СКАЗАНИЕ О РУКОПИСАНИИ ГРЕХОВНЕМ
Сочинения преподобнаго Максима Грека, изданныя при Казанской Духовной Академии. Часть первая: Догматико-полемическія сочиненія. — Издание второе. — Казань, 1894. — С. 424-430.
Последнимъ неведеніемъ и неискуствомъ святыхъ писаній недугуетъ воистину глаголяй, яко первозданный Адамъ далъ на себе прельстившему его діаволу рукописаніе вечныя работы. Аще бо ведалъ бы силу реченныхъ Содетелемъ къ прельстившемуся, и аще бы послушалъ тайноглагольника, крепце завещавающа: не всякому духу веруйте, еже есть различнымъ ученіемъ, но искушати ихъ, аще отъ Бога суть (1 Іоан. 4, 1), сиречь аще согласуютъ богодухновеннымъ пророческимъ и апостольскимъ реченіемъ, не бы убо сице горце солгалъ на первозданнаго, ниже сицевымъ неправдосудіемъ укорилъ бы праведнаго Судію. Сіе же глаголю, яко землю убо ничимже неправдовавшу проклялъ рекъ: проклята земля въ делехъ твоихъ, а отступившаго отъ него и богомеръзскому демону сочтавшагося не точію оставилъ безъ казни, но и премного показалъ о немъ и семени его промыслъ и попеченіе отъ рода въ родъ, поставилъ ему и семени его ангели Свои хранители, якоже есть писано во второй песни сице яве глаголющаго: вопроси отца твоего и возвеститъ тебе, и старейшихъ тебе и рекутъ ти: егда разделяше языки Вышній, поставилъ пределы языкомъ, по числу ангеловъ Божіихъ, и бысть достояніе Господне людіе его Іаковъ (Втор. 32, 7-8) и прочая. А яко не пощаделъ бы его Содетель его, аще бы ведалъ его раба себе волею написана богоборцу демону, явственно есть имиже глаголетъ божественное писаніе: уничижилъ всехъ отступающихъ отъ оправданій Твоихъ. Чего ради? яко, рече, неправедно помышленіе ихъ. И паки: возненавиделъ еси всехъ творящихъ беззаконіе, погубиши вся глаголющая лжу (Псал. 5, 6-7). Явственно убо есть отъ сихъ святыхъ писаній, яко и возненавиденъ былъ бы тогда всяко первозданный отъ Сотворшаго и аки отступивъ отъ заповеди Сотворшаго ѝ, и уничиженъ былъ бы, аки содеявъ превеліе беззаконіе и погубилъ бы é до конца абіе, аки нечествовавша въ толь велію яже о себе благость Создавшаго ѝ. Елма же убо Содетель его ни уничижи его, ниже возненавиде, ниже абіе погубилъ его, паче же долготерпеливъ о немъ человеколюбне глаголаше къ нему, аки тужа о немъ: Адаме, где еси? не места, въ немже крыяшеся не неведый, Иже вся ведый, пыташе, но аки бы реклъ: разумееши ли, о несмысленне, отъ каковыя славы и чести въ таково безславіе и безчестіе препалъ еси? Отъ сего явственейше обличаемы бываютъ лжуще оглаголющіи его и глаголюще, яко рукописаніе вечныя рабочы далъ на себе прельстившему его лукавому бесу. Къ симже, что благо прочее надеяся приимати отъ лукаваго беса, имже лишенъ бысть равноангельныя оноя славы, или что прочее бояся его, егоже главу сокрушати сподобися отъ Владыки всехъ, рукописаніе на себе даяше прочее, и наипаче слышавъ отъ своего Содетеля вражду положену промежъ ономъ и человеческимъ родомъ? вражде убо положенне бывшей слышавъ отъ своего Содетеля и Владыки, како паки оному врагу сущу даяше на себе первозданный рукописаніе? Блядь