прежде бо от падения в Риме, церковь Божия именовашеся: а ныне тем глаголют костел, храм именуется да везде церковную память изтребивше, мерзость запустение поставлена будет. а истинной церкви Христовой гонение и бегство. поминающе жену Лотову, прорече Господь; идеже будет труп, тамо соберутся и орли глаголет Господь. Зане не стен ради Христос умре, ниже камения ради, но духовных ради храмов, иже не отмещутся словес Христовых, даже до смерти. а высокая вся и сладкая и безпечальная вся пообладает сын погибельный, дондеже рекут вси людие мир и утвержение. и внезапу нападет на них всегубительство по писанию. но яко же предрекохом. еже подобает быти прежде отступлению от веры в последняя времена, Зри во времена а не единою будет отступление. Рим бо единою отпаде и впад в непрощенное нечестие, похулити Дух Святый исхождением и от Сына. второе отпадение глаголемых униятов истреблением истиннаго из святаго символа православныя веры. третие отпадение оболганием святых вселенских соборов еже не прияти им в символ истиннаго, и не глаголати в символе Господа истиннаго, и отметником и преступником явитися словес Христовых учения иже глаголет. яко Дух истинный, иже от Оца исходит. Четвертое отпадение не у явися, и аще и не в долзе времени будет по предреченному но всячески будет по писанию, еже есть 1666. а о прелестех насеенных в мир на антихристову руку в книгах церковных их же содержат рукотворенныя храмы и не болезнуют. и не токмо не скорбят приемлюще развращенная в книгах. но и самих тех авторов приемлюще ни едина не сокрушися, зане не за те храмы умре Христос. и того ради попусти Бог в них поставляти мерзость запустение в книгах и иконах. но горе небрегущим о прелестех в последняя времена, прежде прихода сына погибели. мнози бо глаголют и совопрошаются о пришествии льстиваго сего, како приидет. и что творити начнет, и кая знамения сотворит прельщая, а о предтечех его, иже внесут ереси погибели, ими же путь истинный похулится, никто же воспоминает. то бо есть дело лукаваго сатаны. еже прелесть убо у небрегущих укрывати, да не явно будет. а самого сына погибели страхования и чудеса всем пред очима поставляти. а во книгах поврежденных точию имя Христово остави да не блазнятся люди како может тамо быти прелесть идеже Христос именуем есть. сего не разумеют безумнии, яко июдеи именуют Бога Авраамля, и призывают Бога Исаакова, и молятся Богу Израилеву, то почто Бог отмещется и не приемлет молитву и приношения их, и вся ереси купно имя Христово во всех своих книгах именуют. почто Христос ни единаго еретика ни книги их ни молитвы их не приемлет, зане вся книги их сиречь жидовския и еретическия перестроил сатана на свою на антихристову руку. а истинный Христос Бог наш, всех святых отвращает и отревает от того. и аще издалече до антихриста сице сатана действует, то кольми, егда уже близ приходит козни своя распрострет. а мы спим небрегуще о прелестех антихристовых предтечех. не тако бо нам подобает вооружатися противу самого антихриста. зане той может во погибающих. подобает и вооружатися противу прелестей его. многих бо рече прельстит аще возможно будет и избранных. но горе небрегущим во прелестех яже строит сатана прежде пришествия антихристова, и чающим яко не насеевше прелестей в мир антихрист приидет. и яко от самого антихриста прелесть начинается. а сего не внимают яко пришествие антихристово будет по действу сатанину. и той строит ему путь гладкий. а рече исполнивше прежде своя книги церковныя, сомнительных толкованиих разумлений, яко да везде воздвигнутся споры и раздоры между християны их же Господь наш Исус Христос издалеча видя страшно предглагола, блюдите да никтоже вас прельстит. мнози бо приидут лжехристи, и лжепророцы, и лжеучители и прельстят многих. и будет тогда скорбь велия якова же не бысть от начала миру даже до ныне и не будет. горе же непраздным и доящим в тыя дни. и возгласи Господь глас. се предрекох вам, святыя же ученицы и апостоли Господни, исполнившеся сицевых учений, и страшных запрещений еже рече Господь блюдите и прочая. всегда блюдошася, и всегда бояхуся глаголюще ко всем християном. дети последняя година, слышасте яко антихрист грядет, и ныне мнози антихристи суть. и мнози будут лжеучители, иже внесут в церковь ереси погибельныя. и от искупльшаго их кровию своею Владыки Христа Господа отметающеся, и приводяще себе скорую погибель, своего им владыку антихриста. тии бо по действу сатанину внесут льстивая учения в непорочныя книги церковныя, яко да отвратят християне слухи своя от истины, и к басням их уклонятся, еже похулити Дух истинный по писанию. и возлюбити латынскую прелесть, юже аще кто любо возлюбит и присовокупит ко церковному учению то римская ереси прелесть преможет в ней церковное учение. яко же бо сатанин язык, и его лукавая премудрость купно с ним спадоша с высоты небесныя, мерзска суть Богу и святым Его. тако поистинне римским языком, и вся премудрость языка их, по отпадении от веры мерзско суть Богу и всему християнству, разве прельщенным. прельщеннии же обтичют своим злохитрством море и сушу, да ухитрят еже прииати прелесть их християном. и ови убо сами от сатаны бывают, и ини реформовании яко повествуют нецыи от них, и ини же от тех научаеми бывают по действу сатанину. и ини истребляют святыя догматы, а ини влагают лукавая. иныя споры творят с лукавством яко барышники, и иныя приводят мудрейши паче себе лукавством яко мошенники да возмутят сердца незлобивых по писанию, да возглаголют сладкая горко, а горькая сладка, и да возглаголют свет тма, а тма свет, сиречь доброе зло, а злое добро. черное бело, а белое черно. да растворяюще словеса своя с вышереченною премудростию римскаго учения. сице яко прельстити. аще возможно будет и избранныя по словеси Господню. будет бо рече тогда скорбь велия, якова не бысть от начала миру и не будет. горе непраздным и доящим в тыя дни. О люте нам яко уже постигоша нас скорбь. несть бо несть мощно детем крещенным зле, веровати добре, сиречь крещенным без истиннаго веровати во истиннаго. несть мощно по писанию. еже глаголет, креститися подобает яко прияхом, а веровати яко крестихомся. тем же аще символ трижды глаголем от лица крещаемаго, да тако верует крещаемый, яко в символе трижды исповеда, то како веровати будет не тако крестился есть. но горе непраздным матерем, яко суд себе родят, и доят по словеси Господню. но сия вся на скончание века сего Богу всех Создателю попущающу, сатана действует. идеже бо ему возможно всея славы Божия из книг истребити да свою поставить тамо половину, истребити тщится злоковарным советом ухищряет да не явна будет козней его хитрость. аще ли же и половины невозможно. то третию часть, или четвертую, точию да примесится слава его к Божией славе. гордость бо его всегда надымает глаголати, да буду подобен Вышнему, и того ради ищет да приобщится слава его в человецех наипаче же во християнех. и аще не главу имети будет, то поне руку или ногу или перст един, сиречь не явно обнажит от всея веры яко прельстити адова врата, то поне тайною хитростию влагающе мерзость запустение во церковныя догмата. да будет в них утаенная хула на Бога и на святых Его. и влагающе мерзость запустение во крещении, и священства, да утаенна мерзость к Богу и крещения, и священства в человецех а они мнятся вся та цела содержати, а о прелести последних времен не внимают. и яко прелести исполнится весь мир, и потом антихрист приидет. сего сатана людем и в разум взяти не допущает, да не како ощутивше прелесть отбегнут лукавства сатанина. и от антихристовых прелестей како избудут поучатися и советовати начнут, и то есть брань вселукаваго диявола, на род человеческий, в последняя времена. яже уже нас явно постигоша, и прелестей антихристовых весь мир исполнен есть, и вся языки прежде просвещеныя святым крещением давно истопоша уже во прелести римскаго учения, во многоразличных гресех, и все готови суть со жидами повинутися ложным чудесем антихриста сына погибели. но о люте нам, яко и наш словенский язык, аще и последний во просвещении, но ни един от прежде просвещенных язык, тако всещедро от Бога ударован и обрадован. яко язык наш, иже не токмо полнотою благочестивых Христовых и апостольских и соборных преданий догмат святыя веры исполнен есть. из греческаго непорочнаго языка вся святыя книги преведены суть. но пребогатое человеколюбие являя на нас Христос Бог наш все цело языку разных земель, сиречь муровльской болгарской малороссийской, и белороссийской. и всему исполнению великия премудрости независтно исполненную грамоту даровал есть. ею же уже ныне не к тому похвалимся. примесибося уже и нашего языка книгам богохульное римское учение, со вселукавыми и злохитро утаенными прелестьми сице лукаво, яко многим не разумети, ниже познавати коварства их тех, но последних униятов, тако бо исткаша новосоставленныя книги с разными лестьми, яко бывает платно делано постава сутком, тако и книги наши имя точию российских книг содержат. а яже внутрь то Богу судить. от многих поне малая воспомянем, наченше повесть от богомерских жидов, четыреста лет тому скончася. егда богомерский народ жидовский от всех стран собравшеся совет сотвориша о законопреступном окаянстве своея жидовския ереси. како поживут в разсеянии разных стран глаголя. чаяние наше удалися на земли ждуще мессия. и отвсюду изгоняеми есмы, носяще на себе гнев Божий, и поругание от всех язык, не имуще царя, ни града на земли. где бы есмы главу приклонили; и гои нарицаемыи християне. всегда и везде сокрушают души наша глаголя: то вам за то яко исполнили есте меру отец ваших. они бо избиша пророков, а вы проповеданнаго от пророк, и нарицают правдивым месияшом Христа, Его же убиша отцы наши во Иеросалиме, при Понтийстем Пилате. его же предающе Пилату возопиша вси, глаголя: кровь Его на нас, и на чадех наших. а к сему на горшее нам отрекошася и царя глаголюще: не имамы царя, но токмо кесаря. а ныне что сотворим вне святаго града скитающеся. а Господу от нас несть молитвы, ни жертвы ни приношения, ни празднования, ни суботства, точию закон Моисеов в руках содержим, носяще того без пользы нашея, прочее что сотворим, ни ли лучьшим нам будет. аще и вне града святаго по закону Моисеову Богу молитися и празновати. да не ругаются нам, глаголя. писано есть о вас июдеох. яко будет вам беда велия на земли, и гнев на людех сих Божий на вас, и падете во острия меча, и пленени будите во вся языки. яко дние на вас суть, вашего отомщения. безчисленная глаголют нам ругающеся. и тако они дерзнуша по действу сатанину составити законопреступную книгу нареченную Толмут. и не точию уставили праздники свои и посты и суботы, богомерзкими догматы глаголя. нам вся мощна суть глаголати и творити разве яко да не прогневаем Бога израилева, молящеся во псалмех глаголя. яко же глаголахом будуще во святом граде глаголя. Господи прибежище бысть нам в род и род, и прочая. а ныне скитающимся нам в распленении во чюжих землях. несть мощно тако глаголати, Господи прибежище бысть нам в род и род и прочая. ныне подобает нам глаголати, яко прибежище иногда был еси нам. и иная словеса во псалмех Давыдовых, егда глаголахом яко от Господа милость и много от Него избавлении. ныне же всего того лишаемся не можем тако глаголати. но глаголем, яко у Господа милость и много избавление. но не к нам ныне скитающимся. и иная безумныя и богомерския глаголы положиша во предреченную книгу свою глаголемую Толмут. и им же вся сия подобнии им богоотступницы римляне ласкательно похваливше рекоша, тако творяще спасетеся. точию держитеся закона Моисеова и пророков. и тако римляне унею прияша, и вси книги новаго и ветхаго завета на жидовский перевод на антихристову руку преписаша и истолковаша. и тако всему миру предают, имуще прельстити своих рачителей, да вси станут тылом на восток, а лицем на запад. да вси глаголют развращенна и поют развращенная похваляюще закон Моисеов, и римское учение, и опресноки жидовския, и хулу на Святый Дух, и небрежением о словесех Господа истиннаго Бога нашего. и небрежением о святом божественном евангелии, и богохульно глаголати, яко не подобает словес Христовых тако приимати яко глаголет. обретаем бо Его глаголюща противная своим сдловесем. и иныя богохульныя глаголы ложныя на Христа истиннаго Бога нашего. и еже отврещися сугуба Христа по воплощении, и богомерзско глаголати лжуще на Господа и на святое евангелие [Скрижаль лист 94, 99], идеже бо глаголет Господь. аще кто речет слово на Сына Человеческаго, отпустится ему. они же сие слово Господне превратиша по лукавому совету их глаголя, аще кто речет слово на Сына, отпустится ему. а Человеческаго отвергоша, но о долготерпения Божия. како земля стерпе, како не пожре сатаниных угодников за сие лукавство. еже искати лжи на истинну Сына Божия. Зри христолюбче, како тя ищут лестию отвратити от Христа истиннаго, а превратити ко антихристу сыну погибели. все бо их мудрование по действу сатанину, еже хулу наводити на Христа Спаса нашего, и на святое Христово евангелие. и на всяко божественное писание глаголя: яко писмо убивает. ты же зри. апостол Ияков глаголет, яко писмо сиречь литера убивает а Дух животворит. а они глаголют яко писмо убивает, да омерзят нам чтения божественных писаний, могуще нас умудрити по писанию. паки зри дерзость нечестивых, яко Христос глаголет. и яко обретаем Христа противу себе глаголюща. иже речет на Сына отпустится ему. а иже речет на Святаго Духа не отпустится ему ни в сем веце ни в будущем. и яко аще приимем яко Христос глаголет то болий будет, Дух Святый нежели Сын. ты же смотри христолюбче и разсуждай праведно своего ради спасения. разсуждай паки глаголю да не со антихристом осужден будеши. тако ли Христос глаголет яко они лгут лесть сокрывающе, еще ли тех не наричеши вторыми жидами. еще не возненавидиши злоковарнаго их мудрования. прочти глаголю прочти да не посрамишися, яко пролазя инуде, а не дверию словес Христовых тать есть и разбойник. паки глаголю да не прельщаемся, сугуба быти Христа по воплощении. где вера християнская яко глаголет, яко Господь наш Исус Христос, сугуб есть естеством а не составом есть по воплощении. еще же не наречеши их монофелиты, сиречь единовольники, их же святый вселенский собор 6-й, анафеме предаде. паки небо и земля вся свидетельствует, яко святый Иоанн Богослов написа три соборных послании сице глаголет. всяк преступаяй и не пребываяй во учении Христове Бога не имать. и паки аще кто грядет к вам, а сего учения не приносит, не приемлите его в дом, и радоватися ему не глаголите. глаголяй бо ему радоватися, сообщается вере и делом его злым. и сего ради сице страшнаго словеси, не могуще сатана с лестию смешати умудрил своими угодники отторгати прочь от святых двух соборных посланий второго и третьяго святаго Иоанна Богослова, написали едино соборное послание. первое а второе и третие не Иоанн Богослов написал но ин некто старец Иоанн его же гроб и до ныне близ Ефеса обретается. и положиша ложь пред евангелием Иоанна Богослова. ты же ми смотри христолюбче злоковарнаго совета сатанина. како поставив богмерзкую ересь сугубо и трегубо и множае их, между словами святаго Афанасия положиша глаголя, яко сия Афанасий великий глаголя: сиречь яко писмо убивает, и явно обретаем Христа противу себе глаголюща. и яко глаголет Христос, яко аще кто речет слово на Сына отпустится ему. а иже речет на Святаго Духа не отпустится ему ни в сем веце ни в будущем. и яко аще тако приимем яко Христос глаголет, то болий Дух паче от Отца и Сына, и паки да не прельщаемся глаголати сугуба быти Христа. по соединению Божества с человечеством, внимай паки глаголю внимай христолюбче. блюдый себе, да не впадеши в сеть дияволю. видиши бо явно, како враг льстит своими угодники, инде святых облыгает ересми. а инде святых прочь отлагает, от страшных словес Христовых, а приглаголют та недовЕдомому старцу, да ухитрит аки того старца вольно послушати. несть бо от апостол Христовых. О христолюбче внимай и блюди себе, ров бо копают под тобою, а ты не чуеши. востани отряси сон, дондеже еще время имать ощутися. аще жив еси, ибо точию мерзость запустения поставляют бояся но и числа на листех не полагают да мощно будет истребити их от книг их новых, да выдравше рекут, яко никогда же писахом таковых листов. но несть мощно утаитися коварству их. паки они обещашася, аще кто речет молитву Исусову, а в ней помянет Сына Божия не отвещати аминь. внимай христолюбче, не явно ли враждуют Сыну Божию. Ему же дарова Бог имя паче всякаго имене, еже есть Сын Божий. прочти во Апостоле о сем. прочти в Беседах Златоустовых. прочти в Лествичнике лист, 105. и обрящеши в молитве Исусове Сына Божия. прочти в послании соборном святаго Богослова [послан 1 зач., 6], и обрящеши страшный суд на отметающихся Сына Божия, глаголющь. всяк отметаяйся Сына ни Отца имать. а исповедаяй Сына и Отца имать. Зри и разумей жида с християны. и паки молитва в Потребнике над крещенным стояла сице, да не утаится в воде сей демон темный, ниже да снидет со крещающимся дух лукавый, и прочая. а они-то слово своею мудростию исправили сице. ниже да снидет со крещающимся молимтися дух лукавый, егда же то их исправление благочестивии людие нарекоша нечестием, и не молитвою. но духу лукавому примешение. тогда они во других Потребниках исправили на горший свой стыд. глаголя сице, да снидет со крещающимся молимтися (Господи) дух лукавый помрачение помыслом наводяй. кто может сию молитву тако зазорно глаголати во християнех; не дивно яко сие тако претвориша, но и в великой Павечерни стихи молитвенныя ко Пресвятой Богородице, и ко всем святым стояла сице. всяк стих кончающе молите Бога о нас грешных. а они исправили на свою руку глаголя. точию молите о нас. како сия их мудрость не возмутивыи церковию. лицу бо Божию свойственная догмата, или молитва, отвращают от лица Божия, и насильством пригибают к лицу его же ждут, ему же работают. церковь бо святая всегда поет кончающи всякое правило глаголя, Господи помилуй 2-жды, Господи благослови. а они исправили на свою руку глаголя. Господи помилуй, 2-жды, благослови. неведомо кто, ни Бог ни поп, но ин некто глаголют благослови. паки святую аллилуию трижды глаголет ко триипостасному Божеству, а четвертое неведомо кому глаголют слава Тебе Боже. по соединении небесной церкви со земною, устроил Господь наш Исус Христос согласно пети яко на небеси трисвятую славу Божию ангельским языком дважды глаголати аллилуия аллилуия, а человечески глагола почетше крови ради Христовы, равно приемлюще яко и ангельский устроил глаголати 3-жды, аллилуия аллилуия слава Тебе Боже. глаголати же сие 3-жды поистинне. егда возглаголем 2-жды аллилуия в третие слава Тебе Боже. Егда же возглаголем аллилуия 3-жды. то не треба глаголати слава Тебе Боже. возмнится бо четвертому лицу сей глаголет, а не ко триипостасному Божеству глаголати. аллилуия бо ничто же ино изтолкова Бог во церкви разве слава Тебе Боже. тако бо прият церковь от начала веры и удержа до ныне. тако многажды показа Бог на посрамление противящихся. тако бо прописася в каноне преподобнаго Ефросина, тако в Стоглаве. тако у Максима грека. тако и во веки пребудет во церкви. а четверицу почитающим судит Бог. князь бо века сего ничто же имать и во Христе Бозе нашем, по словеси Господню. паки Пресвятую Богородицу, от начала веры Христовы, церковь именова, и именует, Заступницу христианом, а они последующе немцом безчестно наричут, Предстательницею или Предстательством. ты же о христолюбче разсуди, что честнее Заступнице или Предстательнице, аще невозможно разсудити то аз ти покажу. яко небо от земли, тако Заступница от предстательства. паки церковь Христова прият пети и до ныне поет величие Пресвятыя Богородицы глаголя, с небесными вои тя величаем. а они премудрили на свою руку, глаголя и бесплотными лики тя величаем. ты же зри христолюбче небесныи вои вси святии суть, воистинну величают, а бесплотныи не вси святии суть, и не вси величают Богородицу. отнюду же не вемы с коими лики нынешнии мудрецы величают. мы же непрестанно с небесными вои Богородицу величаем. паки церковь Христова прият пети, и до ныне поет непременно, Честнейшую херувим, и Славнейшую воистину серафим, и прочая. а они премудрили последующе люторяном глаголя, Честнейшую и Славнейшую без сравнения серафим. ты же смотри христолюбче, аще бы веровали яко воистинну честнейшая есть, то бы не изметали еже воистинну. и не прилагали бы сомнительнаго сего без сравнения. а инии от них глаголют, яко то слово воистинну клятвенно есть. а писание клятву всякую возбраняют, и того ради клятву оложивше положихом без сравнения да не согрешаем. зри христолюбче хулу на Христа, сам бо Господь утвержающе всяку правду глаголет, воистинну глаголя. аще пребудите в словеси Моем воистинну ученицы Мои будите, и паки, видев Господь Нафанаила грядуща, глагола о нем. сей воистинну израильтянин, в нем же несть льсти. Зри христолюбче, Христос ли согрешил есть глаголя, не буди то. тем же суемудрие ничтоже ино ищет точию еже похулити и показати неправду, в Нем показа, яко инде тако глаголет, а инде инако противу своим глаголом глаголюща, показати хулу на Пресвятую Богородицу, еже есть без сравнения, а сравнение будет в день суда Божия. а ныне честнейшая с коньди?