ВКРАТЦЕ ИЗЛОЖЕНО
Преподобный отецъ Варлаамъ в лета бе царя и великаго князя Иоанна Васильевича
всея России самодержца. Рождение и воспитание име в Керецкой волости, на море
окияне. Научен же бысть книгам и божиимъ судомъ поставленъ бысть презвитером в
Колскомъ граде в церкви Николы чюдотворца, и тамо пребываше добре подвизаяся на
невидимаго врага козни, и люди закону божию яко истинный пастырь поучаше, и бысть
ходатай богу и человеком.
Видевъ убо его диаволъ всяческими добродетелми украшена, свою же окаянную и
немощную силу, яко паучину раздираему от него, простре сеть во уловление праведнаго,
яко же древле на Адама, вложив бо его во убийство супружницы его. Онъ же по сотворении
греха разумевъ, яко завидевъ ему врагъ, плакався велми и недостойна себе судивъ
еже священная действовати, но паче изволилъ страдати за грехъ,— еже с мертвым
теломъ по морской пучине с места на место плавати, дондежеоно мертвое тело тлению
предастся. И 6е видети праведнаго труды единаго по морю в карбасе ездяща с мертвым
телом от Колы около Святаго Носа даже и до Керети. И не яко же протчии человецы
ожидаху паруснаго плавания, но он плаваше против зелнаго обуревания и весла из
рукъ своих не выпущаше, но труждашеся велми и псалмы Давидовы пояше, то бо ему
пища бяше. И во дни убо труждаяся по морю, в нощи же без сна пребываше, моля бога
со слезами о отпущении греха. И понеже доволно время потрудився, хотя извещение
прияти. Доиде прежереченнаго места — Святаго Носа. Ту бе, глаголютъ, прежде того
непроходну месту тому быти ради множествъ червей морских, иже творяху многи пакости
над лодиями мореходцемъ. Еще бо и онъ без вреда пребываше от них, но восхоте и
протчимъ человеком путь без вреда сотворити. Ставъ на молитву и руце воздевъ на
небо, услышанъ бысть. И абие черви без вести сотворишася, и путь мореходцемъ около
Святаго Носа сотворил чист даже и до ныне.
И понеже преподобный извещение приемъ от
бога, вскоре оставляетъ миръ и бывает инокъ,
и в пустыню вселився и, божиею помощию
бесовския полки победивъ, с миром ко
господу отиде в Чюпской губе. Оттоле же
пренесено бысть святое тело его в Кереть и
погребено близъ церкви святаго
великомученика Георгия с восточной стране
за олтаремъ.
По некоем же времени восхоте богъ явити
труды своего угодника преподобнаго
Варлаама. Некоему убо купцу именемъ Евфимию,
каргополцу, пловущу по морю в лодии и от
зелнаго обуревания потопающи лодия его, и
всемъ ненадежно плачющимъ погибели своея.
Тогда представъ имъ святый и от потопления
избавилъ, и себе поведалъ, кто бе явивыйся.
Евфимий же и сущии с нимъ, видевше
преславную помощь от преподобнаго ко всемъ,
и приеха в Кереть, и поведа всемъ, яко
молитвами преподобнаго Варлаама Керецкаго
избавил богъ от потопления морскаго, и
повеле от имения своего поставити сень над
гробомъ святаго и свещу пред святителевымъ
образомъ вжигати. И отиде в путь свой
радуяся, благодаря бога и угодника его,
преподобнаго отца нашего Варлаама
Керецкаго. П
о в е д а н и е о т ч ю д е с ъ п р е п о
д о б н а г о В а р л а а м а К е р е ц к а г
о ч ю д о т в о р ц а
В лета 7172 (1664) году, июня въ 1 день поведа намъ
некий мужъ именемъ Петръ Васильевъ,
порекломъ Буторин.
