Месяца Септеврiа въ 16 день

Житiе святыя мученiци Людмилы, бабы святаго Вячеслава.

Блаженая Людмила бяше отъ земля Сербьскыя, князя Сербьскаго дщи; и отдана бысть за чешьскаго князя, именемъ Боривой. Бяху же тогда не крещени вси. Егда же быста вкупе, просветистася има очи сердечнеи, и крестистася во имя Отца и Сына и Святаго Духа; и създаста церкви, и съвъкуписта iереи, и родиста 3 сыны и дщери. Врибои [Боривой] же 30 и 6 летъ житiя сего отиде; блаженаа яже Людомила всю печаль имеяше къ Богу и все свое имение въ милостыню издая нищимъ. Сынъ же ея Ратиславъ прия престолъ отечьскы/л. 25 об./й; и тъ царствовавъ 30 и 3 летъ, почи о Господе. Прия власть Вячеславъ, внукъ Людомилинъ. Тогда нача мыслити мати Вячеслава на свекровь свою зло Людомилу и всячьскы искаше погубити ю. Разумевши же Людмила отъиде во инъ градъ, Тетинъ нарицаемъ. Сноха же ея съвещася съ двема боляринома, и посла я в Тетинъ, да быста погубила всекровь ея Людмилу. Пришедшема же разбоиникома тема и съвкуписта о собе множество злодеи и подобныи собе; вечеру же бывшю, оступиша дворъ съ ору/л. 26./жиемъ, и разбивша двери, внiдоша въ храмъ. Имше Людмилу, възвергоста ушевь на шию еи, съемъше ей зъ главы, и темъ удависта ю. И тако приятъ конець житию въ день суботный, въ 1-й час нощи, живши летъ 60 и 1 лето, и Богу угодивши и мучения венець приимши. Богъ бо показа от нея знамения и чюдеса на месте, идеже бе погребена, не бе бо въ церкви, нъ под стеною града, ижеже являхуся по вся нощи и свеща горяща, и некыи слепець /л. 26 об./ прозре прикосновениемъ персти, идеже Людмила лежаше. И оттоле многа [быша знаменiа и] 1) чюдеса, яже слышавъ внукъ ея Вечеславъ, потщався принесе бабу свою въ славныи град Прагу положи мощи ея въ церкви святаго Георгия, идеже и до ныне многа суть чюдеса.

Примечанiя:

1) Такъ дополнено въ тексте Великiхъ Миней Четiихъ митр. Макарiя (Месяцъ Сентябрь, дни 14-24. Спб, 1869 г. – стлб. 1217).