цыями, сиречь без сравнения без поверстания. кто будет достоин честнейши быти; херувими ли, или Мария; юже не нарицают еретицы Богородицу. сия и сим подобная блядословят еретицы хуляще Пресвятую Богородицу. ты же смотри о христолюбче, како отъемши воистинну возглаголеши без воистинну сиречь без сравнения честнейшую. разсуждай дондеже жив еси, кое слово честнейшее есть по сравнению ли честнейшую глаголати Богородицу. или без сравнения; по разсуждению ли, или без разсуждения; по разбору ли или без разбору; по верстанию ли или без верстания. и тако разсудивше, вопроси мнящихся мудрецов. чесо ради извергше воистинну; а без сравнения положиша разве да сами извержени будут от лица Христова, и несть им помощи ни заступления от Пресвятыя Богородицы ни в настоящей сей жизни, ни во время исхода, ни в день праведнаго суда, за едино без сравнение, аще не возрыдают прежде своего скончания. паки пророком Иоилем глаголет Господь Бог. излию от Духа Моего глаголет Господь Бог прежде события. егда же прииде время события, и прииде совершение пророчеству. тогда глагола Петр апостол ко всему народу, яко вознесеся Христос, обетование Святаго Духа приим от Отца, и излия. а они премудрили Духа Святаго истощение напечатали сице: от отеческих и божественных недр истощих себе, но понеже благодать Божия никогда же истощевается ниже оскудевает. наипаче же поелику изливается потолику и преизобилует. и паки сего учения церковь навыкше поет песнь пророка Аввакума глаголя, пою тя слухом бо Господи услышах и убояхся, до мене бо прииде, мене ища заблуждьшаго. а они тому не веруют событию переправили на антихристову руку, глаголя купно со жидами. до мене бо идеши, мене ища заблуждьшаго. О горе небрегущим яко врази Христовы, и врази наши подражают нас, а мы не ощютимся, человече ощутися грабят пред тобою. паки церковь Христова поет образ события глаголя, всяко отроча ложесна разверзая свято Богови, а они ругаются Богу, и Его святому всему новому, и всему ветхому закону, переправили то на антихристову руку, блудодеяние похваляюще глаголя. всяк мужеск пол разверзая ложесна свят Богу. внимай человече, аще всяк мужеск пол разверзая ложесна свят. то и стар и млад и средний разверзая ложесна свят есть. а разверзение ложесна свят есть. а разверзение ложесн растление девства бывает. и того ради образ видим в первородных отрочатех а не истинну. вси бо тии отверстными ложесны взыдоша. нам же сие событие устрои Бог в перворожденном от Пречистыя и Нетленныя Святыя Матере. яже прежде рожества Дева, и в рожестве Дева, и по рожестве паки Девая. а тех премудрых сатана научил пети яко ему годе есть, не токмо бо похвали блудное растление девьства, но и свято нарицает глаголя. всяк мужеск пол разверзая ложесна свят Богу, где християнство, где святая богословия где святолепное пение церковное, не токмо бо истребиша вся, и превратиша все християнство и людей. но везде мерзость запустения яко песку умножившуся в книгах поставиша. о них же пишуще, аще не препокою пера, то конца не будет за немощь мою; но и еще прочее услышим что глаголет прелесть, и како ругается Богу горее жидов. како ищет хулу на истиннаго Христа Бога нашего, и како вводит славу антихристову, мешающе того славу со славою Божиею. да отвратит от Бога людей мешаниною, ея же ненавидит Бог. внемлите людие чесо ради нарицаетеся християне. аще веруете во Христа внемлите. аще любите внемлите. аще ненавидите антихриста. внемлите, почто истинный Христос прииде. и почто ложный грядет, да погубит мир. доколе спим и не ощутимся, како спим и храпим, а лев графы сатанины под нами суть, како спим а граматы его в недрах наших. како не ощущаем; яко сатана строит своего антихриста по действу своему лукавому. како уже вомешал своя лукавая догмата с церковными. ведый яко примешания ради лукавых догмат с церковными отвратится Бог, ничто же бо хощет обще имети с велияром. вся сия збышася, а мы спим, почто не приемлет Бог моления и молитв, разве примешания лукавых с церковными, еже бо молитися Господи, дух лукавый. Бог ли услышит не буди то, или до мене бо идеши, мене ища заблуждьшаго, не буди то, или слава сия будет преподобным Его. ино бо есть еже пети от лица пророча, а ино от лица церкви Христовы. слава бо уже есть всем преподобным, и радуются уже благодатию Христовою на ложах своих в райском пространстве, прииде бо Христос и разори ада свободи святых своих и возведе их в рай. суще радуются благодарно. и мы с ними благодаряще Христа Спаса купно радуемся, а не инаго ждем яко жидове ждут своея погибели по действу сатанину, им же последующе нынешнии мудрецы отвращающеся Христа Спаса своего, подают руку антихристу сыну погибели, и вся святыя догмата претворяюще на антихристову руку. яко же воспомянухом, и якоже прочее воспомянем. друг бо Христов должен быти враг антихристов. аще ли кто не хощет враждовати антихристу, той не может быти друг Христу Богу нашему, иже глаголет несть со Мною на Мя есть, и иже не собирает со Мною, той расточает. Зри христолюбче и внимай, яко должни есмы за славу и честь умрети Христа истиннаго Бога. а привращают ко льстивому антихристу. его же жидове ждут с развращенными християны, им же бог чрево. о них же паки глаголют: како приемши святыя догматы, святых вселенских соборов смеяху претворяти, церковь бо поет. благословим Отца и Сына и Святаго Духа. а они пременивше адской премудрости Савелия еретика сливающе лица Святыя Троицы глаголют, благословим Отца Сына и Святаго Духа. а не хотящим тако глаголати препятою морочат, ты же зри христолюбче и внимай глаголемая, аще Отец Сын, то где Святая Троица будет, ин бо веруем есть состав Отечь, ин Сыневен, ин Святаго Духа, едино есть Божество, а три лица, и не может быти лице Отчее лицем Сыновним, ниже лицем Святаго Духа, а глаголющаго Отца Сына и с Савелием часть, и общая анафема. несть бо Отец Сын, ниже паки Сын Отец, подобне же и Святый Дух, несть ни Отец ни Сын но три едино суть. проспитеся философы проспитеся богословы. паки церковь Христова, всяко пение кончающе вопием. молитвами Богородицы помилуй нас. а они премудрили на свой болван, глаголя: Богородицею помилуй нас. Зри христолюбче и внимай что есть Богородицею помилуй нас. и кий разум в словеси сем, еже Богородицы ради помилуй нас. то слово чести есть Богородичныя, зане Та предстоит ко царствующему Сыну и Богу своему на небесех. и Тоя ради молимся помиловати нас. что есть паки вопрошаю коея чести сие слово, или коея пользы еже Богородицею послатися милости; вместо ангела глаголют, по люторски. или на вящшее безчестие Пресвятыя Богородицы, яко есть ругающеся. просите у кого некия силы в работу глаголя Оною сицею помилуй нас вместо милости. О небо где громы твоя прочее да скажут нам что есть еже глаголют Богородицею помилуй нас. разве ереси калвиниковы, иже блядословят на Пресвятую Богородицу небесную Царицу нашу. яко Мария по рождении Исуса, имеяше дети со Иосифом. их же ереси наследницы везде ныне в книгах прочетше Богородительницу. О земля; где пропасти твоя, да пожреши врагов Пресвятыя Богородицы, написаша детородительницу возлагающе жидовскую хулу на Пресвятую Богородицу, ея же пиянии сластолюбцы и властолюбцы ни ощущают ни разсуждают. да ни сана отлучени будут. паки почетши в часословех написано. яко начатки естества Содетеля твари, а они Содетеля истребивши, положиша насадителю твари. ты же зри христолюбче не точию Богородительницы нашея, но и самого Сына Божия Господа нашего Исуса Христа безчестие, и разсуждай что есть содетель и что есть насадитель. кое слово чести. и кое безчестие; содетель бо творец есть, и содетель твари. а насадитель иже насаждает во оградех древеса, или овощие, сиречь капусту, ретьку чеснок и прочая. яко же избранный сосуд Христов Павел глаголет, о насаждении церковнем глаголет, аз насадих, Аполлос напоил, а Бог возрастил. тем же ни насаждая что есть, ни напаяяй но возращаяй Бог. О молния почто; не блеснеши еже ослепити досадителей. Творца твоего и Содетеля всех тварей, и паки в начале всякаго правила церковь глаголет, приидите поклонимся и припадем к самому Господу Исусу Христу Цареви Богу нашему. а они имя Господне истребивше положиша на свою им руку глаголя. приидите поклонимся и припадем к самому Христу Цареви Богу нашему. а Господа Исуса вон извергоша ис поклонения певаючи что глаголет Господь во Исайи, глаголя. Аз есмь Господь, и се есть имя Мое, и слава Моя иному не дам. и того ради извергоша Господа Исуса, да тожде поклонение принесется ими антихристу разве славы Господня. и тожде Давыд глаголет яко имя Тебе Господь, Ты един вышний по всей земли. и сего ради несть мощно превращающим по писанию на славу лукаваго, не истребляти славы Господни. ея же иному не даст Господь по писанию. и тем лукавством двема лукаве творят, сиречь из книг благочестие истребляют, и теми книгами уже без славы Господни людей прельщают, глаголя: яко теже книги и таже в них вера. точию исправлени суть на крепчайший разум. ты же смотри христолюбче, яда змеина скрытие, како истребляют славу Господню. ея же иному не даст Бог, но и сам той антихрист не приимет ни единыя книги со славою Божиею, зане та опаляет очи ему. и не может прияти тоя славы Господни, страхом сокрушает его. еже рече, славы Моея иному не дам. и того ради по действу сатанину, угодники его сосуди лукавии, истребляют из книг славу Господню. а поставляют мерзость запустения, да возможет лукавый содержати без страха. о них же многажды воспомянухом, и паки воспомянем что бо знамения содержит, сей бо Агнец заколенный за живот всего мира, на проскомидии разве самое тело Христа Бога нашего, Его же егда приносят, поют со действом согласную песнь глаголя: яко Царя всех подъемлет херувим подобящеся, и ангельскими дороносиму сущу. весь собор верных припадающе поклоняются, яко Цареви всех носиму на престоле. а они все то отметающе глаголют, и написующе яко не подобает кланятися тому прост бо хлеб есть, а не тело Христово. тело бо Христово глаголют тогда бывает, егда речет священник приимите и ядите, се тело Мое и проч. Зри христолюбче како яко же и иная вся церковная превращают на римскую ересь. тако и святую проскомидию всю отмещут, действо тоя ни во что вменяюще римским реферамониям последуют. римляне бо вся тая же с ними держаху тысящу лет, отвергоша. и своя догматы своими их соборы богомерскими составиша тако. но мерзость запустения со жиды часть им. и никтоже да мнит, яко римляне Христа именуют. но несть им пользы, чти Маргарит Златоуста на июдеов, и то же и о римлянех разумевай, яко несть им части еже Христа именуют, отвергошася святыя соборныя и апостольския церкви, ея же Христос созда на камени исповедания Петрова, и врата адова не одолеют ей. их же нынешнии мудрецы во всем последуют, и теми же стопами идут изметающе истинну из книг церковных, а влагающе мерзость запустения. аще и не вся купно но единое по единому, дондеже божественная измещут. а яже лукавому го?де, то покладают, яко же и римляне сотвориша. о них же не леть ми есть воспомянути зде долготы ради слова, токмо последующии им, что ныне творят. священник бо действует божественную литоргию вопиет благодарим Господа, а крилос обычное поет. достойно и праведно, сиречь благодарити Господа, согласно и единодушно со священником. а они глас пославше священником, аще речет благодарим Господа, поют и праведно есть, несогласно со священником благодарим Господа, но поклонятися Отцу и Сыну и прочая. ты же смотри христолюбче и разсуждай, своего ради спасения. да не убиет тя кознь их. чесо ради премениша слово, и вместо благодарения поставиша поклонение, еже есть мерзость перед Богом. священник бо взывает благодарити Господа, а они попу приглашая безумие, поют поклонятися а не благодарити подобает. зане не тело еще Христово, но прост хлеб предлежит. или спроста рещи по жидовски глаголют, яко не прииде Христос, и не даде плоти своея ясти. но подобает еще поклонятися да приидет, и того ради благодарения еще места не имать, но и поклонение. зри како глаголют; поклонятися Отцу Сыну, славяще два лица во едино. яко савелиане. еже бо веровати Отца быти Сына. тоже есть и поклонятися Отцу Сыну. несть бо Отец Сын. ниже Сын Отец. яко же прежде рекохом, но ина бо есть ипостасия Отча, ина Сыновня ина Святаго Духа есть Божество. а сливаяй лица триипостаснаго Божества, како услышан будет. ибо аще и поклонятся сице мерзско, глаголя: поклоняются Отцу Сыну, а не рече Отцу и Сыну, той поклон его пойдет в преисподнюю купно и с Савелиевыми поклоны, и прочих еретик, а не к Богу. тем же подобает нам вопросити тех горько дышущих богословов, извергоша благодарение с таковым лукавством а введоша поклонение сице мерско, но горе нам руси. яко припущаем к себе тех, иже окрадают нас по писанию, а мы спим забыв Бога, забыв смерть, забыв своего скончания, забыв страшнаго суда Христова, а воинство антихристово под нами. то подкопы, то шанцы, то гронаты душегубительныя подлагают, а мы не ощущаем, но ощутим некогда, егда разрушая разторгнути нас. не мни возлюбленне зряще на лице человече, человека быти. есть бо человек горее демона. зане аще бы и демон восхотел каятися то получил бы прощение. а похуливый Святаго Духа единою, не имать прощения ни в сем веце ни в будущем. како таковаго наречем человека быти, о тех бо рече Господь. яко прииде час, яко да всяк убиет вас возмнится службу приносити Богу. таковых ли наречем християны, не буди то. тии бо змиям подобящеся аки кровь высасывают веры святыя догмата из сердец человеческих разными и многоразличными коварствы. день бо и нощь труды полагают с великим тщанием, еже истребити веру, и превратити церковь Христову, и несть им мощно не трудитися в делех лукавых. зане кобальныи холопи суть вселукаваго сатаны по писанию: еже глаголет, яко мудрование плотское тако враждует Богу, яко никогда же покоритися может закону Божию. и сатана ими владеет, яко своими демоны. и тии готовят путь антихристу сыну погибели по действу и по повелению сатанину. точию ты внимай христолюбче, яко несть мощно приити антихристу и сести в церкви, дондеже не истребятся из нея святыя догмата. сосуды лукавыми по действу сатанину. нужда бо рече приити соблазном. но горе человеку, им же приходит соблазн. кто же убо ныне не видит соблазнов пришедших, кто не видит отступления от веры. кто не видит хуления на Святый Дух. кто не видит прелести помраченной, ни ли воста уже язык на язык. царство на царство, ни ли суть глади и пагубы и труси по местам. но о люте нам, яко вся сия аще начало болезнем. время бы нам уже соглядати свою веру, и свое християнство, цела ли в нас вера, и готови ли есмы за нея умрети. любим ли Христа истиннаго Бога; противимся ли лукавым догматом сына погибели; аще противимся; то и християне есмы, аще же ни, то не християне есмы по словеси Господню. иже бо речет несть со Мною на Мя есть. кий грех сравнится повреждению в вере. коего греха ищеши, его же ненавидит Бог. творяще расколы посреде людей своих. раскол насаждает мерзость запустения, раскол воспаляет гнев Божий. раскол изгонение людей Божиих. и се ти есть знамение. аще кто изгонит зловерных от среды верных: то оставльши верным покой тишины, и благоденствия наслаждаются. аще же ни, то всячески изнани будут верныя от неверных, на оставльших гнев Божий пребывает по писанию. О горе смежившим очи свои, да не видят ниже знают яко не туне гнев Божий бывает по писанию. но открывается с небеси, на всяко нечестие и неправду, человек содержащих истинну в неправде, что есть истинна в неправде; от многих бо утаено есть слово сие. донде же его время откры, сиречь на всяко нечестие открывается гнев Божий, наипаче же содержащих истинну в неправде, сиречь понеже рече Господь к Богу Отцу своему глаголя, да знают Тебе истиннаго Бога. и Его же послал еси Исуса Христа. и паки, в церкви своей устроил глаголати в символе православныя веры глаголя Бога истиннаго, от Бога истинна рожденна а не сотворена, единосущна Отцу. и прочая, и паки всякаго страха страшнее слово о Святом Дусе проглагола Господь. яко Дух истинный иже от Отца исходит, и согласно со святыми усты своими созидающе свою святую соборную и апостольскую церковь, устроил глаголати в символе православныя веры. согласно с непорочными усты своими, и в Духа Святаго Господа истиннаго и животворящаго, и прочая. и паки страшнее всякаго запрещения, и паче всякия анафемы, и горее всякия геены огненныя запрети Господь хулу на Святый Дух глаголя, аще кто речет слово хульно на Святый Дух не оставится ему ни в сий век ни в будущий. ты же смотри христолюбче, како мудрствует сатана своими угодники яко не глаголати им явно на Святый Дух лаяния хулна, но сокрывати яд смертоносный, еже есть истинна в неправде. еже глаголати яко веруем во истиннаго, но в символе истиннаго не глаголем. и тем слепых морочат глаголя, яко святии отцы в символ сего словеси Христова не прияша, еже есть и в Духа Святаго Господа истиннаго. и тако скрывают змиин яд под устнами их. убивающе весь мир еже бо отметати слово Христово от символа. тем враждовати им Христу Богу. а еже оболгати святых, тем отрицатися части с святыми во оном словеси: вси бо святии за слово Христово умрети тмами на всяк день готови беяху. и яко преступления ради единаго словеси Христова не имети Бога. добре ведяху, и яко како не бе мощно тако и не будет мощно святым сущим преступити слово Христово, и не имети Бога по писанию. тем же взыскати подобает нам. откуду прииде глас сей в род християнский. еже не прияша святии в символ истиннаго; но понеже всяк ищай обрящет по словеси Господню. и всяк веруяй во Христа блюдет в сердцы словеса Его, аще же кто не блюдет словес Христовых. сей туне глаголет, яко верует во Христа. разве аще лестию возглаголет верую во христа. его же жи?дове ждут, а истиннаго Христа словес не приемлют. той быти может во прелести, а не во християнстве. во християнех бо вера свидетельствуется блюдением словес Христовых, а не инако. а кто истиннаго Христа Бога нашего словесе не соблюдает той во инаго верует. яко же речеся, а не во истиннаго Христа: иже за ны распятие и смерть претерпети изволил есть, при Понтийстем Пилате. тем же убо время уже настоит открыти искомое. откуду привниде глагол сей яко не прияша истиннаго в символ; внимай христолюбче прежде кознь дияволю, яко губитель есть присный рода человеча, и ищет избирая стрелы на убиение человека, и обрет в божественном писании непрощенное нечестие, еже отлучает от Господа. яко всяк преступаяй и не пребываяй во учении Христове Бога не имать, а неимущему Бога кто им владетель будет, разве губитель. иже наущает преступати с небрежением словеси Христова. и тако отлучивши от Бога владеет яко пленником, и ведет аможе хощет: и паки обрет в божественном писании непрощенное нечестие. яко аще кто речет слово хульно на Святый Дух, не оставится ему, ни в сий век ни в будущий. и того ради наущает губителей мира сего, да введут хулу на Святый Дух в церковном пении. но и скрывати лестию сатаниною, яко да незнаема будет хула на Святый Дух. егда же кого введет в непрощенное нечестие сие, абие радуется о погибели человечестей, яко не оставится ему ни в сий век ни в будущий: и сице зря его от Бога отлучена и отпускную книгу непрощеннаго нечестия в руках держаща, поемлет своего пленника. и ведет аможе хощет. и велит глаголати лжу яко же хощет. и того ради с таковыми не подобает християном яко со християны беседовати, но подобает стрещися их. зане тии уже небрежения ради словес Христовых, и хуления ради на Святый Дух странен суть християнства. им же начальник быти по действу сатанину Фармос проклятый папеж римский, иже научен бысть дияволом вознебрещи о словеси Христове о Святом Дусе истинном. яко же рече, Его же Аз послю вам от Отца Дух истинный, иже от Отца исходит, и той свидетельствует о Мне, и прочая. той же Фармос главня сый геенскаго огня, востав на разум Божий и на словеса Христа Бога нашего. приложи ему на свою погибель исхождения Святаго Духа и от Сына, еже есть непрощенное нечестие и хула на Святый Дух. посем в шесть сот лет наусти диявол Михаила Рогозу унията с товарищи востати на разум Божий, и на словеса Христова. яко же рече Господь. Дух истинный от Отца исходит, той же Рогоза с товарищи на свою им погибель отвергошася, прежде истиннаго по действу сатанину. посем из символа святыя веры истиннаго истребиша. и того ради брани и раздоры не во всей ли земли польской и литовской воздвигошася на многая времена: и аще бы не бы Господь благовернаго князя Василия Острожскаго припасти благоизволив в том гонении ко вселенским патриархом, то не бы онамо спаслася всяка плоть, посем в 60 лет пошепта некто от сонмища сатанина во ухо некоему. яко святии отцы в символе святыя веры истиннаго не вложиша, но токмо Господа животворящаго нарекоша, а истиннаго аще и явно Христос нарече, яко Дух истинный: но понеже святии отцы не нарекоша, мы святым последуя не глаголем. егда же тех вопрошают правовернии, како и почто и коея ради вины преступиша слово Христово, сице страшное запрещение яко всяк преступивый слово Христово Бога не имать, символ составиша а не имущаго Бога, како святым нарещи мощно кому будет. они же не имущу ответа глаголют яко не вемы. ты же зри христолюбче кознь сонмища сатанина. яко еже лгати на святых с такою мерзостию, то добро имеют, и брань зельную поставляют. а еже како святии преступлением словеси Христова не согрешиша, и не отпадоша от Бога, то бо глаголют не вемы. прежде бо трех сот лет и вящьше, пред соборы святых отец, сын громов апостол и евангелист Иоанн Богослов, во втором своем соборном послании возгреме сице глаголяй: яко всяк преступаяй и не пребываяй во учении Христове, Бога не имать, то како бы смели святии преступити Христову богословию о Святом Дусе, коснитеся сердец ваших суемудрии. како яко же вы сами вознебрегше о самом истинном символе, отмещитеся словес Его. тако и на святых его лестно хулу составляху по совету вселукаваго сатаны: еже не прияша святых словес Христовых. лгут римляне на святых, яко глаголаху и от Сына; лгут унияты яко не глаголаху истиннаго: лжите и вы третии душехваты, яко святии отцы в символ не вложиша, и о преступлении Христове небрегоша, яко же и вы, продерите очи, отрясите сон вечныя смерти, живы ли святии суть их же облыгаете: мощно ли вам будет воззрети на них в день суда Христова. продерите паки глаголю очи, како не видите трегубаго хуления на Святый Дух. почто ругаетеся Христу Богу, отметающеся словес Его яко июдеи. они бо глаголаху яко разоряяй церковь и треми деньми созидаяй, спасися сам и сниди со креста, тако и вы глаголете, яко не подобает словес Христовых тако приимати, яко глаголет обретаем бо Его противу себе глаголюща: и аще тако приемлем яко Христос глаголет; то болий будет Дух Отца и Сына, и прочая. адския глаголы глаголете, яко годе есть вашей прелести. их же исполнисте вся книги яко песку морскаго, и везде поставлена есть от вас мерзость запустения на местех святых, идеже не подобает стояти по словеси Господню. ея же видяще мнози от християн бегают по словеси Господню, поминающе жену Лотову. а прельщени гонители гонят языком подобящеся, и ныне исполнися слово Господне, еже рече Господь. прииде час да всяк иже убиет вас возмнится службу приносити Богу. гонят бо всячески подобятся древним мучителем. и гонимым глаголют покайтеся и исповедайтеся нам, причащайтеся у нас. несть бо ваше еже разумети писания. но должни есть последовати нам пастырем. аще ни то муками, сиречь огнем гладом, и инеми ранами истязани будете. Оле непрощеннаго нечестия. оле нестерпимаго гонения, како станет дом разделишася на ся. како молитва приятна будет Богу: егда бо пол града подай Господи, а другая пол града не дай Господи. коего гласа услышит Бог: гонящих ли, или гонимых. Оле ожесточения фараона прежде смерти его. Оле гнева Божия висяща над Содомом, прежде запаления его. Оле покаяния ниневитян, им же к Богу примиришася. Оле чуднаго Финееса иже угоди Богу и преста сечь, ему же аще поревнуем и мы всячески угодим Богу престанет гнев Божий. просяй бо рече Господь приемлет, ищай обретает, и толкущему отверзается. точию аще зазрим себе в том им же Творца своего прогневахом. открывается бо гнев Божий на всяко нечестие и неправду человек содержащих истинну в неправде. аще бо согрешим в делех, то подлежит вещь покаянию. аще же согрешим в вере, наипаче же в хулении на Святый Дух, то сомнительно покаяние есть. сам глаголет Господь, яко аще кто речет слово на Святый Дух, не оставится ему ни в сий век ни в будущий по словеси Господню. наипаче же содержащих истинну в неправде, сиречь егда рекут. яко веруем во истиннаго, но не исповедуем истиннаго в символе, и се есть нечестие содержащих истинну в неправде. ты же зри христолюбче. глубину нечестия, глаголет бо Василий Великий, яко креститися подобает яко прияхом. и веровати яко крестихомся, тем же понеже прияти церковь во время крещения три краты глаголати символ святыя веры от лица крещаемаго то како может крещаемый без истиннаго рещи яко верует во истиннаго. от крещения бо всякому человеку дается вера, яко же и крещен есть, и яко в символе во время крещения три краты исповедал есть, и веровати должен есть по писанному. Зде мудрость еже блюсти благочестие от прелести. како сатана отлучивши во крещении от истиннаго, и не бранит на беседах исповедати истиннаго, ведуще яко сице исповедати ничто же вредит кознем его. тако бо должен есть веровати, яко креститися, и яко тогда исповеда а не инако. креститибося должни есмы яко прияхом. а веровати яко крестихомся без истиннаго сиречь не исповедахом во крещении, и в Духа Святаго Господа истиннаго. то како может глаголати яко веруем во истиннаго, а втораго крещения кроме еретическаго церковь Христова не остави нам. Горе зле крещающимся. Горе непраздным и доящим в тыя дни по словеси Господню. Горе нам постигоша нас прелести последних времен, мнози от святых протолковаша нам божественная писания. но от того да сущих в бедах, егда они живяху в прелестех. яже тогда людей смущаху, а не о наших нынешних сущих бедах. наших же ныне сущих бед, ниже язык по достоянию изрещи может, по словеси Господню. будет бо рече тогда скорбь велия. якова же не бысть от начала мира даже доселе. ниже будет, и ныне несть мощно избыти кому от прелести да не прекоснется нечистоте ея. аще же не делом то словом. аще же не верою то исповеданием. аще не сердцем то языком. аще не правдою, то лжею. аще не дерзостию или враждою, то малодушием и лестию. Еже отторгатися от прелести, а не мужественно стати противу ея. люблением бо жизни века сего. люблением богатства, и жен и детей и домов. разлучают нас со святым евангелием и во прелесть поревают. Но горе нам паки глаголю, яко мнози святии писаша о последних временах. яко настанут времена люта, и будет отступление от веры, от истинны слух люди отвратят. и к басням уклонятся, и путь истинны похулят: а еже како отступят и кия языки, и кия грады, и кия земли, сего негли по повелению Творца всех умолкоша. да мы бодрени будем, да мы не упиваемся, да мы взыскуем. такову же бо часть имамы во стихиях мира сего, яко и прежде нас бывшии святии. и того ради ни един от святых древних посещает нас лицом к лицу в нынешних бедах и скорбех наших. токмо остави нам Господем яко и прежде бывшим святым свое божественное писание. яко да того послушающе, и того поучающеся, и в нем щадимыя премудрости и превысокия небесныя богословии держащеся спасемся. О люте нам кто наставит нас на истинный путь, кроме истиннаго Учителя Христа Бога нашего. к Нему же аще прибегнем, аще грехов наших возрыдаем, аще словес Его послушаем, аще учение Его возлюбим, аще за слово Его яко за самого Того умрети готови будем: аще же ни то всячески услышим, не вем вас. мнози бо мнози учители иже вносят ереси погибели искупльших их Владыки отметающеся, и приводяще к себе скорую погибель купно со жидами антихриста: от них же никтоже от древних святых явственно прописа нам, ереси имена их нарицающе. но токмо глаголют яко будут ругатели по своих похотех ходящии им же путь истинный похулится. и от истинны слух отвратят. и иная безчисленная проглаголаху яко будет в последняя времена. яко не именно рекоша ниже явственно яко Рим отпадет от веры, и изгонит святых по тысящи лет от Воскресения Христова. и яко по отпадении римстем в шесть сот лет отпадут унияты, и яко по отпадении униятов в 60 лет будут новыя книги, и возмутят всю церковь Христову, иже по вселенней. но токмо проглагола истинный Бог избранным своим сосудом Павлом, яко в последняя времена отступят нецыи от веры, внемлюще духовом льстивым и учением бесовским и проч. Ты же зри христолюбче, яко не во едино время отступят. но во времена, и яко внемлюще духовом льстивым, и учением бесовским и прочая. а не божественным учением внимающе. но аще и сице известно предрече Господь, но в кое время и кто по имени отступит, сего не рече, да нас тщаливейших устроит, ко взысканию истинны. тако и пророком повеле глаголати. яко приидет Христос, а в кое время или кто мати Его будет по имени, или кто апостоли Его будут по имени, сего не изволи возвестити нам. и того ради июдеи смущахуся не верующе Христову пришествию. яко же и ныне сущии новыи июдеи не веруют, яко последняя времена постигоша нас. и яко прелести антихристовы исполнится весь мир, и яко сам той по действу сатаны скоро грядет. но глаголют яко несть писано о римском отпадении и иже яко последняя времена постигоша нас. и того ради прелесть нарицают исправлением. и глаголют яко отнележе отцы успоша вся тако пребывают доселе несть нам попечения о последних временах, ниже о прелести, ниже о антихристе. от Рима бо вся вселенная учением просвещается. отнюду же и мы ныне просветихомся. како тому отпасти иже премудро весь мир просвещает. О люте нарицающим тму просвещением, и безверие премудростию. а сего воспомянути не хотят. яко той же избранный сосуд Христов Павел, к римляном пиша глаголет, яко аще неверием июдеи отломишася; ты же верою стоиши, не высокосердствуй. но бойся. аще бо Бог естественныя ветви, сиречь июдеов не пощаде, да некако и тебе не пощадит. и аще не пребудеши во благовестии и ты отсечен будеши. Зри пророчество о римском падении, яко отсечение будет, но не сие токмо. но и сын громов в таинах своего Откровения страшнаго глаголет. яко связа Господь сатану на 1000 лет, егда же скончася 1000 лет; развязан бысть на мало время, да льстит народы, и абие возлете на небо церковное, и отторже хоботом своим третию часть звезд церковных. и сверже на землю. и в то время Рим отступи от веры Христовы. Преступи бо учение Христово, и по совету дияволю, приложи чрез учение Христово, и от Сына, и не дверию вниде, но пролазя инуде, явися тать и разбойник. и прием от змия чернаго силу его и власть великую, и нарече себе наместником Христовым. Оле долготерпения праведнаго Судии. яко своему отступнику попусти нарицатися наместником Христовым. и вся церковная преврати, и святую проскомидию от святыя литургии отверг, жидовскими опресноки литоргисати уставил есть. и прежде припевание введе. а посем по мале времени и органы внесе еже к чему припевати устроил есть. но вся сия по тысящи лет по Воскресении Христове в Риме збышася по действу сатанину. и тогда отступиша от веры римляне по писанию. о нем же великий во святителех Иоанн Златоуст глаголет в Беседах апостольских, яко сбысться слово Павлово еже рече, яко в последняя времена отступят нецыи от веры. се отступиша рече манихеи и маркиониты и прочии еретицы, тогда сущии. егда той святый светильник Златоуст глаголю живяше. к нам же что сие ныне сущим в тринадесять сот лет, по Златоусте живущим. аще бы тогда последняя времена беяху: то ныне кая нарекутся. ты же смотри христолюбче, кая словеса святаго сего, яко последними временами еще не последняя, тогда сущая нарицаше, зане единодушен бе Павлу. иже рече егда прииде кончина летом, посла Бог Сына своего и прочая. но и вси святии пишуще глаголаху яко приидоша последняя времена, яко да себе и нас устрашит скончанием мира сего. всем бо святым более жаль и большая печаль беяше о тех людех яже купно с ними живяху, а не о?на по тысящи лет хотящим жити их же не знаяху, ниже о скончании века сего ведяху, яко утаил есть Господь от всех сия святых, нам же убо ныне в самыя те последняя времена живущим, их же нам те?мижде временами открывает Господь. востанут бо рече лжехристи, и лжепророцы, и многих прельстят. востанет бо тогда язык на язык, и царство на царство и будут глади и пагубы и трусы и страхования по местом, вся же сия начало болезнем. о них же многажды рекохом, но сия вся не возмогоша нам известити совершенно, аще не бы нам времена открыл есть Господь. имеяй бо уши слышати да слышит что Дух глаголет, и побеждающему дам ясти от манны сокровенныя. и дам ему камень. и на камени имя ново написано. его же никтоже весть токмо приемляй. и паки, аще кто имать ум да почтет число зверя, и паки, связан бе сатана на тысящу лет. и что бысть егда развязася по тысящи лет. и кто есть зверь, ему же даде силу свою и престол свой и власть великую, и что по сем 666. аще бо речет имать ум да почтет число зверя, число бо человеческо есть, и число его, 666. и что бысть по шести сот лет, о них же свидетельствующи книги святыя островския. и что бысть по 60 летех. о них же свидетельствует вся вселенная. и что будет по шести летех, но и сего уже главизны являются: но вся сия мира сего любителем смех суть и игралища. и никтоже ищет воды животныя еже погасити пламень сатанин, но всяк ищет смолы и изгребия и тростия сухаго на горшее воспаления, да скорее речется в мире, мир и утверждение. да внезапу нападет на них всегубительство по писанию, о нем же многажды рехом. О горе себе губящим несмысленно. О горе себе убивающим губителем. кто нас избавит от толиких напастей, и кто нас посетит в толиких бедах. почто не приходят ко слезам нашим древнии святии учители. почто не посешают нас в гонениих, и во изгнаниих наших. а гонящии губители наши убивающии нас мнятся службу приносити Богу. и аще не бы истинный Христос Бог наш оставил нам своя божественная писания, могущая нас умудрити, то не бы спаслася всяка плоть в человецех, глаголет бо святый Истинный имеяй ключ Давыдов, отверзая и никтоже затворит: затворяяй, и никтоже отверзает. вем бо твоя дела. се дах пред тобою, двери отверсты, и никто же может затворити их. яко малу имаши силу, а соблюл еси слово Мое, и Аз тя соблюду от часа искушения, хотящаго приити на всю вселенную. кто сия глаголет Святый Истинный, что есть отверзаяй и никтоже затворит, и затворяяй никто же отверзет; сиречь не жди коего от святых древних да отверзет ти божественная писания. ниже затворити кто может кроме сего истиннаго Бога нашего, иже апостолом своим по воскресении отверзе им ум разумети писание. кроме бо Того истиннаго никтоже может, ни ангели, ни апостоли, ни святители, ни пророцы, не отверзают божественная писания, а ему же хощет отверзает Господь. то абие возглаголет в сердцы его, се дах пред тобою двери отверсты, и никтоже может затворити их. яко соблюл еси слово Мое, и Аз тя соблюду от часа искушения хотящаго приити на всю вселенную. и се есть камень бел и на камени имя ново написано святым истинным, Его же никто же весть, токмо приемляй. мнози бо от человек учими суть, и мнози от человек учители нарицаются. никтоже может быти учитель истинный, яко не может отверсти ума кому от человек, еже разумети писания. кроме единаго истиннаго учителя Христа Бога нашего. Той бо един есть Божия Премудрость и Божия сила. и Учитель и Истинный, и Путь истинный. человецы бо научишася грамматики и риторики, но и самыя философии. аще не прибегнут ко истинному Учителю Христу, то что может грамматика, и что повествует риторика, и како просветит ум тщетная философия на путь истинный. един бо философ арианин, а другий македонянин, а третий лютор, ин же кальвин, а ин римлянин, и иных множество, но сии вси учатся в римских училищах, яже суть школы латынския. а за учение не дают ничесого инаго кроме душ своих. аще бо кто возхощет совершен быти римлянин, и той не может достигнути совершеннаго учения римскаго. аще не восхощет римскаго опреснока вкусити, той абие неве?дом бывает, и конец его един Бог весть. и то его мзда за римское учение. ты же смотри христолюбче римскаго учения корысти. како сатана может в погибающих, и яко от самаго алфавита, сиречь от азбуки поемлет и не даст начинати противных ему святых догматов складати, литерами во славу и честь в Троицы славимому Богу сложенных церковию. ей же да от начала обучаются юнии славити Бога, глаголя: Царю небесный, Утешителю Душе Истинный, и прочая. Пресвятая Троица помилуй нас, и прочая. Отче наш иже еси на небесех, и прочая. святыя церковныя догмата еже наставити юных на путь истинный в церковном устройстве, во учении в начале положено суть превысокия богословии догмата. таже глаголю сатана ненавидяй славы Божия отторгает юных от предреченных святых церковных догматов. и абие скрадут своя лестная душеубийственная пострецала, римскаго учения, того ради да учатся дети церковным догматом, но костельним и богомерским хулением. о них же довольно воспомянухом во гранесии сей, чтый да разумеет что есть Божие, и что сопротивное, что спасает и что погубляет.