Юну ми сущу, в первое на десят лето возраста
моего, упражняющежеся со отцемъ в рыбных
ловитвахъ в Соностровах. Видение таковое во
сне виде, яко пловущу намъ со отцемъ моимъ в
карбасе, противъ Шарапова наволока,
напрасно возъярися море волнами, и
наполнися судно наше воды, и азъ быхъ яко во
иступлении. И паки видех ину волну, идущу и
хотящу покрыти судно наше. И озрехся и
видехъ в судни нашемъ старца седа брадою,
защищающе насъ от волны тоя. И абие внезапу
обретеся судно наше во отишии за коргою. И
егда избави насъ от потопления, и рече намъ:
«Потонути было бы вамъ, аще не бы азъ,
Варлаамъ ис Керети», и повеле ми поведати
людемъ. Аз же возбнувъ и начатъ поведати
отцу моему бывьшее видение. Он же, яко
младенцу мне, и не внимаше себе во умъ.
Наутрие же узрехом лодию в море идущу, и
егда близъ насъ бывшей. инъ суседъ прииде к
нам з другие тони и поведа: «Наша де,
керецкая, прошла лодья, но азъ не смеяше
ехати к ней, понеже зыби на море много».
Отецъ же мой внезапу начат глаголати: «Поедемъ
мы в волость хлеба ради». И поехаша, и ветру
сущу велику. И егда бывшим намъ у Шарапова
наволока, напрасно пришед волна и наполни
карбасъ нашъ воды. Нам же в недоумении
велицемъ бывшим и ужасшися. И паки видехомъ
вторую волну, лютее той ярящуся и покрыти
насъ хотящу. Нам же до конца отчаявшимся
живота своего. И абие внезапу судно наше,
никим же направляемо, обретеся за коргою у
брега. Мы же возрадовахомся велми и выливше
воду из карбаса и доидохом в волость. По
пяти же днех яви ми ся паки той же старецъ во
сне в трапезе, поношая мя мне и ужасая, и
хотяше мя бита дубцы и глаголаше: «Что ты
мною бывшее вамъ не поведа всемъ человеком
деяния моего?» И повеле поведати людемъ.
Той же мужъ поведа намъ. Бысть некто от велможъ царевых правя в Колскомъ остроге
воеводскую власть при благоверномъ царе Михаиле Феодоровиче всея России после
Литовския войны. Ему же имя Гурий Иванов, сынъ Волынцовъ. Бысть же ему черная
болезнь. И недоумеющуся, како бы ему болезни тоя избыти. И явися ему святый Варлаамъ
в той болезни, во образе иноческом, глаголя: «Не скорби, человече, избавит тя
богъ от тоя болезни». Той же мужъ начатъ глаголати ему: «Кто еси ты, господине
мой, и откуду?» Он же отвеща ему: «Азъ есмь Варлаамъ ис Керети». Той же велможа
возбнувъ от болезни своея, яко от сна, и начат поведати еже виде и вопрошати,
кто есть той Варлаамъ. И поведаша ему во граде живущии: «Той в древняя лета таков
мужъ священствовав в Колском остроге и после жилъ в Керети иноком, тамо и преставися».
Той же велможа посла на взыскание, кто есть тоя веси живущий в том граде. И обрете
пришелца, керецские волости жилца Василия именемъ, пореклом Мухина, и вопрошая
его о святемъ Варлаамъ, како и где положено честное тело его. Он же Василий поведа
ему подробну вся, яже о святемъ, и яко в небрежении ему на месте, на нем же положен,
тамо и почиваетъ. Той же предреченный велможа Гурий начат с темъ Василиемъ совещати,
дабы сотворити сень над гробомъ святаго Варлаама и крестъ поставити. И дастъ ему
сребро на устроение. Василий же той вземъ сребро и прииде в Кереть, и по повелънию
онаго воеводы содела гробницу над гробомъ святаго. Велможа же той избавленъ бысть
от духа нечистаго молитвами преподобнаго Варлаама.