убо явленна и кощунна сицевое безумныхъ некихъ мудрословіе; не отъ божественныхъ бо писаній приемше имутъ себе, но отъ своея ненаказанныя мысли умысливше, обносятъ сіе везде и сказуютъ подобнымъ себе ненаученнымъ, не боящеся отнюдъ глаголющія божественныя речи: погубиши вся глаголющая лжу. Сему убо ложну показавшуся, аки ни едино свидетельство имущу утвержающее, и ныне время изъяснити разумъ обносимаго рукописанія въ божественныхъ писаніихъ како намъ подобаетъ разумети é. Ведомо убо да есть, яко у божественнаго апостола Павла рукописаніе взято отъ среди и къ кресту Спасову пригвождено, сиречь бездельно прочее бывше разумеется, якоже учими бываемъ еже къ Ефесяномъ посланіемъ: закономъ моисейскихъ заповедей и преданій, елика писана суть въ книзе Второзаконія о жертвахъ и всесожженіихъ и о пасхезаконней о обрезаніи и о заповеданыхъ брашенъ и о различныхъ очищеніихъ и полосканіихъ телесныхъ, которая книга и средостеніе оплоти и вражду именовати обыче апостолъ, глаголя сице явьствене въ еже къ Ефесяномъ посланіи: Той бо есть примиреніе наше сотворивый обоя едино, сиречь людей іюдейскихъ и языки веровавшіе и средостеніе оплоты разоривъ вражду по плоти, во плоти своей, закона заповедей во ученіи раззоривъ, да обоихъ созиждетъ собою во единаго новаго человека, уби вражду въ себе (Ефес. 2, 14-16), якоже и въ еже къ Колоссаемъ посланіи глаголетъ: оставивъ вамъ прегрешенія, истребивъ рукописаніе ученіи, еже на ны, еже бе сопротивно намъ и то взятъ отъ среды, пригвоздивъ é ко кресту (Кол. 2, 13-14). Вражду же и средостеніе оплоты наричетъ é тягости для писанныхъ рукою и черниломъ въ ней Моисейскихъ завещаній, егоже ради и рукописаніе глаголетъ, ихже не могуще блюсти іюдеи, вражда къ Богу обреташеся имъ и средостеніе оплоти, разлучая насъ и отчуждая Божія любви. А яко неудобь исправляема бяху іудеемъ законная завещанія, блаженный Петръ апостолъ яве научилъ въ Деяніихъ, глаголя къ веровавшимъ фарисеомъ и глаголющимъ, яко подобаетъ обрезати обращающася къ Богу языки и всего закона Моисеова блюсти, глаголетъ бо сице: и ныне чтó искушаете Бога, наложиша иго на выи ученикомъ, егоже ни отцы наши, ни мы возмогохомъ понести, но благодатію Господа нашего Ісуса Христа веруемъ спастися (Деян. 15, 10-11). Сіе убо рукописаніе сиречь книгу Моисейскихъ завещаній вражду и средостеніе оплоти именуему, иго сиречь тягость, аки клятвы, а не благословенію ходатаицу, единородный Сынъ Слово Божіе безначальнаго Отца во плоть облеклъся и бывъ подъ закономъ, да подзаконныя искупитъ, ко кресту Своему пригвоздилъ, сиречь разорилъ, прочее отъ среды взятъ é, якоже святый апостолъ Павелъ вопіетъ въ посланіи еже къ Галатомъ, глаголя: Христосъ насъ искупилъ отъ клятвы законныя, бывъ насъ ради клятва, писано бо есть: проклятъ всякъ висяй на древе (Гал. 3, 13-14), даже убо освободитъ насъ писанныя клятвы въ книзе ветхаго закона глаголющаго: проклятъ всякъ, иже не пребываетъ во всехъ писанныхъ въ книзе закона, яко сотворити я, да свободитъ убо насъ сицевыя и страшныя и горкія клятвы, Господь и Богъ нашъ Ісусъ Христосъ изволилъ пріяти такову поносную смерть по неисчетней благости Своей и человеколюбію, да благословеніе Авраамово на языки будетъ, Ісусомъ Христомъ Господемъ нашимъ, да обетованіе Духа воспріимемъ верою, яже во Христе Ісусе Господе нашемъ. Сицевому убо рукописанію преставшу крестомъ Господа нашего Ісуса Христа, несмы ктому подъ закономъ Моисеовыхъ заповедей, но подъ благодатію и светомъ Евангельскаго совершеннаго законоположенія, егоже ради ни обрезатися нужа належитъ намъ, но божественнымъ крещеніемъ очищаемся отъ всякія скверны духа и плоти. Обрезаніе внешнее чаши точію очищати являшеся, а святое крещеніе и внутреннее и внешнее и чиститъ и святитъ по писанному: окропиши мя иссопомъ и очищуся, омыеши мя, и паче снега убелюся (Псал. 50, 9). Не во единомъ ктому граде Іерусалиме древнемъ повелеваемы бываемъ заклати законную пасху, но во всякомъ граде и стране поволися намъ приносити Господеви жертву чисту и благопріятну, Самого Агньца Божія вземлющаго грехъ міра, по писанному: тогда благоволиши жертву правды, возношеніе и всессожженія (Псал. 50, 21), якоже инде глаголетъ: жертву и приношенія не восхотелъ еси, тело же свершилъ ми еси, сиречь самое Господьское тело, принесенное Богу и Отцу, за спасеніе наше вместо всякія иныя законныя жертвы, и вкратце рещи: все вкупе оно древнее рукописаніе преста крестомъ Христовымъ, по писанному: древняя мимо идоша, се быша вся нова (2 Кор. 5, 17). Таковъ бо есть толкъ носимаго у апостола рукописанія. Ныне же услышимъ и сказаніе рукописанія греховъ нашихъ, каково есть; писано бо есть въ молитве 6 часа сице: И честнымъ Его крестомъ рукописаніе грехъ нашихъ разтерзалъ еси. Таковаго рукописанія сказаніе сицево есть. Елма же слышимъ, во еже отъ Іоанна евангелиста глаголющаго къ непокоривымъ іюдеомъ: всякъ бо творяй грехъ, рабъ есть греху (Іоан. 8, 38); такоже и блаженный Петръ апостолъ пишетъ: имже бо кто побежденъ есть, сему и поработися (2 Петр. 2, 19)! Кождоже насъ пленицами своихъ согрешеній связуемъ отъ нихъ, якоже безсловесенъ скотъ, къ еже согрешати влекомъ всегда бываетъ, похотенъ своея плоти, аки госпожамъ некимъ, невоздержно работая: въ лепоту таково наше страстное порабощеніе наречеся рукописаніе греховъ, по подобію рабомъ, дающимъ своимъ господемъ на себе рукописанную крепость, яко работати имъ даже до смерти своея. Сіе убо наше злейше страстное порабощеніе, рукописаніе приточне именуемо, растерзалъ Спасъ нашъ крестомъ своимъ, давъ намъ даръ Святаго Духа, въ Немже вопіемъ: Авва Отче, отъ негоже просвещаеми и укрепляеми, разтерзается, еже дахомъ на ся, рукописаніе, лукавымъ похотемъ плоти нашея, благодатію же Господа нашего Ісуса Христа и содействомъ Святаго Духа свобождьшеся толь лукаваго страстей порабощенія греховнаго, бываемъ Божія чада возлюбленна, свободою убо, еюже крестъ Спасовъ освободилъ насъ, да стоимъ, да не паки подъ игомъ работы подлагаимъ себе, да не столпъ сланенъ будемъ, да не речется и о насъ премудрая притча: свинія въ тине сквернаве умывшися, и песъ обращься во свою блевотину. |