Богу нашему слава во веки,

Аминь.

Слово 8.

Яко не входяй дверми во двор овчий, но прелазя инуде, той тать есть и разбойник.

и яко тацки[татски] исполниша весь мир, и отвратишася от востока на запад.

а прелестей в себе и не о скончании века сего не воспоминают.

яко антихристу попущено ему будет от Господа

нарицатися богом и христом и владыкою и царем прелести.

и иная многая чтый обрящеши в сем слове в пользу себе и слышащим без сомнения.

Не входяй дверми во двор овчий, но прелазя инуде той тать есть и разбойник. а входяй дверми пастырь есть овцам, и прочая. глаголет Господь во святом евангелии. и паки, да знает дверь ею же входити нам, рече. Аз есмь дверь, Мною аще кто внидет и изыдет и пажить обрящет. тем же како может кто пролазя инуде познати Дух Божий и дух льстечь. како может познати свет и тму, или истинну и прелесть. о ней же доволно рекохом по средостении пришествия Христова, еже скончахом. ныне же нам настоит и беседа о всепагубном пришествии вселукаваго антихриста сына погибели, его же пришествие по действу сатанину, о нем пишуще мнози святии умножиша в пользу нашу. нам же убо ныне видящим исполнен прелести весь мир по действу сатанину. что рещи подобает, и како возрыдати ко Господу Богу сотворшему нас. да подаст нам молящимся молитву еже вопити нам к Нему прежде погибели нашея. о Владыко ни довлеет яко змий седмоглавый исполнив прелести весь мир. и прогнав церковь в пустыню, и испустил реку от уст своих, еже потопити ю в реце еретических блядословий, и не возмогох: ныне творит брани со оставшимися умысли семенем ея, еже мы есмы: и сие творит да устелет путь гладом своему антихристу сыну погибели. уже бо вмале пообладает рукотворенныя храмы уже вмале поизмещет святыя церковныя догмата, а своя прелести возносит лукавством. и посем введет в мир, всего мира губителя антихриста. кая польза Господи вселукаваго сего пришествия да прельстятся мнози народи, еже отступити от тебе Бога истиннаго, и поклонитися губителю врагу; а потом с ним же горети во огни безконечнем. кая польза Святый да погибнет творение руку Твоею, его же искупил еси дражайшею кровию своею. но понеже судбы Твоя бездна многа, и творяй чюдеса Ты еси Бог един. в начале Ты Господи землю основа и дела руку Твоею суть небеса: та погибнут, Ты же пребываеши. и вси яко риза обетшает и яко одежду свиеши их и изменятся. Ты же тожде еси, и лета Твоя не оскудеют. яко велий еси Ты Господи и велия крепость Твоя. и ни едино есть слово доволно к похвалению чюдес Твоих. да приидет царствие Твое, его же молящеся просим. да будет воля Твоя ея же убо чающе ждем. рекл бо еси учеником своим: се Аз с вами есмь во вся дни до скончания века. а неверным рекл еси июдеом, яко приидох во славе Отца Моего, и не приясте Мене. приидет же ин во своей славе, того приимите. паки ко учеником своим рекл еси. да никто же вас прельстит, блюдитеся. тем же всяк не ведый кончину века сего, и свое безконечное мучение в будущем веце, и к сему безвестное своего скончания, како не возрыдает всем сердцем своим, како не вострепещет всеми уды своими прежде события. оле притчи преподобнаго Варлаама о впадшем в ров капли ради маловременной сладости. всех страхования, скоро настоящих уже забывшем, ему же заклати есть вся чювства маловременная мира сего сладость: и не ощущаем безконечныя своея погибели, за малую каплю сладости мира сего: но небо и земля мимо идут, а словеса истиннаго Христа Сына Божия не имут прейти. всяк бо рече преступаяй и не пребываяй во учении Христове Бога не имать, по писанию. а не имый Бога израилева. демон ли, но той верует яко Бог един. и верует и трепещет по писанному. прочее взыщем кто каков есть той же не имать Бога. зри всяк облеченный во Христа крещением, како сатана людей Божиих облачит во антихриста. коими коварствы, коими ухищреньми и козньми, коими ловленьми и соблазны и прелестьми. всяк бо преступивый едино слово от учения Христова, отвержется Христа истиннаго Сына Божия. подает руки своя лжехристу, грядущему сыну погибели. и понеже рече Господь своим учеником и апостолом. яко слушаяй вас Мене слушает. а отметаяйся вас Мене отметается. то посему всяк преступаяй апостольское слово или учение, Бога не имать. и отвергшеся Христа истиннаго Сына Божия, подает руки антихристу сыну погибели, и паки смутивый церковь, не очистится кровию своею мученическою скончающися. чему будет подобен разве геены огненныя, яже ждет вселукаваго антихриста сына погибели, купно с предтечи его: иже за малую сладость мира сего продают учение Христово. подобящеся Июде предателю Христову. оле мудрование, еже враждует на Бога. о нем же многажды воспомянухом в беседах наших. оле мудрости яже изпражняет крест Христов, яже испражняет благочестие. яже издирает церковь Христову, яже водворяет антихриста в рукотворенныя храмы по вселенней. оле книг разлучающих человек от Бога. и присвояющих сыну погибели, а разумеваяй или взыскаяй истинны, никто же: но вси согласно глаголют. яко взираяй на началников, яко же предают нам, тако и приемлем, и они узрят, а мы не будем повиннии. не мы есмы правителие книгам, и иныя безумныя глаголы забыв реченнаго. яко всяк свое бремя понесет; прельсти змия Адама, почто игнан бысть Адам, и беду подъят. прельстиша еретицы много множество народов. сами ли точию погибоша, или и прельщении с ними, безконечную беду подъяша. всех купно до единаго. всех глаголю жидов, и еретиков, сатана прельстил есть. той ли един погибнет; ни ли и прельщеннии с ним будут; оле безумия. како земля носит, како небо терпит глаголы сия потопныя. яко же во время потопа, тогда людие ядяху и пияху женяхуся и посягаху, тако будет и в пришествие Господне, по святому евангелию. оле отвращающихся от востока на запад, и не ощущающих своего отпадения, и хотящих слышати о кончине века сего. яко будут соблазны в книгах и учениих. и яко будет философия, крадоводящих лестию вся языки. и яко явятся книги харатейныя близ кончины. в них же правдивое учение истерта будет, а прелестная на антихристову руку написана будут. и ветхости ради тех прельстятся мнози при кончине века сего, по писанию. зане святому евангелию тогда небрегому сущу, и толкованию развращенну весма на антихристову руку, и церковныя догмата святыя превращенныя с коварством, сице яко не абие превращением: но прежде отчасти, или от полу, да не явно будет коварство прелести. сиречь антихристу подати руки своя, и со лестию поклонятся в книгах своих, сыну погибели. истиннаго же Христа Сына Божия похулят не явно, но отай, и коварством прелести крадоводящею философиею. яко же изметати чести и славу единороднаго Сына Божия, во многих местех. в ню же несть мощно облещися антихристу, сыну погибели, не истребивше тоя от догмат святых церковных. егда же истребят славу истиннаго Христа Сына Божия от догмат святых церковных, то абие будут догмата уже не святыя, но новоповрежденныя. и истинный Господь наш Исус Христос Сын Бога живаго. не приимет их, и отвратится от них за мерзость их: не терпит бо Истинный отъятия, ниже приложения, и еже пременения ни мала ни велика: но вся анафема нарицает по писанию. и тогда абие всяк поврежденный догмат сатана поемлет, и велит пети во славу и хвалу своему антихристу, сыну погибели. аще и поюще пияни суще, мнятся пети Богу, уже поют антихристу а не Богу, яко уже и бысть. церковь бо Христова всегда имать пети и ныне поет, во славу и честь Господа нашего Исуса Христа, глаголя: приидите поклонимся и припадем к самому Господу Исусу Христу Цареви и Богу нашему. а немцы же реформаты переправили сие на свой церковный разум, глаголя: приидите поклонимся и припадем Христу цареви и Богу нашему. а Господа Исуса вон из такова поклонения извергоша. сие ли их поклонение Господь наш Исус Христос приимет. сего ли не вменит в мерзость запустение. не буди то. зане антихристу попустит Бог богом назватися, и христом, и владыкою и царем прелести, и иная многая имена присвоевати. но Господа Исуса именем никако не попустит ему Господь нарицатися. и того ради, аще ни сатанины угодники, истребиша из святаго поклонения имя Господа Исуса. яко да и сами своя руце подадят, и поклонятся антихристу сыну погибели, и людей незнающих разлучат с правдивыми поклонением, и отлучат от Господа Исуса. не приемлет бо Господь без своего имени никакова поклонения, и иная многая превращенная словеса и догмата, о них же много глаголахом во предреченных беседах наших, чтый да разумеет. при двух бо и триех свидетелех да станет всяк глагол верен по писанию. а прельщенным аще и от мертвых кто востанет и возглаголет; не имут веры: зане в коем любо буди догмате или словеси непрощеннаго нечестия последних времен, в хулении на Дух Святый Истинный виновнии будут. никакоже обратитися, или покоритися возмогут по писанию. зане мудрование плотское вражда на Бога. закону Божию не покаряется, ни может бо глаголет апостол. и тако поклонятся вся живущии на земли антихристу сыну погибели: зане аще бы кто был в дальнейшем расстоянии, яко восток от запада, и приял бы развращенная догмата последних времен, той всячески видя и не видел есть его, и отдалече поклонился ему есть совершенно. прочее чесо недостанет ему, разве еже истреблен будет от книг животных. а еже поклонятся зверю вси живущии на земли, а святии на той же земли живут, како не поклонятся купно со живущими на земли. зане никтоже от святых живяше на земли; аще бо и святии вси по земли хождаху в вышнем Иеросалиме живуще: по реченному, не имамы зде пребывающаго града, но грядущаго взыскуем. и паки, како может Христос в том дому обитати; иже Господа Его не прияша. на сие на земли живет, иже душею и телом, желает долгоденствий земных; и за сладость и отраду горькаго сего и многоболезненнаго века безчисленная подъемлет, труды и подвиги, и не точию сам не возводит очей своих ко живущим на небеси, идеже живет Господь его, (и яко всяк человек пришлец есть на земли а не житель) но и наследником своим на земли жити устрояет, забыв отечество свое, идеже родися, и откуду изгнан бысть, и где же пришельствует, и где созидает, и где по скончании жити будет вовеки. той живет на земли, той же земная мудрствует, земная строит, земная созидает, за земная душу свою полагает, яко скорее речется в дому его мир и утвержение, и абие нападет на дом его всегубительство, по божественномй писанию. о горе множество таковых разумов, яко многою ценою купят себе вечную погибель, а живота вечнаго даром взяти не хотят по писанию. и тии суть живущии на земли, и тии с подобными им прельщени суть, поклонятся вселукавому антихристу, убоявшеся внегда смущается земля и люди, или прелагаются горы в сердца морская. горы же прелагаеми кто виде когда или кто слыша; разве егда земля смущатися будет, тогда и горы в сердца морская прелагаеми будут: но блажен и треблажен иже не убоится тогда. а сим бываемым пред очима нашима суть. будут же лжехристи и лжепророцы. и дадят знамения велия и чюдеса, яко прельстити всех живущих на земли, аще возможно и избранныя глаголет Господь. о люте человеком тогда прельщаемым. будет бо рече тогда скорбь велия, якова не бысть от начала мира доныне, и не будет. и аще бы не прекратилися дние тии, не бы спаслася всяка плоть. избранных ради прекратятся дни тии. что реченное еже прекратитися днем избранных ради. а избытки от прекращенных где будут потребни. зде мудрость есть церковная, едино бо есть еже прекратитися днем. и еже быти от седми осмому по писанию в последняя времена, зверь бо иже бе, и несть. и се осмый есть, и от седми есть, и в пагубу идет. и се будет при кончине средостения между двою пришествию Христа Бога нашего. горе человеку обнажившуся за преступление, горе человеку изгнану сущу от прекрасныя породы райския, горе человеку возрыдавшу своего отпадения вне райския красоты, горе человеку, еже аще восхощет служити Богу, должен есть весма сокрушати себе в мире сем, да угодит Богу. горе человеку не хотящу служити Богу в мире сем. а по скончании мучиму быти вовеки. тем же изгнанным нам сущим от породы прекрасныя райския; отвсюду горе. аще бо восхощем наследити царство Божие, то многими скорбми подобает нам внити, и наследити то. аще ли же ни, то вовеки мучими будем. обаче горе тем человеком, и всуе мятемся вси живущии на земли, и до пришествия бо Спаса Христа Сына Божия в плоть, и по пришествии, аще не сохраним заповедей Господних, то погибнем вовеки. понеже не сохранихом единыя заповеди Господни в раи суще, то по изгнании сия едина возрасте нам в законе, яко глаголати Давыду: широка заповедь Твоя зело Господи, весь день поучение мое есть. и тогда не постыжуся, егда призрю на вся заповеди Твоя. а по преступлении, пепел яко хлеб ядях, и питие мое с плачем растворях. от лица гнева Твоего и ярости Твоея, яко вознес низверже мя. дние мои яко сени уклонишася, и аз яко сено иссох, обаче. всегда, горе человеку живущему на земли. и всуе мятется всяк земнородный. егда же прииде кончина летом, посла Бог Сына своего единороднаго в мир Господа Исуса Христа. да спасет погибшее, и да наставит на путь истинный глаголя сице. внидите ускими враты, яко пространная врата и широк путь, вводяй в пагубу. и мнози суть ходящии ими, зане уская врата и тесен путь вводяй в жизнь вечную, и мало их есть, иже обретают его по писанию. зри всяк живый на земли, яко широк путь вводит в погибель, а ускии врата и тесный путь вводит в живот вечный. то да взыщем коль тесен есть путь в живот вечный. и скажет великий Златоуст тесноту, яко несть мощно стати на нем купно двема ногама, но токмо единою, а по странам оба полы его стремнинами объят. обаче горе всем живущим на земли прежде закона, и в законе, и во благодати, яко всегда нуждею подобает спастися роду человеческому. и кроме прелести последних уже нас постигших времен, в ня же и скоти взирающе на высоту посрамят нас. а мы спим ничтоже взимающе о пришествии льстиваго губителя сына погибели. его же сатана строит на пагубу всего народа человеческаго, и в погибающих точию может, глаголет по писанию, но и спасаемым, кацем подобает быти нам в последняя времена Господу нашему Исусу Христу глаголющу, ко всем человеком: бдите и молитися да не внидите в напасть. мы же, о горе нам, аще и помолимся, то весма не избавлены от напасти всепагубныя, зане в совести нечистой. но о маловременных покоях печемся жития нашего, яко да долголетнии будем, да богатии будем в долготу дней наших, да умножатся нам жита (и скота) и скоти мнози, и прочая. а не о тех молимся, да не внидем в напасть. и сего ради временных не отбегаем и безмятежно жити не приемлем, и в напастех последних времен погружающеся не ощущаем. что прочее; разве прельщенным быти нам, его же жаждем по нас да впадем в сети его. отягчени суще сном прелести его. и не токмо не ощущаем и спим без боязни, но воставше играем, и насыщаемся, и пресыщаемся, и упиваемся ищем. а не паче плачемся и рыдаем, яко пришельцы есмы на земли, а не жителие. егда же приидет по действу сатанину антихрист, сын погибели, о нем же прорече сам Господь наш Исус Христос глаголя ко июдеом, яко приидох Аз во славе Отца Моего, и не приясте Мене. приидет же ин во славе своей, того приимете. паки грядет бо мира сего князь. и во Мне ничто же имать, о нем же аще приимет весть вся вселенная. и яко приход его будет по действу сатанину: еже всегда прельщати, всегда лгати, всегда убивати прелестию вся человеки чрез книги. вы бо, рече Господь, отца вашего диявола есте. и похоти отца вашего хощете творити. он человекоубийца бе искони и во истинне не стоит, яко несть истинны в нем. и всегда лжу глаголет зане ложь есть и отец лжи, глаголет Господь ко июдеом, и яко же прелестию убил есть прародителей наших еще в раи сущих, показал им плод сладок во снедь глаголя, и чести тоя же явися в ней горчае пелыни, и смерти виновен и безчестию. и тако вся человеки всегда убивает прелестию, и отлучая от Бога в безконечну погибель. время бы уже было проспатися. апостол бо Христов Петр глаголет. трезвитеся бодрствуйте супостат бо ваш диявол яко лев рыкая ходит ища кого поглотити. Иоанн же глаголет: слышасте яко антихрист грядет, и ныне антихристи мнози быша, от сего разумеваем, яко последний час есть. и избранный сосуд Христов Павел вселенныя учитель вопиет глаголя: яко не приидет день Господень, аще не будет отступление прежде. и открыется человек греха, сын погибели противник превозносяяйся паче всех глаголемых богов. и паче всех чтилищь на земли, яко сести ему в церкви Божией, аки богу. и показати себе яко бог есть. тайна бо уже рече деется беззакония, точию держай ныне дондеже от среды будет: и тогда явится беззаконник. его же Господь убиет духом уст своих, и упразднит явлением пришествия своего. и то будет конец средостения между обою пришествию Господа нашего Исуса Христа. о нем же нерадящим или небрегущим всем настоит страх вторыя смерти. чтый да разумеет что глаголет божественное писание о сем. егда приидет суетная сия надежда всесквернаго рода июдейскаго, сын погибели, и враг всего мира антихрист по действу сатанину: какову ему подобает быти, в начале своего ему пришествия, и какову являтися пртворну пред человеки; кротку, и смирену, милостиву, и учителну, сладкоглаголиву, и премудру и праведну, прежде лесть в себе