И
н о ч ю д о п р е п о д о б н а г о б ы в
ш а г о
Нецыи мужии, купцы града Каргополя, имя
единому Иаковъ, порекломъ Посновъ, другому
же имя Евфимий Болнищевъ, поведаша, сице
рече. Идущим намъ на лодии весною от
Онежскаго устья в куплю. И егда
пробежавшимъ Соловецкой островъ и бывшим
на болшемъ море, и наехаша ледове много, и
обыдоша лодью нашу оттовсюду лду, яко ни
протиснутися могущим намъ сквозе ниха. И
ледовомъ идущим на лодью и погубити насъ
хотящимъ, и много нам трудившимся и ничто же
намъ успевшим, всемъ живота своего
отчаявшимся. Преждереченному же оному мужу
Евфимию стоящу в корме и опершуся о палубы,
от великия печали воздремавшу. Абие явися
ему на лодии старецъ, вопрошая бо: «Далече
ли путь вашъ, братие?» Он же глагола: «Идемъ
в Поморие торговати, и ныне ледомъ насъ
затерло и вси погибнути хощемъ». Старцу же
рекшу: «Не скорби, брате, но поедите вы в
Кереть и богъ дастъ вамъ пусть чисть». Сам
же иде на носъ и начат лды роспихивати.
Евфимию же возбнувшуся и не виде никого же,
токмо дружину свою сущую с ними на лодьи. И
нача имъ поведати, еже виде во сне. И внезапу
бысть яко дорога сквозь льда. Они же возрадовашася.
И начаша присно ятися пути, и абие повеявшу
вътру поносному и выехаша на море ничем же
вредими. И приидоша в Кереть и поведаша имъ
в слухъ живущим ту явление святаго Варлаама,
како их богъ избавил от тоя погибели
молитвами его. И того ради чудесе мужъ той
Евфимий содела над гробомъ преподобнаго
часовню, оттоле въру держа ко святому велию.
Ч ю д о и н о п р е п о д о б н а г о
Той же мужъ поведа намъ. Двиненину некоему,
именемъ Никифору, со своими клевреты идущу
с мурманского рыбнаго промыслу. И егда
бывшу ему против Святаго Носа, начат
труждати ихъ ветренная буря, и древо
сломило парусное у них, и парусъ унесло в
море, волны же вливахуся на лодью. И снесло у
них с лодье все волнами, и отнесло их на
лодье в морскую пучину, и уже имъ всемъ
отчаявшимся живота своего, и занесло ихъ в
плавании их в пучину морскую.
И многим днемъ минувшим, явися тому
Никифору во сне преподобный отец Варлаамъ и
начатъ ему глаголати: «Что вы впадосте во
отчаяние и не промышляете о себе? Парусъ
вашъ под лодьею, а древо и с ногами тут же
под лодьею, и вы того древа не ставьте.
Промышляйте, не плошитеся,— богъ васъ
вынесетъ!»
Никифору же тому в недоумении бывшу о
видении, начатъ поведати дружине, глаголаху:
«Где, братие, парусъ?» — «Мы не видехомъ». И
начаша напрасно семо и овамо искати, и абие
обретоша парусъ подъ лодьею и едва
извлекоша на лодью, тамо же весла и стир. Они
же, много трудившеся, изнемогоша и сонъ
объятъ их. Паки явися имъ той же мужъ,
глаголя: «Промышляйте, призывайте еще бога
на помощь, и вынесетъ господь бог». Никифору
же оному вопрошающу его: «Кто ты, господине
мой, сице в промышлении нашемъ твориши и о
насъ печешися?» Той же отвеща: «Азъ есмь из
Керети Варлаамъ». Никифору же оному не
ведящу его, и начат вопрошати у дружине
своей. Онемъ такожде не ведущимъ имъ всемъ
его.
Начаша обычная на лодье уготовляти и
промышляти о путнемъ шествии своемъ. И
видеша яко дорогу расплывающуся пред ними
лед той. И абие ветру возвеявшу поносному
имъ, в третий день достигоша до Двинскаго
устия.
Во второе лето по явлении том прииде мужъ той Никифоръ в Кереть, вопрошая:
«Кто есть и где таков мужъ, нарицаемый Варлаамъ?»,— чая бо еще жива его суща.
Живущий ту поведаша ему, яко «той святый во успении явися, избавилъ тя богъ молитвами
его от потопления». И показаша ему гробъ святаго. Той же Никифор принесе свещи
многи и положиша на гробъ его, моля преподобнаго о избавлении своемъ.
|