сокрывающу. яко всем тогда близ его сущим, и всем приходящим видети его и глаголати о нем, яко явися на земли человек, ему же подобен никогда же виден бе. зело любити и почитати начнет народ жидовский. от них же многое множество стекшеся воздадят честь и славу. и нарекут его своим месияшом, сиречь христом. посем присовокупятся к ним во едино соединение вси ненавидящии креста истиннаго Бога нашего. от всех стран все народы не знающи нарицати имени Христова. ниже учения Его, ни крещения Его, сиречь турское вси и татарское сонмище, и инии вси во обрезании жидом последуют. и приидут и поклонятся яко царю июдейскому, чаемаго от жидов месияша, сиречь христа нарицающе: и принесут ему дары, вопрошающе имени его. той же пред всеми ими иже ему поклонятся, скажет и наречет свое им всескверное имя. еже никогда же нигде же от века не слыхано, ниже нарицати бе во всех тварех странах видимых. его же имени небесный таинник избранный сосуд Христов Павел апостол не хотяше нарещи да не осквернится от имени его, ниже да нарицается в человецех скверное нарицание. ему же удивляющеся вси нарекут его великаго бога быти по действу сатанину. той же лестию не явною и честми сановными, обратит и сердца ко устом их, яко да вси возглаголют со дерзновением и радостию. яко обретохом чаемаго от июдеов по закону их царя и бога. и ныне видим его же никто же виде, и слышим от уст его, его же никто же слыша когда. что прочее возглаголем, разве яко бог явися на земли. посем возревновав предреченным, приидут и поклонятся ему вси не знающии Бога, ниже держащии коего закона идолопоклонницы волшебницы, бусурмане и колмаки и прочия множества. и поклонятся ему, царя и бога его по себе нарицающе. посем начнет сице удивляемыи от множества народов, и сице прославляемыийвсеми языки, превозносити себе паче всякаго глаголемаго бога, или чтилища по писанию. и еже сести ему в церкви Божии, аки богу, показующе себе яко бог есть, еже творити знамения и чюдеса многа пред всеми людми. во еже веровати им вонь несумненно. и еже страшну ему являтися пред человеки. и тако пройдет слава его о знамениих и чюдесех по всей вселенней, юже послышавше вся сыны еретическия. иже не нарицают убо имя Господа нашего Исуса Христа. но и святыя веры и догматы святых соборныя и апостольския церкви отвергшеся не приемлют: и той всегда и везде по вселенней враждуют и гонят ю, за ню же Христос умре. и положи на ней знамение глаголя, аще рече мене изгнаша и вас изженут, и прочая. то сии глаголю сыны еретическия. (иже не нарицают убо имя Господа нашего Исуса Христа, и святыя веры и догматы) приидут еже удивитися ему и видети его кто и каков есть, и кая суть знамения и чюдеса его. и пришедше узрят от него знамения и чюдеса ложная пред всеми людми, и на всяк день бываемая зане в погибающих может по писанию, удивляющеся рекут по писанию между собою, что сотворим; Давыд царь и пророк глаголет к Богу израилеву, яко творяй чюдеса ты еси Бог един. сей же явно пред всем народом творит знамения и чюдеса, их же никто же может творити, разве един Бог. а еже отпадоша словес учения Сына Божия еже рече Господь, яко аще рекут вам се зде Христос, или онде, не изыдите; или в сокровищих или в пустыни не имете веры. или еже рекоша святии апостоли Христовы еже явитися во свое ему время во знамениих и чюдесех ложных, и возмогати в погибающих. или еже святии во апостолех рекоша, яко вся у сына погибели. будут законопреступная, но лестию от знамений точию ложных уверятися. яко посем во свое время антихрист противник распятому Христу есть. его же Распятый убиет духом уст своих. и тако мнится нам яко никогда же приидут и поклонятся твоему величеству, аще не велиши их с нуждею привлещи к себе, сие бо есть Исуса их. аще рекут вам се зде Христос или онде не изыдите и не имите им веры. яко же бо молния востает от востока и является до запада, тако будет и пришествие Сына Человеческаго, сице глаголет о себе Исус Назарянин распятый и погребенный, Его же вси ученицы глаголют воставша от мертвых и седяща на небесех. тогда абие сын погибели растерзав ризы своя речет, ни к тому стерплю словеси сего. аз бо с небес приидох, и на небесех никогда же поставих противна мне, но вся послушающа моего веления. зрите вси пришедшии ко мне, яко несть бог на небесех разве мене. и возрев на высоту речет сниди огнь с небеси, попаляяй вся противящаяся мне враги моя. оле смотрения всемогущаго Бога еже попусти сатане от высоты небесныя низводити огнь чюждий ложный на соблазн безчисленнаго множества народов. и яко изречет слово сие сын погибелный антихрист. абие спадет с высоты небесныя по действу сатанину с шумом, и возгремением страшным. яко всему множеству многоразличных народов пасти на землю яко мертвым. но и с подлежашими народы потрясется земля тако яко всем лежащим отчаяти живот свой. и посем речет лукавый, востаните, и егда же востанут речет к ним, что прочее глаголете о мне; они же вси поклонишася до земли, рекут к нему глаголя. о владыко и царю всех тварей, силен еси и противу кто станет ти. и понеже покорил еси вся языки живущая на земли. яко богу поклонишася твоему величеству, разве тех непокоривых о них же глаголахом твоему величеству, вчера и днесь. их же аще благоволит дух твой да поставим пред лицем твоим, яко да сам истяжеши их послушания. аще же и не поклонятся ти пред лицем твоим и пред всеми нами рабы твоими. муками истязав побиеши их. аще же и бегати начнут от рук наших, то тамо побием их идеже обрящем, яко да ни един гонзнет руку твоею царя нашего. той же отвещая речет к ним, буди буди по словеси вашему, яко же рекосте. и тогда абие возбесившеся яко пси повсюду, и яко звери дивии и яко львы готови суще на лов разбегутся растекающеся повсюду и везде гоняще и постизающе благочестивых християн хватати и связати будут. и сковаше руце и нозе, отсылати будут ко всегубителю. той же прежде на них узилище крепко повелит соградити пространно подобное аду в широту его, да тамо приводимых християн, и сам вметаемых видя глаголя, да пребудут во узах вси гладни дондеже рекут поклонимся, ему же поклонишася вси живущии на земли. и иже аще рекут поклонимся, тии да приведутся на поклонение. а не хотящии поклонитися муками да истязани будут. аще же не покарятся, то посечени будут. и посем егда исполнится узилище праведных християн окованных нищетою и железом. тогда повелит сын погибели избирающе рачителей, яко наследия Христова, и яко мудрейших, прежде уверитися сего всего забывше. а знамении точию ложными прельстившеся поклонятся ему купно со июдеи и еллины. и тогда збудется слово Господне, еже рече Господь о июдеох, яко не прейдет род сей дондеже вся сия збудется, небо и земля мимо идут, а словеса моя не имут прейти. и тако прельстившеся вси погибнут без обращения к церкви Христовой, и без покаяния, яко же бо истребит Господь от книг животных. того сатана вписует во своя ему книги, яко Июду предателя Христова. его же покаяния аще и поиска Господь и не хотяше да погибнет, аще и предатель Его есть: но той вместо покаяния удавися, вписан сый во всегубительную книгу сатанину. тако и сии понеже отвергошася святыя соборныя и апостольския церкви в животе своем, и не познали Творца своего во плоти суща, и не были написаны в книги животныя. и им бысть по словеси Господню, не всяк глаголяй Ми Господи Господи внидет во царство небесное. но творяй волю Отца Моего иже есть на небесех, и прочая. глаголет Господь многим бо речется от Господа, идите от Мене яко не знаю вас. тако и предреченнии, аще и християны себе нарицаху, но помощи Творца своего лишены суще, и знаменьми токмо и чюдесы ложными прельстившеся, купно рекут яко той есть бог, и несть разве его, и поклонятся аки богу. а посем наустит их сатана еже оклевати верных пред ним глаголя, суть нецыи иже себе нарицают християны по имени Распятаго Исуса Христа. Его же июдеи во Иеросалиме распяша, и прободоша. Его же и мы имя нарицахом. и тогда прежде егда не видехом твоего величества: Того они сице почитают и веруют глаголя яко Той есть Бог и несть разве Его и Той сотвори небо и землю и море и вся яже в них. и Того прославляем со Отцем и Духом во едином Божестве. и сице зельне веруют вонь, яко не токмо зань, но и за слово его умрети всегда готови суть. и вся веры яже суть на земли отвращающеся проклинают глаголя. един Бог наш есть Исус Христос, и несть разве инаго. и едина вера наша християнская православная, и несть разве тоя. и едино есть крещение наше, и несть разве того. и едина есть церковь наша, и несть разве тоя. и едино есть священство наше, и несть разве того. его же бо прокленет церковь наша, той вовеки проклят. а его же благословит, той вовеки благословен. и сице дерзают от начала веры их за распятаго Исуса со зелною любовию еже к нему яко глаголати им, глаголя: нам смерть за Христа живот вечный есть. зань же аще не умрем вовеки погибнем. и тако по всей вселенней во всех языцех, многим царем и многим князем и многим мучителем запрещающим еже не проповедати им распятаго Исуса, и не учити, ниже дерзати имени Его, а они никогда же ни единому запрещению не повинушася, ко убиению сами течаху глаголя: християне есмы и распятаго Исуса чтем. и тако от начала даже до ныне во вся дни мучими суще, без покаяния кончающися умирают. и конечно вемы, яко ни твоему величеству не будут послушни, ниже веру имут, ниже лицу твоему поклонятся, ни явитися восхотят держащеся учения своего Исуса. и Его же апостол, иже глаголаху, яко суетное погибающее, или яко древнии книги ваша глаголют и поют, глаголя. яко услышах и убояхся до мене бо прииде мене ища заблуждьшаго. а новыя книги глаголют, до мене идеши мене ища заблуждьшаго. которым веруете, или еже глаголют самыя книги ваши яко аще тако приимет яко Христос глаголет. то в неподобныя в мысли впадаем, обретаем бо того сопротивляющася своим глаголом. и паки, вси вы изведе. у вас поют и глаголют сугуба вашего Христа. а в книги ваши глаголют, умно услышим да не прельщаемся сугуба быти Христа веровати по соединению. и иная безчисленная неудобства и неправды ваши книги содержат. а вы им последующе сами от себе погибаете. се благоусердствую о вас отступити от лживаго сего. и отрицайтеся имени Его, и поклонитеся с прочими народы. да сотворю вас всех началники народом, и богатейшими во всех языцех. тогда вси святии мученицы купно воздвигнут на высоту со многими слезами гласы своя ко Господу глаголя. Господи излиявый дражайшую кровь свою нас ради, и не даждь во смятение ног наших. да с радостию и со дерзновением исповемы Тебе истиннаго Бога во Святей Троице единаго Отца и Сына и Святаго Духа Господа Истиннаго. и тако помолившеся Господеви, возопиют ко всегубителю: богатство твое еже рекл еси, и честь мира сего да будет в погибель с тобою, мы же жаждем прошедше мученически во врата смертная, видети Христа Бога нашего. а книги ложныя яже воспомянул еси, твои суть а не наши. твои бо их предтечи составили на свою им погибель, по действу сатаны отца твоего. всех бо тех словес яже воспомянул еси и всех таковых и ложных помраченною прелестию по действу сатанину на твою всескверную руку составленнных, яко и сатаны отца твоего, тако и тебе сына погибели отвращающеся отрицаемся, и проклинаем нам бо смерть Христа ради, живот есть. а поклоняющиися тебе вскоре от глада вси погибнут, яко же прорекоша о сем мнози от святых раби Христовы. и тогда абие возбесився сын погибели, ко множеству предстоящим ему речет: что прочее хощете слышати от них слышасте бо мое безчестие, и ктому не могу слышати их. да посецете коегождо противящихся о мне. они же тмотысящное множество народа, абие устремишася ко убиению святых, и посецающе всех возмнятся службу приносити Богу: но и телеса святых сожегше огнем. приидут и поклонятся пред антихристом сына погибели, глаголя: владыко и господи сотворихом яко же повелел еси, погубихом бо противящихся твоему величеству, прочее молим твое благоутробие да подаси нам готовую пищу, яко всегда предстояще пред тобою, домов наших не видехом. но и в домех наших поведают нам, яко уже второе лето не орют ни сеют ни жнут на землях наших, яко везде земля наша не может сотворити ни единаго плода на селех наших человеческих, но и траву селную всю солнце везде посушило есть, яко всему миру уже везде гладом изнемогати. того ради молит весь мир твое милосердие, подаждь нам пищу и скотом нашим зде сущим, и в домех наших по всей земли. устрой благоплодие, яко да вся земля тебе великому и чудному богу принесет благодарение. той иже отвещав речет к ним, аще земля яко глаголете не хощет дати плодов своих, что сотворю аз; такожде и вам зде сущим, или скотом вашим не имущим пищи. где аз возму, аще не земля даст плод свой во снедение вам же и мне. тогда паки рекут к нему предстоящии вси. о владыко не буди то зане распятаго Исуса книга, глаголет сице. яко многия тысящи от малых укрух многажды напитал есть. тебе же великому и чюдному богу всего мира: что дивно множайшая чюдеса сотворити во пищу людей своих, наипаче же егда алчют, или жаждут людие твои. той же паки речет яко всячески напитаю всех рабов моих, их же узрю запечатленных на челе и на десной руце их. и не хотящим прияти запечатления на челе и на десней руце, отвсюду им изгнанным быти сужду, да нигде же прияти будут, ниже препитани, ниже за сребро или за злато продадут пищу им да вси от глада да исчезнут. будут за упор и непослушания, посем помале времени приидут отвсюду гладнии просити пищи от новоявленнаго бога глаголюще з болезнию многою ко предстоящим ему своим сродником, что творите зде пред дивоявленным богом; а о нас попечения не имате. вся грады и вся домы ваша, и вси люди и скоти наша от глада погибают, и в мале вси погибнут: молите убо владыку великаго, и всей земли бога. да милостив будет нам, да сотворит нам землю многоплодную, а нас изнемогших уже от глада до полмертвых да препитает благодатию своею. предстоящии же рекут к ним, что к нам глаголете, яко забыхом вас, мы бо всегда предстояще молим о вас. но той не хощет послушати нас, глаголя: да приимут знамение раби мои, на челе их, и на десней руце. но сие со страхом удивляет нас яко и запечатленныя инии уже приходяще молят его да препитани будут, и ничтоже пользовашася отходят. вмале не со отчаянием, они же рекут, несть дивно и отчаянию быти. егда не видехом Бога точию веровахом, тогда благоденствовахом. егда же прииде и явися нам, вместо еже спасти нас; гладом умерщвляет нас, и понеже не хощет питати нас, сказует разум, яко не той созда нас, в чем бо того прогневахом, или в чем непослушни явихомся, за что наказует нас, почто затвори небо бездождием. и почто связа землю безплодием, кая ему польза да мы погибнем. распятого бо Бога Его же чтохом и вонь же крестихомся. Того отвергшеся забыхом. а сему поклонившеся от глада погибнем, что дивно отчаятися несть дивно, лучше бо умрети, нежели от глада изчезати нам и чадом нашим. наипаче же тем иже не знают десниц своих, ни шуиц их, ниже согрешиша в чем а ныне изсыхают на лонех наших. лучше да погубит нас. тогда вси единодушно предстоящии послышавшии сия глаголы, долу поникше пойдут ко всегубителю плачющеся и вопиюще глаголя: о пречюдный и великий в чюдесех боже, разруши нам глад яко уже напол мертвы есмы исполни землю плодов ея, пришедшии бо к нам от стран и домов наших надеющеся у нас благоденствия. и поведают нам о безчисленных и чюдных страхованиях от высоты небесныя и от моря и от земных трясений. яко несть уже мощно тамо жити. и того ради зде приидоша да улучат отраду и насладятся благих яко от тебе бога же и царя нашего. чюдеса бо твоя и знамения страшная отвсюду гонят еже поклонитися тебе всем живущим на земли, ты же не хощеши не точию отдалече сущим рабом твоим но ниже нам всегда тебе предстоящим милостив быти и препитати нас во время твоего царствования, его же весь мир конец приемлет. той же сый студа исполнь; речет ко всем предстоящим ему тогда: вскую мятетеся людие глаголя словеса их же не подобает вам глаголати. яко же бо несть аз творец ваш тако ниже могу питати вас. аз бо воцарихся, того ради да вас приносимых наслаждаюся, а не да вас питаю: вам бо откуду дам пищу, небо или земля мене послушают. яко же глаголете, никако же. чюдеса же и страхования не моя ниже от мене суть о них воспоминаете. но и сам аз аще не от вас прииму хлебы или ино что; то от глада погибну. что ми стужаете безвременно, егда не имам, где что возму, или что вам дам. тогда все множество народов от отчаяния возопиют, и вси языцы возрыдают, плачющеся вопиют, воплем великим, глаголя горам и пропастем земным: о горы, о горы падите на нас, и покрыйте. о пропасти земныя приимите нас яко не вемы чего возрыдаем. того ли еже от истины отступихом, или еже лжею прельстихомся. се збысться на нас вся глаголанная от святых, еще отдалече яко будут прелести в последния времена, и яко будет пришествие антихриста сына погибели по действу сатанину. иже нас прелестию ложных знамений погубивше. а ныне всех нас отреклся есть глаголя, яко не хощу знати вас. и яко не мои есте, ниже аз сотворих вас. ниже кая тварь послушает мене. и кая есть польза от мене. о горы, падите на нас и покрыйте нас, от гнева на нас распятаго Агньца Божия, нань же возрети нам отнюд несть мощно.

Слово 9,

О еже соедини Господь земная с небесными, и совокупи вся языки человеческия,

и устрои пети славу святыя Троицы языки человеческими купно со ангельскими,

глаголя аллилуия.

Велия тайна благочестия. Бог явися по плоти. оправдася в Дусе. показася ангелом, проповедан бысть во языцех, веровася в мире, вознесеся во славе. Дух явственно глаголет, яко в последняя времена отступят нецыи от веры, внемлюще духовом лесчим и учением бесовским. глаголет сосуд Христов Павел, и паки се тайну вам глаголю, вси бо не успнем, вси изменимся. тако скоро яко во мгновении ока, в последней трубе. аще кто християнин да услышит реченное от Павла, и да разумеет величество таин сих. еже бо рече, яко Бог явися во плоти, есть вера християнска. а еже изменимся во мгновении ока, се воскресение мертвым. аз же глаголю. понеже сия велия тайна содержит собою начаток и конец, всего християнства в веце сем: почто нерадеша о них римляне; сочиняюще седмочисленныя костельныя тайны, тех они в седмочисление не прияша. а яже сами собою нарекоша тайны, сия предают. крепка держима бе быти во отступлениих от веры. о сем чтый да разумеет, чесо ради сие творят. отступльшим бо от веры несть мощно доброхотствовати церкви Христовой, внемлют бо бесовским учениям, еже всегда гонити и разрушати догматы святыя в церкви Божией. и негде же бо не будет им мощно похулити Бога отъятием славы Его, тамо тщится приложением. ведуще реченное от Господа, яко славы Моея иному не дам, и яко грядет мира сего князь, и во Мне ничтоже имать. аще бо и мало что повредят в догматех пения; того всего догмата единаго ради слова отъятого, или приложеннаго или премененнаго отвращается Бог. и того ради глаголет церковь Христова усты великих светилник, Павла же и Златоуста, яко аще бы и ангел с небеси глаголал вам паче глаголанных, анафема да будет. отвергошася седмочисленнаго православия святых вселенских соборов, на них же действова Агнец Божий Христос, разрешая седмочисленное святых печатей да созиждет церковь свою, и да исполнит ю святых своих соборных догматов, да открыет в ней неизреченное и от века утаенное святым ангелом не ведомое таинство. в ня же желают ангели проникнути по писанию, да скажется седмию святых соборов началом и властем небесным церковию многоразличная премудрость Божия, по предложению се. и тогда явися Агнец Божий во славе своей: седмь очей знаменуя. яко аще кто дерзнет от святых седмочисленных соборных преданий отъяти что, или приложити, или пременити, или аще что худое подвигнути по писанию. не точию анафема, но и главы Агничии касатися, ищет болезнено. того бо ради Сын Вышняго от велелепныя славы сниде на землю. и бысть человек, и пострада за человека плотию, и умре за человека смертию на кресте. и тако утаившися от мучителя диявола, яко сие страждет неизреченнаго ради человеколюбия. и тако во ад сниде и узы окованных разреши, и самого диявола связа на тысящу лет, да не простирает прелести до времени дондеже скончается 1000 лет. и тако поемши за руку Адама рече сущим из Адама, внидите паки в рай. и тако воскрес из мертвых, яви неизреченное свое человеколюбие ко человеческому естеству. яко вознес на небеса человечество, посади его одесную Отца, и устрой его поклонятися пред ним всякому колену небесных и земных и преисподних и еже не бе прежде рожества Христова. сие Христос устрой быти, яко же бо вовремя рожества Христова воспеша ангели, слава в вышних Богу, и на земли мир. тако и во время воскресения своего, устроил Господь пети в церкви своей, воскресение Твое Христе Спасе. ангели поют на небеси, и нас на земли сподоби чистыми сердцы, Тебе славити. и сице совокупи и соедини Господь земную церковь со небесною. яко несть мощно ни земной церкви славити Бога без небесной, ниже небесной без земной. вся бо яже на небесех поют силы небесныя, сия и таже поет на земли церковь. и яже предаде Господь на земли святыми соборы. сия вся устрой пети на небесех, яко едиными усты и единым сердцем небесным и земным славити и воспевати пречестное и великолепое имя Твое Святыя Троицы Отца и Сына и Святаго Духа глаголя. свят свят свят Господь Саваоф исполнь небо и землю славы Его. зри зде со вниманием аще хощеши разумети, яко разум песни сея о Господе Саваофе простирается мнящеся ко иному лицу. его же аще не увеси от коего лица, или к коему лицу, ино бо есть еже лик небесный поет, а ино собор святых небесных, и кая сила тех и кто сказа в церкви о сих разньствах. то ни Господа, ни Саваофа, ниже исполнивша небо и землю разумети можеши. такова бо суть небесныя тайны, их же утаил есть Господь от премудрых и разумных и открывает та младенцем по словеси Господню. Подобне же утаися разум истинный, от многих человек во христианех о трикратной аллилуии юже пояху силы небесныя до пришествия Сына Божия в плоть, в славу и честь триипостаснаго Божества, глаголя: аллилуия аллилуия, ангельским языком. а человеческим языком, сия по всей вселенной истолкова Господь в церкви, слава Тебе Боже. егда омыл есть Господь церковь святую своею кровию, и омывши, сице возлюбил, и сице почтил. яко в равное ликование со святыми ангелы славу Святыя Троицы устроил, а славе Ея всем небесным силам поклонятися повеле: и святыя аллилуия 2-жды ангельским языком, а третие человеческим пети устроил есть. слава Тебе Боже, и понеже псалом глаголет, хвалите Господа вси языцы, и похвалите Господа вси людие. и того ради почтил есть Господь вся языки дополнением небесныя славы, яко всем языком пети троичную славу, купно со святыми ангелы, глаголя. аллилуия аллилуия слава Тебе Боже: яко да вси ангели купно со человеки, а человецы купно со ангелы неразлучно поют во славу Святыя Троицы, святая аллилуия. А еже совокуплятися гласовом купно с человеческими. и тако приносится от ангел и от человек ко Святой Троице святым аллилуием. сему служат святии ангели начаток духа имущи. иже воздыхают и болезнуют чающе скораго скончания века сего, чтый да разумеет, аще хощет не глумления бо ради положи во церкви святой аллилуия пети человеком со ангелы. и ангелом купно со человеки, того бо ради Сын Божий еже о нас совершив смотрение, и еже на земли соединив с небесными, яко да едиными усты и единым сердцем славится пречестное и великолепое имя Пресвятыя Троицы Отца и Сына и Святаго Духа, яко же поется во время божественныя литоргии. ангелом ту сущим и невидимо дароносящим, и служебне предстоящим глаголет священник сия словеса, даждь нам единеми усты, и прочее. и того ради устрой Господь пети в церкви аллилуия, глас языка человеческаго со ангельскими, во славу Святыя Троицы, аллилуия аллилуия слава Тебе Боже. и тако устрой певаемой быти аллилуия всеми языки, яже суть под небесем, аллилуия аллилуия слава Тебе Боже. нашим языком российским. А греческим устрой Господь, аллилуия аллилуия гдокса сифеос. а римским и латынским. аллилуия аллилуия глорияти бидиос. и тако всеми языки пети устрой Бог святую аллилуию. А еже ныне в последняя времена, егда нужда налагает лестию сатана, еже отступати от веры, и от истиннаго Христа Бога нашего Сына Божия отвращатися. и ко антихристу сыну погибели обращатися людем, и славу Божию к лицу сына погибели обращати по действу сатанину, тогда начинают пети аллилуия четверицею, сиречь трижды аллилуия, а четвертое слава Тебе Боже. а вопрошающим отвещают лесть сокрывающе глаголя: яко три краты глаголем аллилуия по трем лицем Божества, а четвертое слава Тебе Боже. ко всему Божеству. а небрегуще о прелести сына погибели. мы же к таковым глаголем, убойтеся Бога, како четверицу почитати нудитеся. Святая бо Троица Бог наш, славы своея иному не даст, ни чюжия приимет. и яко же бо Отец имеет и содержит все совершенное Божество. тако и Сын и Дух Святый имать и содержит все исполнение Божества. и еже сия богословия о Святой Троицы истинна есть, то нужда вам надлежит стыдетися вашея четверицы. Троица бо Святая, Бог наш не имать четвертаго лица сице чюжия не приемлет славы. яко не прият чюжаго огня в пустыни, но и приносящих погубил есть. тако будет всем приносящим чюждая Богу, а не Божия. Зде да слышит всякая главня адова, дерзающая вносити небывалая в церковь Божию. како смееши глаголати, яко Бог Отец, не все Божество. Бог Дух Святый, не все Божество: но четвертое слово прилагаеши всему Божеству и егда бо молишися, такожде и Сыну, егда молишися не всему ли Божеству молишися, тако и Святому Духу. каяждо бо ипостась во святой Троице есть всесовершенное Божество. а скудость во твоей скудости умной души является, а не в Бозе. ты бо еси слово четвертое приносити неведомому и незнаемому Богу мудруеши: не веруеши во Святую Троицу Единаго Бога, и не веруюши яко пришел есть Христос Сын Вышняго един от Святыя Троицы. яко соединил есть земная с небесными, яко уневестил есть себе земную церковь и яко представил царицу одесную себе в ризах позлащенных одеянну и преиспещренну. что есть позлащенная; разве святыя божественныя догматы в церкви: ты же разсмотри, мощно ли ти есть одеянной царице прилепити или пришити что от онучь твоих, не вся ли цветы тоя или утварь свою от Господа преданную, се цело содержаще. ничего от рубищей твоих не приимет; наипаче же четвертаго вашего аллилуия, тогда не подобает глаголати слава Тебе Боже. и аще бы подобало трижды рещи аллилуия языком человеческим, то бы рещи трижды слава Тебе Боже, а четвертое ваше где потребно будет. туне ли Христос умре, туне ли соединив земная с небесными. туне ли устрой церковь земную с небесными, туне ли повеле пети ангелом и человеком, яко единеми усты трисвятую песнь глаголя: свят свят свят Господь Саваоф, исполнь небо и землю славы Его, почто не прилагает четвертаго свят. яко суемудрствуете ко всему Божеству подобящеся вашему четвертому аллилуия. вем бо аз коегождо лице, во Святой Троице имать все. и все совершенное Божества. аз же паки вам суемудренным глаголю. яко не весте от коего лица поется песнь сия. еже свят свят свят Господь Саваоф, и прочее. и к коему лицу простирается, еже бо аллилуия, сие к Божию лицу простирается слава Тебе Боже. свят свят свят, сего не весте ниже знаете. аще бы есте ведали, то бы есте аллилуия не четверили: но знали бы есте вышнии Иеросалим, иже есть мати всех нас по апостолу. но понеже вашего ради частнаго пиянства, вам попусти Бог поглощати и последнюю вашу мудрость по писанию. и яко же бо хулником на Святый Дух не оставится ни в сий век ни в будущий: тако будет и четвертое лице славящим незнаемое. на сие бо нечестие открывается гнев Божий по писанию. но понеже о сих писа апостол Христов Павел. из него же вы испытаете глаголя, яко Павел неродившеся в Риме глаголет. аз в нем и родихся. и ложь на Павла блядословите. того ради Павел избранный сосуд есть Христов, еже лгати ему. того ли ради восхищен бе до третьяго небеси. того ли ради глаголет нам, яко не ктому живу аз, но живет во мне Христос, еже лгати, ему же не буди то. Павлова бо уста, Христова уста. но понеже не веруете и Христовым устом. иже есть царь и Господь Павлов, но ищете нань ложных словес. во еже неправду поставити нань: таково и держите языки ваша лжуще на Павла Христова апостола, и не солга бо той, яко в Риме родился есть, аще и в Тарсе киликийстем рожден есть Павел, но и в Риме всячески родился есть купне. а еже како в Тарсе, и в Риме купно родися, сего разума вы не весте. ниже знаете. и сего ради лжите на Христа, лжите на Павла, и на всех Христовых апостол лжите, и на всех святых отец. яко еже рече не рекоша в символе истиннаго. то бо дело есть лукаваго сатаны и отца вашего диявола, еже лгати. варварин бо тысящник хотяй мучити Павла известно уведав яко римлянин есть, целомудреннейше явися паче всех вас. вы же зря не видите, како не солга Павел. яко в Риме родился есть. но сие от многих вас утаил есть Бог. яко сие слово еже глаголет Павел, яко открывается гнев Божий с небеси на всяко нечестие, и неправду человек содержащих истинну в неправде. что сие слово разумеете ли; како содержите истину в неправде; но аще бы бысте четвертаго аллилуия ко троичной славе, и не содержали бысте. сия истина в неправде вашей, и не глаголали бысть яко веруем во истиннаго, но в символе не глаголем истиннаго. что сие слово; разве содержите истинну в неправде вашей. како можете веровати во истиннаго не имуще в символе истиннаго. чадо бо ваша откуду научаются вере, от символа, и того ради да убиваете их вечною смертию, содержите сию истинну в неправде. последующе учению лукавому, или еже истребили есть литеру аз из святаго символа. идеже бо стояла рожденна а не сотворена единосущна. тамо бы отъемше литеру аз истребивше и учинисте рожденна несотворена. и тою единою литерою убили есте весь мир. и не знаете како содержите истинну в неправде вашей, и страшно бо есть святой богословии, и не знаете от чего погибаете. не туне бо сатана наустил истребити от святаго символа литеру сию, но да устроит по действу своему еже быти от християн жидов, и поставили то яко еще не сотвори сего Бог, еже рожденну быти Ему доныне. и того ради литеру аз друг их Арий, глаголя. Бога истиннаго рожденна и несотворенна быти Сына Божия. и того ради Дух Святый на соборе устроил в символе глаголати рожденна а не сотворенна, и прочая. а не тако яко Арий блядословит. ныне же еще мудрование лукавое, и Ария друга своего оправдают. и Христа иже нерожденна, сиречь рожденну быти несотворенна устроиша глаголати. и того ради литеру аз из символа истребивше глаголют рожденна еще несотворенна. а еже сие еще не явно, но таящеся жидовстуют. то не явно боятбося еще да не камением от християн побиени будут. во уме же у них есть всесовершенное имуще жидовство. свидетельствует книга их Скрижаль, на листе 21. да разумеет аще хощет; никогдаже сицевой прелести быти. попусти Бог, тако ныне в последняя времена. ныне же сатана устроящаго человека подошвы выпорет. и единою литерою убивает лукаво по писанию, не точию словом единым еже есть четвертое аллилуия глаголати слава Тебе Боже. Троица Святая Бог един есть, и не приимет чюжия славы, яко чюжаго огня. сиречь и Надав бо и Авиуд, не инаго Бога творение огнь Богу принесоша, но понеже не в лепоту сия сотвориша, отверже Господь и не прият. и чюжия нарекл, и принесших во огни погубил. еже есть все быти в научение наше. не мози приложити, не мози отъяти, яже Богу устроившу. а еже суемудренно нарицают прилогом в символе истиннаго, в том им судит Бог. не по нашему бо святии отцы боялися преступити слово, или учение Христово, яко ныне творят нецыи. не точию яко хотят держати, но и держащих преданныя Богом истинным, как зубами не искусают. а святии отцы на втором соборе во истинну Духа Святаго Господа Истиннаго положиша: и смеющих отъяти что, или приложити анафеме предаша: но понеже хуление на Святый Дух не имать прощения ни в сем веце ни в будущем. того ради сатана часто на хуление Святаго Духа, своя ему сосуды устрояет, и многажды мнимых духовных людей. но духа неимущих. наущая брань творити, к церкви воспаляя сие непрощенное нечестие всесквернаго Македония. а не могуще противу словес Христовых стати, тщится воспалити гнев Божий на люди, еже содержати людем истинну в неправде, еже глаголати веруем во истиннаго, но в символе не хощем глаголати истиннаго: аще и Христос речет, но отцы не рекоша. кто сему словеси адскому поверит, разве главня геенскаго огня. ты же смотри христолюбче воспоминая глаголанная зде, како сатана вооружается на церковь, еже повредити в ней веру святую и крещение святое и священство святое, и вражду положити между Богом и святыми Его, еже лгати на святых яко ничесоже истиннаго обретается, внимай тщателно, како врагов единым замахом убивает сугубо, сиречь и хулением на Святый Дух, и враждою между Богом и святыми Его. преступление словес учения Христова. яко глаголет Богослов, всяк преступаяй, и непребываяй во учении Христове, Бога не имать. мощно ли святым было преступити слово сие Христово. прииди в чювство человече. аще еще не жидовин сый, и не облыгай святых невложением в символ истиннаго. лучше бо было всем умрети святым за истиннаго. нежели преступивше слово учения Христова, и не вложити в символ святыя веры истиннаго, где есть слышали сие слово прежде Скрижали вашея, кто и когда бо смел рещи лжу сию на святых Божиих, разве ныне вы. но Господь Истинный отсмеется вам в день лют, воньже не чаете. Богу нашему слава всегда ныне и присно и вовеки веком, аминь.

Список с епистолии

великих отцев и страдальцев за святую соборную и апостольскую церковь,

ея же должно всякому о Христе живущему прочитати и творити и да угоден будет Богови.

Занеже несть ничто же зде лестно: но вся истинна имущим ум от Господа истиннаго,

Аминь.

Неключимый раб великаго Бога и Спаса нашего Исуса Христа, диякон Божиим даром нареченный от святаго крещения, Феодор по милости Исус Христове, брату верному о Господе, в благодати тезоименитому Иоанну, присно чаду восточныя святыя церкви, радоватися и здравствовати в вере православной, яже на основании Исус Христове святии апостоли положиша в сионе, и богоноснии отцы седми вселенскими соборами, и девяти поместных утвердиша Святым Духом, и всем верным братиям. Благодать и мир от начальника веры, и совершителя Исуса. Стойте возлюбленнии, мужайтеся и утвержайтеся, и не поступно бывайте во отеческих преданиих, да с ними наследите вечное царство в горнем Иеросалиме. А еже писал еси брате, и молих отца своего святителя Христова, и прочих с ним святых отец, страдальцев подвизающихся до смерти за церковь Христову: вкупе и укреплении святых правил, и приписании руку к ним, на подтвержение гонимой церкви от антихристова воинства, и то прошение твое о Христе исполнися, а о горьких бедах належащих на вас не скорбите, вси бо хотящии о Христе Исусе благочестно жити, гоними будут, лукавии же человецы и чародеи предуспевают на горшее, прельщающе и прельщаеми, глаголет апостол Павел сосуд Христов. И тако апостольское слово действенно есть и до ныне. Но горе миру от соблазн, да и нужда им быти по словеси Христову, да познани будут благочестивии, вси кои бодрствуют во истинне Христове, и стоят неподвижно в ней. И кои дремлют в прелести противнаго духа, и шатаются в той и уклоняются в развращении, их же отведет Господь с творящими беззаконие. Мир же на вас благочестивых христианех. но вем израили будет во веки. А еже вопрошаеши о попех рукоположенных от прежних православных святителей, и соблазнившихся от Никона богоотступнаго прелести, и инако жертву приносящих. и познавшеся паки по древнему служити начаша, и таковии подлежат суду священных правил. Понеже не сопротивишася нимало прелести нововводным преданием. На то священник всяк рукополагается, яко законно страдати хощет по Златоусту, ибо добрый пастырь душу свою полагает за овца по евангелию. И они не ведуще мню своего священническаго сана, и достоинства, тако от простоты погрешиша все, и страха ради мучительских запрещений слицемериша вмале. И от таковых по нужи мощно всякую святыню приимати, непорочнаго ради на них благословения первых наших святых пастырей, и крещение и исповедь, и причащение, и прочая. Кроме же нужи никакоже от них, понеже злодейство ваша в догматех. а лучше рещи тех ныне и невозможно обрести праваго священства. О горе и увы третие прииде на всю землю зло, иже под небесем: но надеяйся на Христа истиннаго, не оставлен будет всяк православный, да и старый ставленник коснувшеся агньца неправеднаго по священномученнику Ипполиту папы Римскаго, аще паки обратившеся ко истинней службе, и с таковым намерением держати начаша священство яко и умрети за старое благочестие, а не предати паки то, от таковых достоит благословение приимати, и во всем сообщатися. помянувши Петра верховнаго апостола, яко по отречении своем плача горько, прият Христом бысть, и апостольства не отлучен. И аще не с таковым обращением и старыи попы по падении своем служат, но мыслят двоедушно, егда понуждени будут от отступников прелести новых догмат, второе и третие отступити хотят, паки вертящеся яко прах ветром в разуме своем, и в неигрательных играти смышляюще. То от таковых яко от Июды предателя чюждатися православным. Яко на время веруют, а во время напасти отпадают. Ибо апостол Христов Петр, по покаянии своем не отвержеся паки, но пострада и умре за Христа, и веру Его и душу свою положи за Христово стадо. И лучше ни от кого же наставлятися, нежели от злаго водиму быти, по Златоусту Иоанну, на послание ко евреом. беседа, 34. А которыя попы от Никона отступника ставлены, и от никониян после мору, паче же от 174 году, егда совершенно православие все отринуша древняго предания святых апостол, и богоносных отец, и оболгаша их льстивно и охулиша, нечестие же всякое прияша, и оправдаша и укрепиша, и новоразвращенныя и богомерския книги, со многими неисчетными ересми в них похвалиша, и всех еретик крещение римское и священство их гнусное прияша, их же вси святии отцы наши проклинаша, и от святыя церкви отметаша, понеже Рим всех ересей приятелище, и источник всякаго нечестия латынское мудрование богомерское. Тем отступлением своим и святыни сообщением, чюже себе сотвориша архиерейства по священным правилом святых апостол и богоносных отец седми вселенских соборов, и девяти поместных [Кормчая святых апостол прав. 47. и прав. 73 лист 149, 224 книга Кирилова лист 249 и 250, и 251], и поставляеми от них попы и дияконы несвящени суть по правилом сих. Яко вси они отступницы сами и еретицы глупии, и поставлении от них какому суду подлежат и анафеме. И православным християном ныне не подобает их благословения приимати, ни крещения ни молитвы, и с ними не молитися, ниже в домех. То есть часть антихристова воинства: и от исполнения церковнаго самовластне отсекшеся: но и от всепагубнаго сына геены, сосуда сатанина явльшагося во свое время настоящее: о нем же вам изреку Никона еретика адова пса, злейши и лютейши паче всех древних еретик иже быша под небесем. Они бо аще и зли суть, но на благочестие не возмогоша, но сами спяти быша и падоша: сей же положи всю вселенную пусту, и грады огнем неверия зажже, паче же богоборство воздвиже, и гонение велие, и благочестию кончание сотворил, и антихристово царство темное учредил. И все их действо и вера в прелести содержима суть, и укрепляема не любовию Святаго Духа, и не советом, но гордостию сатаниною, и мучением различным в том им судия истинный Христос Бог наш. А отступление их указует Дух Святый Истинный, во Апокалипсие, 13 главе, по числу зверя, 666, и книга О вере, 30 глава, и святый Ипполит папа Римский, о нем же вышереченно. Той пишет в слове своем о страшном суде и о антихристе за полторы тысящи лет и больши, отселе Святым Духом провиде о ныне наченшемся времени: и рече о пастырех злых губящих души, в та времена рече будет злый вождь, то есть неправедное священство: и ныне сбысться, и агнец неправеден, титин, то есть жертва неправая, в числе зверином. Титин бо тоже 666-м в числе состоит. Посем и инии богословцы глаголют мнози, что в последняя времена, Христовы веры не будет на земли, кроме в малых токмо останется, крыющихся в пустынях и горах. И сего ради Христос Сын Божий, в последняя дни назад не оглядываяся, бегати повеле от прелести, поминая жену Лотову. И паки глаголет: егда приидет Сын Человеческий, обрящет ли веру свою на земли. И на сие богословцы глаголют толкуя, и обрящет но не во многих, паки рече Христос: Егда узрите мерзость запустение стоящу на месте святе, и прочая, чтый да разумеет мерзость запустение неправедное священство, и прелесть антихристова на святом месте поставится, сиречь на олтари неправославная служба, еяже и видим ныне збывшееся инаго уже отступления нигде не будет везде бо бысть, последнее Русь зде, и то от часа сего на горшее происходити будет, цари нечестивыми, то суть рози антихристовы, ими силно дело все отступническое, без тех же не мощно сему быти. Два рога, от земли исходяща виде Богослов, един от тех есть, вторый же по нем будет пособитель его злу. А десять рогов инде прежде быша по престатии греческаго царства, о них же пишет Ияков жидовин в книзе своей богословии. Всяк верный да внимает и испытает писание опасно, попросив от Вышняго помощи. А лжеучителие настоящаго века сего, кони суть сатанины их же виде Иоанн Богослов, главы у них яко львовы, то есть рыскание их зверьское являет. И обтичют бо сушу и море, ища вернаго поглотити в прелесть свою. И в хвостах их жало, то есть учение смертоносное жало, его же аще кто приимет прельщенный от них, то жив не будет, во веки умрет душею и телом. А хвост то есть лесть знаменует их, прежде бо льстят и обманывают, а потом же мучат неприемлющих, в хвостах их жала пагубнаго сиречь прелести учения их смертоноснаго. Того ради судиша богоноснии отцы каноны своими правилными, ничегоже от еретик не приимати, ни благословения ни молитвы, кого еретицы благословляют и молятся о ком, того Христос Сын Божий со святыми своими проклинает, таковых отвращается гнусныя молитвы их и даров ненавидит. И от тех приносимых жертвы рече нечестивых мерзость Господеви. А еретицы и отступницы, аще кого проклинают и отлучают, то тех сам Христос благословляет, и объимает и милует: и вси святии Его похвалят таковаго. Все Бог наш еретиком противо творит. и святии Его вси о том пространно и ясно пишут. Святый Иосиф Волоцкой в книзе своей Просветителе, в последних словах о еретической клятве, яко не последует им Божий суд: и не токмо отступнической клятве, но аще и православной святитель не по правилом кого свяжет, сам связан будет от Христа. Неправедное бо запрещение не вяжется у Бога. Праведен Господь Бог наш, и несть неправды в Нем, правду возлюби правая виде лице Его, по пророку Давыду. И кроме бо отступления своего блудят и беззаконнуют чрез правила святых апостол и богоносных отец, сами началники и отступницы, не дверию внидоша во двор овчий, но тако яко татие суть и разбойницы по словеси Христову, прескочиша ограду священных правил, попы бывше в миру и растленно житие проходяще. Таковых святая правила отнюд отсекают их не быти епископом мирскому попу постригшемуся, ниже потрахили им прощают наложити, не токмо на архиерейство дерзати таковым. А они вси мирстии попы бывше кроме малых вин недостойны суть священства, но и в тяжкая впадающе превращати истинну, мняще быти исправлению, и каковы сами преступницы отеческих преданий и законов, таковых же и в причет поставляюще, неискусных писанию простаков воров же и пияниц, и гнусное житие от юности проходящих, многих и детям неискусным вручающе страшное таинство, 9 лет и менше в четцы и певцы поставляюще, и таковыми блудами исполниша церковь. И во олтари бо поп друг друга ругающе несмысляще бесящеся. Оле скаредия церковнаго и мерзости запустения на святом месте стоящия. когда[?] тако бысть у православных святителей, во дияконы их 15 лет поставляют в попы, 20 лет оных и меньши. А священная правила вся сия отмещут беззакония и анафеме предают. Вся рече кроме церковнаго предания содеянная и содеяти хотящая анафема 3-жды. И они слепыя вожди, сами себе проклинают на всяк год в неделю православия, и то дело яко игру вменяют глухия аспиды. Чтец бо и певец менши 15 лет отнюд не бывает по правилом, поддиякон 20 лет, диякон же, 25 лет поставляются. А менши того возраста, не поп по правилом святых отец. Сие бо им подобаше исправляти, а не догматы отеческия превращати, да ослепи их сатана, и ум омрачив не познати благаго в церкви, но паче беззаконие к беззаконию прилагают, и праведным и отеческим законом досаждают преступлением своим, паче же Святому Духу хулу приносят, глаголавшу усты Давыдовы святых своих, утвержающему предания, всяко бо пророчество книжно по своему сказанию не бывает, ни бо волею когда бысть человеком пророчество: но от Святаго Духа просвещаеми глаголаша Божии пророцы по божественному апостолу [Петр апостол зач. 66]. Плача достоит о таковых продерзателех, яко сами бо не ведают что творят, да и весь народ с собою погубляют прелагатаи они злии, и не диво и есть о них что тако творят волю дияволю. Глаголет Иоанн Дамаскин в слове своем на еретики, в 1-ю неделю поста. Егда бо рече диявол хощет погубити человека, тогда первее ослепляет ему ум да не познает благое. Тако и они ослеплени суще от древняго врага, и блудят без матери и без пастыря Христа, на всяко лето себе преправливают, а в познание истинны никогда же не приидут, но от часу в горшее приходят нечестие, верным же мучение прибавливати будут, на всяк год и месяц и день и час. Их бо година прииде, и область темная. Зде есть терпение святых. Явныя от никониян жиды противляются новыя. Яко оный поп богоотступный Сисой Нова града, что сослан бысть в никонове разбойстве на Вологду егда Петров [митрополицкой] посох приехав нощию в Москву и украде из церкви соборныя Никон. А тот поп бысть в шишах у татя церковнаго. И тут на Вологде пред множеством народа глагола хулныя глаголы на Христа истиннаго Бога нашего, вором называя Творца небу и земли, по делу рече жиды Христа распяли за воровство Его. Тако блядословяще скверный он поп поборник Никонов, паче же самого сатаны сын. Ему же псу бешеному нестерпеша тут християне хотяще его камением побити, он же яко волк убеже ко архиепископу на двор, к подобну себе врагу. И той укры его у себя в дому. А инии врази Христовы друзи антихристовы, и в книгах их, прилагают грешным безгрешнаго Сына Божия нарицающе сице: яко же Христос за своя согрешения распят бысть, тако и мы за своя согрешения распинаемся. А в старых святых книгах истинно стоит та речь: яко же Владыко Христос за наше согрешение распятся, тако и мы за своя согрешения распинаемся со страстми. В коей же книге тако есть; умолчим зде до времени и пождем праведнаго Судии. поне без дерзновения есмы, сиры и бедны, нужда бо есть всем рыдати, во время се, ни царя ни святителя, един бысть православный царь на земли остался, да и того не внимающаго о себе западнии еретицы, облацы темнии угасили християнское солнце, и свели во тму многия прелести, и погрузили в ров погибели, и преобразуя и света тму яко чарованием да не вникнет на истинный свой первой свет правды. Увы увы бысть и се возлюбленнии, не явно ли антихристова прелесть. Да внимаем себе, сиречь отвсюду себе не смешаем. путь бо нечестивых погибнет, и развращеннаго их учения не послушаем. Да не осудимся с ними вечно от Христа и святых Его во езеро огненное, идеже будет зверь и лживый пророк. И вси кланяющиися ему, отступницы бо и еретицы едино бо есть бегаем от них, и крыем главу свою Христа, да не разлучимся с ним во веки. Аще бы они лукавии наставницы житие свое непорочно имели, то не подобает на того испытовати по Златоусту Иоанну, и прочим святым, аще же в вере погрешат, то бегай от них, и отрицайся. Беседа ко евреом на послание, 34 приводит Златоуст Павлов глагол: повинуйтеся наставником вашим и покаряйтеся. что убо рече, егда лукав будет, не повинуемся ли; лукав како глаголеши. аще убо веры деля, то бегай его и отрицайся не токмо аще человек будет: но аще и ангел с небеси сшед, и прочее. и паки, Златоустый в 2-м послании к Тимоф.: аще бо учение имать развращенно. аще и ангел будет, не повинуемся. аще же право учит не житию внимай, но глаголом, и прочая. и что глаголю, ниже Павлу повиноватися подобает аще нечто свое глаголет, аще нечто человеческо по апостолу Христа имущему глаголюща в себе. Видесте ли братие в колику высоту дело веры возведе, крайний учитель вселенныя божественный Златоуст наказуя зело в догматех церковных нам непоступным быти подобает, и блюстися еретическаго развращеннаго учения. Той же и к галатом реченное глаголет. аще и мало что подвигнут анафема да будут. Тако бо проклинает святый Златоуст всех еретиков и отступников прелагающих пределы вечныя, яже они святии отцы положиша. А нынешнии отступницы немало что в вере православной подвигнуша, но и вся догматы превратиша, и его священнаго Златоуста творение литоргии святыя исказиша во многих местех, ово отъяша, ово свое ухоботье вмещаше тут, и вся книги развратиша, и уставы церковныя, инако и чины премениша. И таковым злохитрым лукавством своим отступническим, все исполнение российския церкви возмутиша, и всех православных християн в сумнение великое вложиша, гонение же и мучение на верных превелие воздвигоша, дабы ни един християнин явно был стараго благочестия. И се знамение есть настатия антихристова. Готовят бо ему путь предотечи его. Того ради всяку церковную истинну изметати вон умышляют да не обличен будет и опасен от истинны Христовы веры противник Христов, но на готовое место сед, и учнет последнюю прелесть свою простирати и чюдеса творити приведением, яко же глаголют богословцы о нем святии. И того ради ныне раздвоение в людех, да познает пагубник кто Божий, кто егов, кто держится преданнаго, кто колеблется, да в тех слабых человецех и век сей любящих и власть свою имать. Его же есть пришествие не просто, но по действу станину, сказует апостол Павел, и может в погибающих кои любви истинныя не прияша, во еже спастися им да суд приимут вси неверовавшеи истинне, и прочее. Сего ради Бог послет им действо льсти. Тако же и попы на два чина разсеклися студныя и мерския, как и при Илии бысть вааловы жерцы. Что же студныя тогда быша, иже кои суть жертву Богу приношаху по закону данному им, и освящени суть Богу до Ахавля отступления. Егда же повеле Ахав жертву приносити Ваалу вместо Бога, тогда они нечестиваго веления послушавше царева, и служаху Ваалу яко Богу. И сего ради студныя глаголются священники по отступлении, и сему подобни суть попы старых архиереов ставленники покинувше истинную службу отец своих, и наченше льстивую и развращенную приносити по новым служебникам еретическую жертву. Мерския же вааловы жерцы, се есть кои в новой службе поставлени суть Ваалу паче же бесом служити. И сего ради сии мерския глаголются, овии же студныя, овии же нечестивии. И суть всех вкупе их мерских и студных, пси, един Илия святый обличив и ревности Божия исполнився закла ножем аки свиней. И новыя ставленники ныне от новых отступников мерских оных, подобны к иной службе поставлени, и сии обои неправи суть духовным ножем святых отец ревностию отсекаются священства. Да по нужи от старых рукоположенцов мощно благословение приимати обратившихся паки на истинну, яко выше рехом о сем, от православных поставлении: а от новых ставленников аще и по старому служат, отнюд не подобает благословения приимати по правилом ни мало ни велико. Понеже от еретик поставлени не священи суть, но осквернени от рук их. Помяни же при Златоусте бывших християн, причетников и простых. Аще и не о вере у них бысть тогда вражда и раскол, но неправеднаго ради изгнания Златоустаго, Иоанновы ученицы великаго света, отнюд не восхотеша врагом Иоанновым сообщатися и комка??ти, от арса?ковы и от таковы части, аще и царевыми законы принуждаеми. Но мнози от них того ради и до смерти пострадаша, и к собором их не присташа. И за сие токмо с мученики причтошася добрыя овцы за благаго пастыря душа своя положиша, а он за них. Зрите же, аще за святаго мужа християне правии пострадаша и венчашася светло, а нынешнии от самого Сына Божия гонят, и хулят Его, и святых Его предания отмещут многая, и пресвятую Матерь Христову воистинну сущую Богородицу безчестят во многих местех, новых книг, а не единаго Златоуста. И како нам с таковыми врагами Божиими сообщатися ныне, не буди то. А иже глаголют нецыи слабострастнии человецы от противных, и верных, безумныя глаголы на апостольское вещание, ко евреом сие, по нужи и закону пременение бывает, и сим гласом слабость свою и отступление подпирающе, и законы Христовы многия и апостольския и отеческия превращающе, льстяще блудную свою мысль сим словом, не ведуще разума апостольскаго отнюд ни силы в нем. Сие рече апостол избранный сосуд Христов о июдейском предшедшем священстве и законе их, на время данном им до Христа Исуса. И начало тамо речи сие есть, прелагаему бо священству по нужи и закону пременение бывает [евреом зач. 316]. сице понеже и Аароново священство ветхаго завета преста, егда же Христос архиерей грядущих благ прииде и воплотися от пресвятыя Девы. И егда священство их преста тогда и закон Моисеов пременил Христос на свой благодатный закон новой. Тамо безсловесная животная закалаху архиереи на жертву, овцы и волы и птицы, зде же Христос сам изволи закалаем быти, нашего ради спасения словесный Агнец, ветхо еже упраздни священство и закон порочный. Той же апостол глаголет к жидом [евреом зач. 319], тако, аще бо бы первый закон непорочен бы был. не бы второму искалося место, тем же отъемлет первое, да второе поставит. И инде рече Павел, древняя мимо идоша и се быша вся новая. И Богослов Иоанн глаголет, закон Моисеом дан бысть. благодать же истинна Исус Христом бысть. И се есть истинна апостольскаго разума, закона ветхаго пременение: а не о догматех веры Христовы то реченно бысть, и не апостольских и отеческих преданиих еже глаголете пременение. За то бо должно есть всякому християнину страдати и умирати, а не пременяти и предавати. Слышите апостола о догматех правых, како глаголет страшно, аще рече и ангел инако благовестит вам, будет анафема, и есть. Не токмо человека проклинает, но и ангела. Сия слышавше опасно разумеваем писание, что о чем глаголет. Неведание бо, ересей породило неведение церкви раздрание сотворило, и древния обычаи изменило и превратило, неведение всех ересей злее по Златоусту. Глаголет бо Исидор Пилусиот о кривотолкующих писание по своему разуму, и не християн наричет сице, яко ниже во християнех сим быти, праведно бы было, иже тако на священная досаду наносящим писания. и не игрателних играющим, и прочая. Аще кто не верит моим словесем и отречется, и отречение ему, растешет бо его Христос польма, и часть его к неверным приложит, аминь.

Мир тебе брате, и сущим всем с тобою, тако о Христе мудрствующим да помолитеся и о нас, писано бо есть исповедайте друг другу согрешения, и молитися друг за друга, сиречь здравы будите ныне и присно и во веки веком, аминь. Да простите молю, в бедности. Писано скорым делом и без книг, токмо что Христос подал, где аще кое слово не так написано напротив книг, и вы собою исправите. А богомудраго старца Спиридония преподобнаго слова писанная на еретики, приемлите как и прочих богословцев святых Иоанна, Григория и Василия, и Дамаскина Иоанна, и иных. Той же истинный Параклит глагола в нем. Отец бо Спиридоний (отчасти) и пророк бысть, что он говорил про собор отступничей, тако и збыстся, и не едино что егда преставлялся глаголал мне: чюден муж бысть, делом и словом и в премудрости, инаго таковаго ныне несть. У подлиной епистолии по край ея, и рука приложена преосвященнаго Аввакума протопопа. Сие Аввакум протопоп чел, сие же и разумел яко истинна: к тому и руку приписал, сия дозде, аминь.

Сие послание, отца священнаго диякона Феодора, чернец Авраамий прочет, и любезно целовав, и рукою своею подписал: яко хотящим спастися, тако достоит веровать во истинну. О Спиридонии же сами разумевайте прочитая его писания.

Послание Андрея Клещеева к протопопу Аввакуму

Лучше нам да погибнет солнце, нежели да лишимся дружества яже во Христе рече блаженный Златоуст. сия же зде мною речется не просто но да в болезни сердца, внегда воспомянухом твою отеческую любовь, и по Христе дружество честнейший господине, и друже Аввакуме отче и благодателю, зело мне величайший, немалых бо мя дивств, и твоего добролюбезнаго нрава память обдержит. и страданий долговременных скорбей твоих, якоже слышах: тем же аз но и малейший друг твой, поминая твое прежнее добродетельное житие, и к Богу горящую любовь, и к нам приятельство любовное: и сия собрав во многое волненных случаях и нынешнее твое сомнение многое в догматех церковных исполненное житие. боюся глаголати да не мерзок ти явлюся, о них же и сам много подвигся и бедствовах, всевидящее око весть, Его же благодатию и человеколюбием вразумляем есть внутрь благочестивых догмат, не подобает убо и тебе, о господине, тако сомнением оставити себе погибающаго но испытовати прилежно божественная писания. и еже что порушено и застарело того и держатися, достоит же обаче и вопросити мудрейших себе ведущих разум божественных писаний, и тако по апостолу вся искушающе добра научимся держатися. а не удивися господине что ныне мнится вам аки бы нововводно нечто в церковь святую вносится. ни убо не буди то, но всяко погибшее обретается, и кривое исправляется, косвенное же отметается. и стропотное соглаждается, понеже многия греческия книги несходны с новыми рускими, и старинныя с новыми нынешними. и убо даже доднесь поелику мощно исправляются от премудрейших. о крестном же воображении и триперстнаго сложения, молю тя да не смущаешися. имаши бо известно утвержение, аще прилежно читаеши божественное писание, книгу Кирила Иеросалимскаго лист 236, пролог ноембрия в 14 день. сия есть еретическая. но читай книгу Скрыжали духовныя лист 756. к тому же и вселенских патриарх страшными клятвами сице подтвердивших. аще рече кто не первыми трема великими персты десныя руки изобразует на лицы своем образ креста, есть еретик и подражатель арменом. и сего ради имамы отлучена от Отца и Сына и Святаго Духа и проклят. истинны извещение подписа кождо их своею рукою, и вси сущии под нами християне от востока и до запада, и северныя страны, серби, и мисияне, моравляне, и мутьяне, и малая Россия, елицы не ведают Феодоритова правила, еже от неведения печатано во псалтырях со восследованием, и в глаголемых кириловых книгах. такожде творят знамение честнаго креста первыми треми великими персты десныя руки. ты же, о любезне, не буди мудр о себе, и ненаказанным не ревнуй. аще хощеши чиста пшеница обрестися во время жатвы, читай пролог 1 августа в 24 день. идеже повествуется о некоем четце Киприяне, что пострада за прекословие, иже являяся по смерти весь згорел, яко же главня горько вопия прося милости и прощения, и вину мучения исповедуя, яко сопротивляхуся рече закону и писанием, блюди господине мой да не обрящешися и ты с своими ученики, многими, соблазну ходатай, и вместо благословения клятву вечную себе приобрящеши. горе бо рече человеку имже соблазн приходит. не прогневайся Христа ради о сих моих к тебе словесех. понеже болит бо ми сердце духовне о тебе сице блазнящимся. аще бо и ревность Божию имаши но не по разуму. но ли от иконнаго писания неискуснаго смущаетеся, яко от небрежения помешены, вам же старописание быти мнится в них, указуют нецыи ревновати: а того не смотрят яко в новейших но и в старых писменных иконах много обретается неистовство у нерукотвореннаго образа Христова выя знаешь ис под брады, яко отсечены главы. и сошествие Святаго Духа вместо Богородична образа, сираго во тме стояща. писали посреди апостол, Марка евангелиста во озии орлом, Богослова же львом. понеже о Христове воскресении пишет, но и благовещение по достоинству убо архангел Гавриил предстоит; девица же седит, яко же и обыче во святая святых начасте видети ангела. нам же не подобает таким уверитися иконами, которых невежди человеки по своим волям неистове пишут непротив сущеподобия, не токмо во иконописаниих много обретается не приято церковию; но и в самых святых книг и законописаниих. но не искажены ли суть и ирмологи, не видим ли от ненаказания и в печатных самых неистовство печатно, яко же вместо целования, темены прикасатися, и приношение сырное пасхою нарицаемо. и молитвы братотворению, и паки молитва яблоком вместо гроздия из него же вино бывает сотворяемо. и мнози неведущи за гроздие яблоки почитают, и до дне Преображения Господня их не вкушают. и евангелие недельное истолковано святым Калистом папою римским, у нас же его надписуют Златоустовым толкованием. и что много глаголати начальное и совершенное знамение благочестия нашего, предел истинныя веры святый символ глагол о нем же вси святии всея вселенныя подвигшеся на соборе утвердиша ни прибавити ни убавити, ни уяти из него, страшными клятвами завещавше где до сих дел праве его писаша. его же Божиею благодатию от древних книг из греческих ныне исправлена познахом. святым имена. Иоанна Иваном не писаша ли, и Николая Николою. а что в просодиях верхних и нижних и в самых буквах изрещи невозможно, неисправленнаго печатания. не достоит бо нам господине нынешнее многих неразумие смотрити. яко же нецыи не вем чесо ради в церкви не входят, и служебники исправлены отрицают. и крестное воображение в сложении перст пререкуют. и спроста рещи исправленных ныне церковных догмат иже толикими леты быша испорушены себе и спослушающих их не приимати учат: иже именуются ляды. якоже есть буян и его ученицы. иже толма во глубину неразумия впадоша, яко мнози от них буйством своим в противлении истинне кроме всякия святыни исповедания святых пречистых Христовых таин причащения умроша. и Бог един весть что имать творити с ними в день суда. мнози бо суть и ныне иже конечным неведением объяти, а мудрейшим себе не хощут веры яти. О них же глаголется и в притчах, не возлюбит рече ненаказанныи обличающих его, с премудрым же не беседует. нам же убо, о господине и отче, не подобает многих ныне видя блазнящихся смущатися, поминая глаголющаго. будет бо рече время, егда бо здраваго учения не послушают. и божественнаго Златоуста подтвержающа и глаголюща. егда рече видиши несмысленныя многи, то не чюдися. чреда бо есть быти сицевым. и о сем убо довлеет нам реченная. да не ушеса твоя честная многоречием грубым поврежду, обаче же молю тя именем Господа Бога и Спаса нашего Исуса Христа держи и проповедуй крестное знамение в сложении перст во образ триипостаснаго единаго Божества непревратно. яко предали нам святии отцы, и вселенстии патриарси. да будеши во всех подобен им, и причастник царствию небесному, и жизни будущаго века, аминь.

Послание Аввакума протопопа к Андрею Клещееву

Против сего многокозненнаго и прелестнаго послания Аввакум протопоп восписует,

льсти и хулы исполненныя уста заграждает и посрамляет,

и яко острием меча посекает вселукаваго языка глаголы.

Списатель же сему авва Спиридон.

Правду рекл еси воспомянув дружество еже по Христе. яко полезно есть. и аз тебе глаголю, яко не точию полезно. но паче солнечных лучь просвещает и согревает другов искренних яже о Христе едином Учителе всего християнства, а не кроме Христа яко же глаголеши повинутися мудрейшим. от них же утаил есть Господь тайны благодати своя. а открыл есть та младенцем, да буйством проповеди спасает верных своих, а не мудрейшими, яко же ты глаголеши. чти слово истиннаго Учителя Христа Спаса нашего. аще еще не отреклся Его весма. а еже услаждаеши мудрейшими исправлениями в церковных догматех. то сия суть исправления отпадших, и сладка суть отпадшим: а сыном сионским горька суть. церковь бо созда Христос сице, святу и крепку, сице непреклонну и недвижиму. яко не токмо уста еретическая, но и самая врата адова не одолеют ей по словеси Господню. в ней бо Христос живет и в ней царствует. и не даст ей погрешити нимало что, не токмо в вере и догматех веры, но и в малейшей чертице божественных церковных догмат, канонов и песней. вся бо церковная дела суть верна, и цела, и ничим же вредима. отпадшии же от церкви не веруют словесем Христовым, яко церкви Христовы, врата адова не одолеют, и никакову исправлению не подлежит от начала веры даже до скончания века. но перваго зверя пестроту во всем приемше хулу глаголют на Бога, и на селение Его. еже есть церковь, и на вся живущая. а себе самех нарицают церковию, глаголют бо поблудиша отцы наши в церковных догматех, и многа времена в погружении пребысть, даже до нас, мы же ныне ко исправлению умудрившеся, погибшее обретаем, а стропотная гладко сотворяем. а еже церкви Христовой врата адова не одолеют, сего и вопросити стыдятся за великою мудростию: но церковь святая соборная и апостольская в ней же Христос живет, глаголя с вами есмь во вся дни до скончания века, весть проклинати отпадших и не первыя есте вы отторгшеся от единства церкови и веры, мните себе исправляти, под титлом, и исправляете, чем далее тем глупее. во адово дно себе низводите. и тому мнимому вашему исправлению конца не будет, дондеже не останется в вас ни едина малейшая жилица христианская. тако бо отпадоша ариане от церкви Христовы. и исправиша себе в лютейшую погибель. тако македониане не прияли словес Христовых. тако и прочии вси. тако римляне, тако унияты, тако люторяне, тако алсовизниты, тако и вси отметающиися Христа, и не приемлющи словес Христовых. о них же глаголет Богослов, глаголя: всяк преступаяй и не пребываяй во учении Христове, Бога не имать. твори еже хощеши, аз же уже сумнюся о твоем обращении, по словеси святаго апостола Павла, яко плотское мудрование вражда на Бога. закону бо Божию не повинуется, не может бо уже покоритеся. а еже глаголеши о сложении перстов, во еже знаменати лица християном. тако хульно есть яко глаголеши; и то несть дивно. во тме бо затворенный. како может свет видети, и символ бо православныя веры раздирая от словес Христовых. како может о кресте Христове добре мудрствовати. тем же бо святыя тайны сокровенныя суть в сложении перстов. и во знамении креста Господня на лицах христианских. яже и во святом непорочном символе православныя християнския веры. а еже нам отсылаеши прочести в писаниих подкреплением словесем твоим. тамо бо прочтохом и познахом нрав твоего мудрования подобен человеку утопающему, ему же аще бы кто и бритву подал, и за ту хватается. тако и ты везде смех себе сотворил еси. и поне же суетныя сия глаголы издав не стыдишися, то аз тя стыжуся пред людми; святыи иже суть столпи непоколебимии во православной християнской вере. и во святой соборной и апостольской церкви, ея же никогда же врата адова не одолеют, никакова исправления не требует. аще бо и ангел с небеси восхотел исправляти, анафема да будет по писанию. не токмо нынешних пияных апостолов исправлению, которые всегда с похмелья мудрствуют, составляюще лукавыя догматы, еже изгнати от среды церковь Христову. и поставити мерзость запустения во християнех да скорее речется в людех мир и утвержение по писанию. и нападет на них всегубительство внезапу. ей не внидет возлюбленне благодать духовная в те уста, в ня же входит вино корчемное, аще и тмо крат наречеши их мудрейшими. поведут тя с ними, идеже аще хощеши возопиеши горе и увы, но невовремя еще глаголеши облыгая святейших вселенских патриархов. яко бы оне имели отлучати от Святыя Троицы Отца и Сына и Святаго Духа тех которыя не приемлют вселукаваго римскаго догмата. в тех перстах сокровеннаго, и лестию хулу на Святый Дух Истинный наводящаго: о нем же ты ниже слышал еси тогда, сия ложь на святых пастырей наших, а не истинна. ведать бо могла и знати святейшия патриарси. яко сатана прельсти прародителей наши: тако же и ныне творит, ища потопити верных в непрощенном нечестии. еже есть хула на Святый Дух Истинный; троицею бо кроме воплощения Сына Божия и страстей Христовых знаменати крест хульно есть, и нечестиво, разве аще кто продает веру за 30 сребренник, ему же судит Бог. и о яблоки красен бе и добр в снедь иже Адама умертвивый плод, его же вы ныне возжелесте вкушати прежде времени не ведуще силы в словеси сем, проели есте на яблоках предания церкви Христовой. не ваших пияных мудрецов разумов по всецелым российским собором во время святаго священия прият церковь российская посвящати яблоки за скудость винограда. точию да не лишится молитва тоя плода. во всем последует святой соборной и апостольской церкви греческаго закона. тогда еще непорочна сущи, понеже ныне егда раскол творят книги еретическия от римлян, от парижан, от венетов продаемыя греком, прочее умолчю до время, и тем книгам зазорным сквозе еретическия руки прошедшим святейшия вселенския патриархи ни в чем не последуют. но аще и с великим трудом преписуют себе книги, с непорочных книг писменных. и потом правят слово святыя истинны: имже во всех последуют, муравы, болгары, сербы, мултани, волохи, угрове. те все непорочныя книги печатают словенским языком, и по них работают. а не так яко же ваши нынешнии дрождями прокислыя мудрецы трясущимися руками пишут, ползающе по земли яко гадове. что могут доброе начати, а ты их мудрейшими нарицаешь, и мне тем повинутися радеешь. от них же ты сам бежати должен еси, аще хощеши Христа видети в день суда. церкви бо Христовой врата адова не одолеют, в ней же аще бы и ангел дерзнул что подвигнуть, анафема да будет по писанию. вашему возлюблению церковь в ней же глаголеши погибшее обретосте. косненная отреваете, кривое правите, и стропотное гладко сотворяете. како не одолеша вас врата адова: понеже та и таковая в нашу церковь внидоша, и много время в таковом блужении пребысть, то како ту наречете Христову, то како ея врата адова не одолеша по словеси Господню. прииди в чювство аки их обретаешися. аще мощно ти есть познати истинну да не погубиши себе во веки. припади к ногам Распятаго за ны истиннаго Учителя Христа Бога нашего, призови Духа Истиннаго и наставит тя на всяку истинну. того бо ради положи Господь во святом евангелии притчю о блудном сыне, да познает церковь Христову, и отступление в правду и блужение. что бо принесе блудный, разве наготу свою. и прият первую одежду, и наслаждение в дому милостиваго отца, и паки сын наречется в дому отчем, но сему сподобляемся, аще двоедивно согрешаем кроме хуления на Святый Дух. рекшему едино слово иже не подобает нарицати в символе Истинным. аще и едино есть, сумнюся о его спасении: сей бо содержит истинну в неправде по писанию. несть бо мощно символ прочитати без Истиннаго. а к людем глаголати, яко верую во Истиннаго. кто сему поверит, се бо есть истинна в неправде. на се открывается гнев Божий по писанию. еретик несет гнев Божий за ересь. а наследник за наследие, заступник за заступление. хваляй за хваление. а молчай за молчание. а невежда за невежество свое. гнев Божий проливается по пророчеству Иезекииля пророка, прочее умолчу да не гневаются людие [Аминь].

Притча Максима Грека.

Некто родится во тме нощию на поли: пеленами не повит, и водою не омыт: и солнце на него не возсияет: мир же о нем возрадуется.

Толкование. Зде антихриста гадательствует. Понеже родится на поли во тме нощию, сиречь, во время пространно, во тме нечестия. пеленами не повит. сиречь, заповедьми Христовыми не обвит. и водою не омыт. сиречь святым крещением не просвещен. и солнце на него не возсияет. сиречь, не просвещенно будет царство его, солнца правды Христа, помраченно злобами беззаконий. и мир же возрасту его возрадуется.